‏ 2 Samuel 19

1Йоавмӕ фӕхабар чындӕуыд: «Паддзах кӕуы ӕмӕ хъарджытӕ кӕны Авессаломыл». 2Ӕмӕ уыцы боны уӕлахизы цин ӕппӕт адӕмӕн дӕр хъарӕгӕй йӕхи раивта, уымӕн ӕмӕ фехъуыстой, паддзах йӕ фыртыл кӕй хъыг кӕны, уый. 3Уыцы бон хӕстон адӕм сахармӕ дӕр хъуызӕгау цыдысты, раст мӕнӕ хӕсты быдырӕй ӕгады лыгъд чи ракӕны, уыдон куыд фӕхъуызынц, афтӕ. 4Паддзах та адӕмӕн йӕхи дӕр не’вдыста, дуарӕхгӕдӕй ӕрдиаг кодта: «Мӕ фырт Авессалом! Авессалом, мӕ фырт, мӕ фырт!»

5Йоав паддзахмӕ йӕ хӕдзармӕ бацыди ӕмӕ йын загъта: «Ды ныртӕккӕ къӕмдзӕстыджы ӕппарыс дӕ цагъарты, тӕккӕ абон дын дӕхи, дӕ фырттӕ ӕмӕ дӕ чызджыты, дӕ устытӕ ӕмӕ дӕ номылустыты чи фервӕзын кодта, уыдоны, 6уымӕн ӕмӕ ды уарзыс, йе сӕфт дӕ чи уыны, уыдоны ӕмӕ де сӕфт уыныс, чи дӕ уарзы, уыдонӕй. Абон равдыстай, балхонтӕ ӕмӕ хӕстонтӕ дӕумӕ нымады дӕр кӕй не сты, уый. Абон ӕз базыдтон: Авессалом ӕгасӕй куы баззадаид, мах та тӕккӕ абон иууылдӕр куы амардаиккам, уӕд дӕм уый раст фӕкастаид. 7Рацу ӕмӕ дӕ ныхасӕй дӕ цагъарты зӕрдӕ фӕлӕууын кӕн. Дунедарӕгӕй дын ард хӕрын, куынӕ рацӕуай, уӕд дӕм ахсӕв иунӕг лӕг дӕр нал баззайдзӕн, ӕмӕ дын уый, ӕвзонгӕй нырмӕ дыл цы бӕллӕхтӕ ӕрцыди, ӕппӕт уыдонӕй дӕр фыддӕр уыдзӕн».

8Паддзах рацыди ӕмӕ кулдуары раз ӕрбадт. Кулдуары раз бады, зӕгъгӕ, уый адӕмыл айхъуыст, ӕмӕ уайтагъд йӕ размӕ ӕрбамбырд сты.

Давиды ӕрбаздӕхт

Ныр израилӕгтӕй та алчи йӕ хӕдзармӕ фӕлыгъд. 9Израилы адӕм, ӕппӕт хӕдзарвӕндӕгтӕ дӕр, сӕхимидӕг быцӕу ныхас систой: «Паддзах нӕ фервӕзын кодта не знӕгтӕй, суӕгъд нӕ кодта филистимӕгты къухӕй, йӕхӕдӕг та, Авессаломӕй лидзгӕйӕ, ныууагъта йӕ зӕхх. 10Авессаломы нӕхицӕн байсӕрстам паддзахӕй, фӕлӕ уый хӕсты куы фӕмард, уӕд ныр цы фӕстиат кӕнут паддзах Давиды фӕстӕмӕ раздахыныл?»

11Израилӕгты ныхӕстӕ паддзахмӕ фӕхӕццӕ сты, ӕмӕ Давид арвыста сауджынтӕ Цадок ӕмӕ Авиафарӕн бафӕдзӕхсынмӕ: «Иудӕйы хистӕртӕн зӕгъут: „Паддзахы йӕ хӕдзармӕ раздахыны хъуыддаджы уӕ фӕсте баззайын цӕмӕн фӕнды? 12Ме’фсымӕртӕ куы стут, мӕ туг ӕмӕ ме стӕг, уӕд паддзахы раздахыны хъуыддаджы фӕсте цӕмӕн хъуамӕ баззайат?“ 13Амасайӕн дӕр зӕгъут: „Ды мӕ туг ӕмӕ ме стӕг нӕ дӕ, ӕви? Хуыцау мын афтӕтӕ ӕмӕ уфтӕтӕ, стӕй ноджы фыддӕртӕ бакӕнӕд, цӕрӕнбонтӕм мын Йоавы бӕсты ды ӕфсады хицау куынӕ уай, уӕд!“» 14Афтӕмӕй Давид ӕппӕт иудейӕгты дӕр иу адӕймагау ӕртасын кодта, ӕмӕ уыдон арвыстой паддзахмӕ: «Раздӕх, дӕхӕдӕг дӕр ӕмӕ дӕ адӕм дӕр!»

