‏ 2 Samuel 12

Натаны уайдзӕф Давидӕн

1Дунедарӕг Давидмӕ барвыста пехуымпар Натаны. Уый йӕм бацыд ӕмӕ йын загъта: «Иу сахары уыди дыууӕ лӕджы, сӕ иу бонджын, иннӕ та мӕгуыр. 2Бонджын лӕгӕн йӕ лыстӕг фос ӕмӕ стурвосӕн нымӕц нӕ уыди, 3мӕгуыр лӕгмӕ та ницы уыд, иунӕг далыс йеддӕмӕ. Уӕрыккӕй йӕ балхӕдта ӕмӕ йӕ афтӕмӕй схаста — мӕгуыр лӕгӕн йӕ сабитимӕ иумӕ бахъомыл. Йемӕ иу къӕбӕр хордта ӕмӕ иу къусӕй нуӕзта, фынӕй дӕр йӕ хъӕбысы кодта. Раст цыма йӕ чызг у, афтӕ йӕм зылди.

4Уӕд дын бонджын лӕгмӕ уазӕгуаты иу бӕлццон бафтыд, ӕмӕ фысымы цӕст нӕ бауарзта йӕ уазӕгӕн йӕхи фыстӕй кӕнӕ галтӕй аргӕвдын, фӕлӕ йын мӕгуыр лӕджы фысы акусарт кодта».

5Давиды маст рафыхти уыцы лӕгмӕ ӕмӕ Натанӕн загъта: «Сомы кӕнын Дунедарӕгӕй, уыцы ми чи бакодта, уый мӕлӕты аккаг у! 6Йӕ фысӕн та йын хъуамӕ цыппар аргъы бафида, уыцы ми кӕй бакодта ӕмӕ йын кӕй нӕ фӕтӕригъӕд кодта, уый тыххӕй».

7Натан Давидӕн загъта: «Уыцы лӕг ды дӕ. Афтӕ зӕгъы Дунедарӕг, Израилы Хуыцау: „Израилӕн дӕ паддзахӕй Ӕз байсӕрстон. Фервӕзын дӕ кодтон Саулы къухӕй, 8дӕ паддзахы хӕдзар ӕмӕ дын йӕ устыты радтон, Израил ӕмӕ дын Иудӕйы дӕ бӕрны бакодтон. Ӕмӕ дын кӕд уый фаг нӕ уыди, уӕд ма дын сӕм иу ахӕм бафтыдтаин. 9Цӕмӕн суӕлӕхох дӕ Дунедарӕджы дзырдыл ӕмӕ Йын ӕнӕуынон цы у, уый цӕмӕн бакодтай? Хеттаг Уриайы мӕлӕтмӕ радтай, аммонӕгты къухӕй йӕ амардтай ӕмӕ йын йӕ усы дӕхи бакодтай. 10Ныр мыггагмӕ дӕ хӕдзар кардӕй нал сӕдас уыдзӕни, ды Мӕныл кӕй суӕлӕхох дӕ ӕмӕ хеттаг Уриайы усы кӕй байстай, уый тыххӕй“. 11Афтӕ зӕгъы Дунедарӕг: „Ӕз дын афтӕ бакӕндзынӕн, ӕмӕ дӕм бӕллӕх дӕхи хӕдзарӕй ӕрбабырсдзӕн. Дӕ устыты дын дӕ цурӕй ракӕндзынӕн, искӕй фыццаг сӕ скӕндзынӕн, ӕмӕ уый бон-сихорафон семӕ ӕрӕмуат уыдзӕни. 12Ды уый сусӕгӕй бакодтай, Ӕз та дын уыцы хъуыддаг ӕппӕт Израилы раз боны рухсмӕ сараздзынӕн“».

13«Тӕригъӕды бацыдтӕн Дунедарӕджы раз», — загъта Давид Натанӕн. «Дунедарӕг дын ӕй ныххатыр кодта. Нӕ амӕлдзынӕ. 14Фӕлӕ Дунедарӕджы кӕй айрох кодтай, уый тыххӕй дӕ ноггуырд фырт амӕлдзӕн».

Давид ӕмӕ Вирсавийы ноггуырд сабийы мӕлӕт

15Натан йӕ хӕдзармӕ ацыд, ӕмӕ Дунедарӕджы азар, Уриайы ус Давидӕн кӕй ныййардта, уыцы сабийы баййӕфта. Саби ӕррынчын ис. 16Давид сабийы тыххӕй Хуыцаумӕ куывта, ком дардта, зӕххыл хаудӕй ӕрвыста йе’хсӕв. 17Йӕ хистӕр лӕггадгӕнджытӕ-иу йӕ уӕлхъус ӕрлӕууыдысты, зӕххӕй йӕ сыстын кӕнӕм, зӕгъгӕ, фӕлӕ сын уый нӕ куымдта ӕмӕ семӕ комдзаг дӕр нӕ кодта. 18Ӕвдӕм бон саби амарди, фӕлӕ йӕ Давидӕн зӕгъын йӕ дӕлдӕртӕ нӕ уӕндыдысты. Дзырдтой: «Саби ма ӕгас куы уыд, уӕд нӕм куы нӕ хъуыста, уӕд ын ныр, амарди, зӕгъгӕ, куыд зӕгъӕм? Исты фыдбылыз сараздзӕн».

