‏ 2 Samuel 16

Давид ӕмӕ Цива

1Давид хохы сӕрӕй иу чысыл ӕруад, афтӕ ӕдуаргъ дыууӕ хӕрӕгимӕ йӕ размӕ фӕци Мефивошеты фӕсдзӕуин Цива. Хӕрджыты уаргъ — дыууӕсӕдӕ дзулы, чисмисы сӕдӕ халы, легъуиты сӕдӕ халы ӕмӕ сӕны лалым. 2Паддзах Цивайы фӕрсы: «Адон дӕ цӕмӕн хъӕуынц?» Цива дзуапп радта: «Хӕрджытӕ — цӕмӕй сыл паддзахы хӕдзаронтӕ цӕуой, дзул ӕмӕ дыргътӕ — дӕ дӕлдӕртӕн хойрагӕн, сӕн та — ӕдзӕрӕг быдыры чи бастайа, уыдонӕн нуазынӕн».

3Паддзах та йӕ бафарста: «Ӕмӕ дӕ хицауы фырт кӕм ис?» Цива йын дзуапп радта: «Уый Йерусалимы баззад — афтӕ ӕнхъӕлы, ӕмӕ йын израилӕгтӕ ныр йӕ фыды паддзахад фӕстӕмӕ ратдзысты». 4Паддзах Цивайӕн загъта: «Уӕдӕ Мефивошеты мулк иууылдӕр дӕу фӕуӕд». Цива йын дзуапп радта: «Ныллӕг дын кувын. Дӕ хорзӕх мӕ уӕд, мӕ бардарӕг, паддзах!»

5Паддзах Давид Бахуримы сахармӕ куыддӕр бахӕццӕ, афтӕ уырдыгӕй рацыд иу лӕг Саулы мыггагӕй, йӕ ном — Шими, Герайы фырт. Цӕугӕ-цӕуын ӕлгъыста, 6Давид ӕмӕ паддзахы дӕлдӕртыл дуртӕ ӕхста, кӕд паддзах Давидӕн йӕ адӕм ӕмӕ йӕ гуыппырсартӕ йӕ фӕйнӕфарс цыдысты, уӕддӕр. 7Шими афтӕ ӕлгъыста паддзахы: «Фесӕф мӕ разӕй, лӕгмар, ӕнаккаг! 8Кӕй паддзахы бадӕн байстай, уыцы Саулы хӕдзары туг дӕ исы Дунедарӕг. Дӕ паддзахад дӕр дын дӕ фырт Авессаломӕн радта. Ды фыдбылызы бахаудтӕ, уымӕн ӕмӕ дӕ къухтӕ тугӕйдзаг сты».

9Церуайы фырт Авишай паддзахӕн загъта: «Ацы хӕдмӕл куыдз мын мӕ хицауы, паддзахы, цӕмӕн ӕлгъиты? Ныртӕккӕ йын йӕ сӕр атӕхын кӕндзынӕн!» 10Паддзах загъта: «Цы уӕ фӕнды, Церуайы фырттӕ! Уымӕн мӕ ӕлгъиты, ӕмӕ йын Дунедарӕг афтӕ загъта. Уӕд ын кӕй бон у, афтӕ цӕмӕн кӕныс, зӕгъгӕ, бауайдзӕф кӕнын?»

11Ноджы ма Давид загъта Авишай ӕмӕ йӕ иннӕ дӕлдӕртӕн: «Мӕхи фырт мӕ марынвӕнд куы кӕны, уӕд ма Бениамины мыггагӕй та цы бадомон? Ныууадзут ӕй. Уадз ӕмӕ ӕлгъита, уымӕн ӕмӕ йын Дунедарӕгӕй афтӕ фӕдзӕхст у. 12Кӕд Дунедарӕг ӕркӕсид, къӕхты бын мӕ куыд кӕнынц, уымӕ, ӕмӕ мын абоны ӕлгъыст хорзӕн фӕкӕнид».

13Давид йӕ адӕмимӕ фӕндагыл цыдысты, Шими та — хохы фахсыл. Давиды ӕлгъыста, дуртӕ ӕмӕ йыл сыджыты къуыбӕрттӕ ӕхста. 14Паддзах ӕмӕ йӕ адӕм фӕлладӕй бахӕццӕ сты Иорданы былгӕронмӕ ӕмӕ ӕрулӕфынмӕ уым ӕрлӕууыдысты.

Ахитофел ӕмӕ Хушайы уынаффӕтӕ Авессаломӕн

15Ныр Авессалом та ӕппӕт израилӕгтимӕ бацыд Йерусалиммӕ. Ахитофел дӕр уыди йемӕ. 16Аркаг Хушай, Давиды лымӕн, Авессаломмӕ бацыд ӕмӕ йын загъта: «Ӕгас цӕуӕд паддзах! Ӕгас цӕуӕд паддзах!» 17Авессалом Хушайӕн зӕгъы: «Афтӕ ӕнувыд дзы куынӕ уай дӕ лымӕныл! Цӕуылнӕ ацыдтӕ йемӕ?» 18Хушай йын дзуапп радта: «Нӕ! Дунедарӕг, стӕй мӕнӕ ацы адӕм ӕмӕ ӕппӕт Израил кӕй равзӕрстой, уый цагъар дӕн ӕз дӕр ӕмӕ йемӕ баззайдзынӕн. 19Стӕй Давиды фыртӕй хуыздӕр кӕмӕн хъуамӕ балӕггад кӕнон? Дӕ фыдӕн цы лӕггад кодтон, уыцы лӕггад кӕндзынӕн дӕуӕн дӕр».

20Авессалом Ахитофелӕн бафӕдзӕхста: «Цӕй ӕмӕ бауынаффӕ кӕнӕм, дарддӕр нын цы гӕнгӕ у, уый тыххӕй». 21Ахитофел ын загъта: «Ӕрӕмуат у дӕ фыды номылустытимӕ, хӕдзаргӕс кӕй ныууагъта, уыдонимӕ. Ӕппӕт Израил фехъусдзӕни, дӕ фыдӕн мыггагмӕ дӕр кӕй фенӕуынон дӕ, уый, ӕмӕ демӕ чидӕриддӕр ис, уыдон ӕнгомдӕр ӕрбалӕудзысты дӕ фарсмӕ».

22Авессаломӕн уӕлхӕдзар цатыр айтыгътой, ӕмӕ уый ӕгас Израилы раз ӕмуат ӕрцыди йӕ фыды номылустытимӕ.

23Ахитофелы уынаффӕтӕ уыцы заман нымад уыдысты, цыма исчи зондамынд Хуыцауӕй куырдта, уыйау. Ахӕм кад ын кодтой йӕ алы уынаффӕйӕн Давид дӕр ӕмӕ Авессалом дӕр.