15Паддзах раздӕхти ӕмӕ Иорданы былгӕронмӕ ӕрцыд. Иудейӕгтӕ рараст сты паддзахы размӕ, Иорданы фаллаг фарсӕй йӕ ӕрбахизын кӕнынмӕ, ӕмӕ ӕрхӕццӕ сты Гилгалмӕ. 16Паддзах Давиды размӕ иудейӕгтимӕ атагъд кодта бахуримаг Шими дӕр, Герайы фырт, Бениамины байзӕддаг; 17йемӕ — иу мин адӕймаджы Бениамины мыггагӕй, стӕй ма — Саулы хӕдзары лӕггадгӕнӕг Цива йӕ фынддӕс фыртимӕ ӕмӕ йе ссӕдз цагъаримӕ. Ӕмхуызонӕй атындзыдтой Иорданы’рдӕм паддзахы размӕ 18ӕмӕ паддзахӕн ӕд хӕдзаронтӕ ацырдӕм ӕрбахизынмӕ феххуыс кодтой. Паддзахӕн йӕ алы фӕндон ӕххӕст кӕнынмӕ дӕр гӕппӕввонгӕй лӕууыдысты.

Паддзах Иорданы фаллаг фарс куыддӕр йӕ къах ӕрӕвӕрдта, афтӕ Герайы фырт Шими йӕ разы зӕххыл ныддӕлгом ис 19ӕмӕ йын загъта: «О мӕ паддзах, ма мӕ бафхӕр мӕ азымы тыххӕй! Мӕ цӕстмӕ мын ма бадар, мӕ бардарӕг, паддзах, Йерусалимӕй куы рацыди, уӕд дӕ цагъар цы тӕригъӕды бацыд, уый. Хӕрам зӕрдӕ мӕм ма бадар, мӕ паддзах. 20Хорз зоны дӕ цагъар йӕ азым, ӕмӕ мӕнӕ абон Йосефы хӕдзарвӕндагӕн се’ппӕты разӕй ӕрбацыдтӕн мӕ бардарӕгыл, паддзахыл, сӕмбӕлынмӕ».

21Церуайы фырт Авишай афтӕ бакодта: «Ау, Шимийӕн, Дунедарӕджы байсӕрсты кӕй ӕлгъыста, уый тыххӕй марыны тӕрхон нӕ уыдзӕн?»

22Давид ын дзуапп радта: «Цы мӕ агурут, Церуайы фырттӕ? Мӕ фӕндагыл цӕхгӕрмӕ цӕмӕн ныллӕууыдыстут? Ахӕм бон марыны тӕрхон скӕнӕн куыд ис Израилы? Израилы паддзах кӕй дӕн, уый та ныртӕккӕ мӕхи цӕстӕй куы уынын!» 23Ӕмӕ загъта паддзах Шимийӕн: «Нӕ амӕлдзынӕ». Ӕмӕ йын ард бахордта.

24Паддзахы размӕ рацыди Саулы фырты фырт Мефивошет дӕр. Паддзахы ацыды бонӕй, сӕрӕгасӕй фӕстӕмӕ куы ӕрбаздӕхти, уыцы бонмӕ уый йӕ къӕхты ныхтӕ дӕр никуы ракодта, йӕ зачъе дӕр никуы фӕцыбыр кодта, йӕ дарӕс дӕр никуы ныхсадта.

25Йерусалиммӕ паддзахы размӕ куы ӕрбацыди, уӕд ӕй паддзах бафарста: «Мефивошет, мемӕ цӕуылнӕ ацыдтӕ?» 26Уый йын дзуапп радта: «О мӕ бардарӕг, паддзах! Мӕ фӕсдзӕуин мӕ афӕлывта. Къуылых кӕй дӕн, уымӕ гӕсгӕ ӕз, дӕ цагъар, афтӕ хъуыды кодтон, хӕрӕгыл мӕхицӕн саргъ сӕвӕрын кӕндзынӕн ӕмӕ мӕ паддзахмӕ ацӕудзынӕн, зӕгъгӕ. 27Фӕлӕ мӕныл, дӕ цагъарыл, мӕ фӕсдзӕуин дӕ разы, мӕ бардарӕджы, паддзахы раз хахуыртӕ фӕкодта. Мӕ хицау, мӕ паддзах! Ды Хуыцауы зӕдау дӕ ӕмӕ, куыд хуыздӕр дӕм кӕсы, афтӕ бакӕн. 28Мӕ бардарӕг, паддзах, дӕуӕн дӕ бон уыди, ӕмӕ мын мӕ фыды хӕдзарвӕндаг ӕгасӕй дӕр ныццӕгъдай, фӕлӕ ды дӕ цагъары демӕ ӕмвынг скодтай! Уӕд ма ӕз цы цӕсгомӕй хъаст кӕнон паддзахӕн?»

