2Sa 5 | OssIBT2022 | STEP | Израилы хӕдзарвӕндӕгтӕ иууылдӕр ӕрцыдысты Давидмӕ Хевронмӕ ӕмӕ йын загътой: «Дӕ туг, де стӕг стӕм мах.

‏ 2 Samuel 5

Давид сси ӕппӕт Израилы паддзах

1 Израилы хӕдзарвӕндӕгтӕ иууылдӕр ӕрцыдысты Давидмӕ Хевронмӕ ӕмӕ йын загътой: «Дӕ туг, де стӕг стӕм мах. 2 Амӕй размӕ дӕр, Саул паддзахиуӕг куы кодта, уӕд ды лӕууыдтӕ Израилы ӕфсады сӕргъы. Дунедарӕг дын загъта: „Ды хъахъхъӕндзынӕ Мӕ адӕмы, Израилы, ды уыдзынӕ сӕ фӕтӕг“». 3 Израилы хистӕртӕ ӕмхуызонӕй паддзахмӕ Хевронмӕ ӕрбацыдысты. Уым, Дунедарӕджы раз, паддзах Давид семӕ фидыд сарӕзта, ӕмӕ йӕ Израилӕн паддзахӕй байсӕрстой.

4 Дӕс ӕмӕ ссӕдз азы цыди Давидыл, паддзах куы сси, уӕд, паддзахиуӕг та кодта дыууиссӕдз азы. 5 Хевроны авд азы ӕмӕ ӕхсӕз мӕйы дӕргъы паддзахиуӕг кодта Иудӕйӕн, Йерусалимы та — ӕппӕт Израил ӕмӕ Иудӕйы — ӕртындӕс ӕмӕ ссӕдз азы.

Йерусалим — Давиды сӕйраг сахар

6 Паддзах йӕ хӕстонтимӕ араст Йерусалиммӕ, уымы цӕрӕг йевусӕгты ныхмӕ хӕцынмӕ. Уыдон Давидӕн загътой: «Нӕ дын бантысдзӕн ардӕм ӕрбацӕуын, цалынмӕ куырмытӕ ӕмӕ къуылыхты ардыгӕй аиуварс кӕнай, уӕдмӕ». Уыдон афтӕ ӕнхъӕл уыдысты, Давид сахармӕ нӕ бацӕудзӕн. 7 Фӕлӕ Давид басаста Сионы фидар, ӕмӕ уый ныр Давиды сахар у.

8 Ӕмӕ загъта Давид уыцы бон: «Йевусӕгтимӕ чидӕриддӕр хӕцы, уый сӕ цӕгъдӕд! Давид йе сӕфт уыны „къуылыхтӕ ӕмӕ куырмытӕй“». Уымӕн загъдӕуы: «Куырм ӕмӕ къуылыхӕн Дунедарӕджы хӕдзармӕ фӕндаг нӕй».

9 Давид ӕрцарди фидары, Давиды сахар ӕй схуыдта ӕмӕ йын Миллойӕ мидӕмӕ, фидары онг, йӕ алыварс бӕстыхӕйттӕ сарӕзта. 10 Давиды хъомыс фылдӕрӕй-фылдӕр кодта — Дунедарӕг, Уӕларвӕфсады Бардарӕг, уыди йемӕ.

11 Тиры паддзах Хирам Давидмӕ йӕ минӕвӕртты ӕрбарвыста, семӕ — кедр хъӕдӕрмӕг, ноджы — дурамайджытӕ ӕмӕ хъӕддӕснытӕ, ӕмӕ Давидӕн галуан сарӕзтой. 12 Давид бамбӕрста, Израилӕн ӕй паддзахӕй Дунедарӕг кӕй сӕвӕрдта ӕмӕ йын йӕ паддзахад Израилы, Йӕ адӕмы сӕраппонд кӕй скадджын кодта.

13 Давид Хевронӕй куы ӕрбацыди, уӕд ма Йерусалимы дӕр номылустытӕ ӕмӕ устытӕ скодта, ӕмӕ ма йын уыдонӕй дӕр рацыди фырттӕ ӕмӕ чызджытӕ. 14 Мӕнӕ, Йерусалимы йын чи райгуырд, уыдоны нӕмттӕ: Шаммуа, Шовав, Натан, Соломон, 15 Ивхар, Елишуа, Нефег, Йафиа, 16 Елишама, Елйада, Елифелет.

Давиды уӕлахиз филистимӕгтыл

17 Филистимӕгтӕ фехъуыстой, Давиды Израилӕн паддзахӕй кӕй байсӕрстой, уый ӕмӕ ӕмхуызонӕй йӕ агурӕг фӕраст сты, ӕрцахсӕм ӕй, зӕгъгӕ. Давид уый куы базыдта, уӕд фидары бацыд. 18 Филистимӕгтӕ ссыдысты ӕмӕ Рефаимы дӕлвӕз бацахстой. 19 Давид Дунедарӕджы бафарста: «Филистимӕгты ныхмӕ цӕуон ӕви нӕ? Мӕ къухмӕ сӕ ратдзынӕ?» Дунедарӕг ын загъта: «Цу, ратдзынӕн сӕ дӕ къухмӕ ӕнӕмӕнг».

20 Давид бацыди Баал-Перациммӕ ӕмӕ сӕ уым ныддӕрӕн кодта. Загъта: «Дон йӕ ауӕзт куыд атоны, афтӕ мын мӕ цӕсты раз ме знӕгты ӕнгом рӕнхъытӕ батыдта Дунедарӕг». Уымӕ гӕсгӕ ацы бынат схуыдтой Баал-Перацим ^{▼▼Ома «Дунедарӕг батыдта».} ^{▼▼Баал-Перацим дзуттагау амоны «батынды хицау».}. 21 Филистимӕгтӕн сӕ гуымирытӕ уым дзӕгъӕлӕй баззадысты, ӕмӕ сӕ Давид ӕмӕ йӕ адӕм семӕ рахастой.

22 Филистимӕгтӕ та ногӕй ссыдысты ӕмӕ Рефаимы дӕлвӕз бацахстой. 23 Давид дӕр та Дунедарӕджы бафарста, ӕмӕ йын Уый дзуапп радта: «Сӕ ныхмӕ ма ссу, фӕлӕ сӕ иувӕрсты ӕрзил ӕмӕ тута бӕлӕсты къохы’рдыгӕй сӕ чъылдыммӕ баздӕх. 24 Ӕмӕ, цыма тута бӕлӕсты цъуппытӕй къахуынӕр хъуысы, афтӕ дӕм куы фӕкӕса, уӕд-иу райдай хӕцын — уый Дунедарӕг рацыди дӕ разӕй филистимӕгты ӕфсад цӕгъдынмӕ». 25 Давид сӕххӕст кодта Дунедарӕджы фӕдзӕхст ӕмӕ филистимӕгты дӕрӕн кодта Гевӕйӕ суанг Гезеры онг.