19Йӕ дӕлдӕрты сусу-бусу кӕнгӕ куы федта, уӕд Давид бамбӕрста, саби кӕй амарди, уый, ӕмӕ сӕ бафарста: «Амарди саби?» Дзуапп ын радтой: «Амарди». 20Уӕд Давид зӕххӕй сыстади, йӕхи цӕхсадта, сойӕ йӕхи байсӕрста, йӕ дарӕс раивта, Дунедарӕджы хӕдзармӕ ацыд ӕмӕ зоныгуылӕй куывта. Йӕ галуанмӕ куы’рбаздӕхти, уӕд хӕринаг ӕрцагуырдта ӕмӕ бахордта.

21Йӕ дӕлдӕртӕ йӕ бафарстой: «Афтӕ цӕмӕн кӕныс? Саби ма ӕгас куы уыди, уӕд ком дардтай ӕмӕ куыдтай, куы амарди, уӕд та сыстадтӕ ӕмӕ къӕбӕр бахордтай». 22Давид загъта: «Саби удӕгас цалынмӕ уыд, уӕдмӕ ком дардтон ӕмӕ куыдтон, уымӕн ӕмӕ ӕнхъӕл уыдтӕн, кӕд мын Дунедарӕг фӕтӕригъӕд кӕнид, ӕмӕ саби удӕгасӕй баззаид, зӕгъгӕ. 23Фӕлӕ ныр амард, ӕмӕ ма цӕй тыххӕй дарон ком? Исты ма йӕ раздахын мӕ бон у? Ӕз ӕм мӕхӕдӕг ацӕудзынӕн, уый мӕм нал раздӕхдзӕн».

Соломоны райгуырд

24Давид йӕ усӕн, Вирсавийӕн, ныфсытӕ бавӕрдта. Бацыди йӕм ӕмӕ йемӕ ӕрӕмуат ис. Уый йын ныййардта фырт, ӕмӕ йыл Давид сӕвӕрдта ном Соломон. Дунедарӕгӕн Соломон фӕуарзон ис 25ӕмӕ пехуымпар Натаны барвыста, цӕмӕй йыл уый, Дунедарӕджы фӕндонмӕ гӕсгӕ, сӕвӕра ном Йедидйа ▼

▼Йедидйа дзуттагау амоны «Дунедарӕджы уарзон».

.

Аммонӕгты басаст

26Ныр Йоав та аммонӕгты сахар Равва басӕттыныл дарддӕр архайдта ӕмӕ паддзахы фидар бацахста. 27Йоав фӕдисӕттӕ арвыста Давидмӕ, цӕмӕй йын зӕгъой: «Ӕз хӕцыдтӕн Раввайы ныхмӕ, ӕмӕ уал мӕ къухы сахары дон бафтыди. 28Ныр ды ӕрбамбырд кӕн, Израилы ма хӕстхъомӕй чи ис, уыдоны, сахарыл ӕрхъула кӕн ӕмӕ йӕ райс, науӕд ӕй ӕз райсдзынӕн, ӕмӕ кад иууылдӕр мӕн фӕуыдзӕн». 29Давид ӕфсад ӕрбамбырд кодта, Раввайы ныхмӕ хӕцынмӕ ацыд ӕмӕ йӕ бацахста. 30Сӕ паддзахы сӕрӕй сын, ӕрмӕст йӕ сыгъзӕрин дӕр иу таланты уӕзӕн кӕмӕн уыд, йӕ уыцы налхъуыт-налмасӕй фӕлыст кады худ фелвӕста ӕмӕ йӕ йӕхи сӕрыл ӕркодта. Сахарӕй тынг бирӕ ӕфтиаг рахаста. 31Адӕмӕй дзы чи уыди, уыдоны та ракодта ӕмӕ сӕ хырхытӕ, ӕфсӕйнаг къахӕнтӕ ӕмӕ фӕрӕттӕй кусыныл бафтыдта. Батардта сӕ агуыридур аразынмӕ. Афтӕ бакодта ӕппӕт аммонаг сахартӕн дӕр. Уый фӕстӕ йе’фсадимӕ Йерусалиммӕ ӕрбаздӕхт.