29Паддзах загъта: «Уыцы ныхӕстӕ ныууадз, цӕмӕн мын сӕ дзурыс? Мӕнӕ дын мӕ уынаффӕ: дӕ зӕххытӕ Циваимӕ уе’хсӕн адих кӕн». 30Мефивошет паддзахӕн загъта: «Ӕгайтма мӕ бардарӕг, паддзах, йӕ хӕдзармӕ сӕрӕгасӕй ӕрбаздӕхти! Иууылдӕр сӕ Цива айсӕд!»

31Уымӕй размӕ Рогелимӕй ӕрцыди галаадаг Барзиллай дӕр ӕмӕ паддзахимӕ бацыд Иорданы былгӕронмӕ, уыцы ран ын фӕндараст зӕгъынмӕ. 32Барзиллай, хӕрз зӕронд лӕг, ӕстайаздзыд, уыди тынг бонджын ӕмӕ, паддзах Маханаимы куы уыди, уӕд ӕй ницы хъуаг уагъта.

33Паддзах ын загъта: «Рацу мемӕ ӕмӕ ницы хъуаг уыдзынӕ Йерусалимы». 34Фӕлӕ йын Барзиллай дзуапп радта: «Цал азы ма цӕрдзынӕн, цӕй номыл ма цӕуон паддзахимӕ Йерусалиммӕ? 35Ныридӕгӕн мыл ӕстай азы куы цӕуы, уӕд ма мӕм цы хур кӕсы фидӕнӕй? Цы хӕрын ӕмӕ цы нуазын, уыдоны ад ма бамбардзӕни дӕ цагъар? Зарӕггӕнджыты хъӕлӕс ӕрцахсынхъом ма суыдзысты мӕ хъустӕ? Мӕ бардарӕгӕн, паддзахӕн, фыдӕбоны хос цӕмӕн хъуамӕ уон? 36Афтӕ ма йӕ паддзахимӕ Иорданы онг иу чысыл бауайын фӕндыди дӕ цагъары. Дзӕгъӕлы мӕ кӕны паддзах ахӕм стыр хорзӕхы аккаг. 37Фӕстӕмӕ аздӕхыны бар ратт дӕ цагъарӕн, ӕмӕ мӕхи сахары, мӕ фыд ӕмӕ мӕ мады зӕппадзы цур амӕлон. Фӕлӕ кӕд гӕнӕн ис, уӕд мӕ бардарӕгимӕ, паддзахимӕ, араст уӕд мӕнӕ дӕ цагъар, мӕ фырт Кимхам, ӕмӕ дӕ бар уӕд». 38Паддзах загъта: «Мемӕ рацӕуӕд Кимхам ӕмӕ йын, ды цы зӕгъай, уый сараздзынӕн, цыдӕриддӕр мӕ бацагурай, уый бакӕндзынӕн».

39Паддзах аба кодта Барзиллайӕн, Хуыцауыл ӕй бафӕдзӕхста, ӕмӕ уый йӕ хӕдзармӕ аздӕхт.

Адӕм иууылдӕр Иорданы фаллаг фарсмӕ ахызтысты. Ахызти паддзах дӕр 40ӕмӕ араст ис Гилгалмӕ, Кимхам дӕр йемӕ, афтӕмӕй. Ӕппӕт иудейаг адӕм ӕмӕ израилаг адӕмы ӕмбис цыдысты паддзахы фӕдыл.

Савей сыстади Давиды ныхмӕ

41Израилӕгтӕ паддзахмӕ бацыдысты ӕмӕ йӕ бафарстой: «Сӕхи дӕ цӕмӕн бакодтой не’фсымӕртӕ, иудейӕгтӕ? Паддзахы дӕр, йӕ хӕдзаронты дӕр ӕмӕ йе’ппӕт адӕмы дӕр уыдон цӕмӕн ӕрбахизын кодтой Иорданы ацы фарсмӕ?» 42Иудейӕгтӕ сын дзуапп радтой: «Уымӕн ӕмӕ паддзах махӕн хиондӕр у. Уӕвгӕ ууыл та цы маст кӕнут? Паддзахы хардзӕй минас, мыййаг, фӕкодтам, ӕви нын паддзах исты лӕвӕрттӕ ракодта?» 43Израилӕгтӕ дӕр загътой иудейӕгтӕн: «Махмӕ сымахӕй дӕс хатты фылдӕр бартӕ куы ис, цӕмӕй Давид мах паддзах уа; ноджы ма уӕ хистӕр ӕфсымӕртӕ дӕр куы стӕм, уӕд нӕ цӕмӕн бафхӕрдтат? Нӕ паддзахы фӕстӕмӕ раздахыны охыл дӕр фыццаг ныхас махӕй нӕ рацыди, ӕви?» Фӕлӕ дзыхӕй уӕддӕр иудейӕгтыл нӕ тых кодтой израилӕгтӕ.