2 Samuel 9
Давид ӕмӕ Мефивошет
1Давид загъта: «Саулы бинонтӕй, цымӕ, ничиуал баззади? Фӕнды мӕ, Ионатаны сӕр хъуыды кӕнгӕйӕ, уымӕн баххуыс кӕнын». 2Саулы хӕдзаронтӕй иу хуынди Цива. Давидмӕ йӕм фӕсидтысты, ӕмӕ йӕ паддзах бафарста: «Цива ды дӕ?» Уый дзуапп радта: «О, ӕз, дӕ цагъар». 3Паддзах та йӕ бафарста: «Ау, Саулы бинонтӕй иу дӕр нал ис? Хуыцауы хорзӕх мӕ куы уаид, уӕд ын ӕз баххуыс кӕнин». Цива йын дзуапп радта: «Ионатанӕн ма иу къуылых лӕппу баззад». 4Паддзах ӕй бафарста: «Кӕм ис?» Цива дзуапп радта: «Ло-Девары, Аммиелы фырт Махиры хӕдзары». 5Уӕд ӕм паддзах Давид арвыста, ӕмӕ йӕ Ло-Деварӕй, Аммиелы фырт Махиры хӕдзарӕй, ӕрбахонын кодта. 6Саулы фырты фырт, Ионатаны фырт Мефивошет бацыди Давидмӕ ӕмӕ йӕ разы йӕ зонгуытыл ӕрхаудис. «Мефивошет!» — сдзырдта йӕм Давид. «Мӕнӕ ис дӕ цагъар», — дзуапп радта уый. 7Давид ын загъта: «Ма тӕрс. Дӕ фыд Ионатаны сӕр хъуыды кӕнгӕйӕ, ӕз дӕуӕн ӕнӕмӕнг хорзы бацӕудзынӕн. Дӕ фыды фыд Саулы зӕххытӕ дын иууылдӕр фӕстӕмӕ ратдзынӕн, дӕхӕдӕг та кӕддӕриддӕр мемӕ ӕмвынг уыдзынӕ». 8Мефивошет та йын ныллӕг акуывта ӕмӕ загъта: «Дӕ цагъар ӕмӕ хӕдмӕл куыдз — иу, уӕд ӕм де’ргом куыд раздӕхтай?» 9Паддзах фӕдзырдта Саулы фӕсдзӕуин Цивамӕ ӕмӕ йын загъта: «Саул ӕмӕ йӕ бинонты къухы цыдӕриддӕр уыди, уыдон дӕ хицауы фыртӕн дӕттын. 10Кус ын йӕ зӕххыл дӕ фырттӕ ӕмӕ дӕ цагъартимӕ ӕмӕ йын йӕ тыллӕг дӕтт, цӕмӕй дӕ хицау мацы хъуаг уа. Дӕ хицауы фырт Мефивошет йӕхӕдӕг та кӕддӕриддӕр мемӕ ӕмвынг уыдзӕнис». (Цивайӕн уыди фынддӕс фырты ӕмӕ йӕм уыд ссӕдз цагъары.) 11Цива паддзахӕн загъта: «Мӕ бардарӕг ӕмӕ мӕ паддзах йӕ цагъарӕн цыдӕриддӕр фӕдзӕхсы, уыдон ӕххӕстгонд уыдзысты». Ныр Мефивошет та паддзахы фырттау Давидимӕ ӕмвынг уыди. 12Мефивошетӕн уыди фырт, нырма чысыл лӕппу, йӕ ном — Миха. Цивайы хӕдзаронтӕ се’ппӕт дӕр лӕггад кодтой Мефивошетӕн. 13Мефивошет царди Йерусалимы, уымӕн ӕмӕ кӕддӕриддӕр паддзахимӕ иу фынгыл бадти. Йӕ дыууӕ къахӕй дӕр къуылых уыдис.
Copyright information for
OssIBT2022