‏ Daniel 2

Навуходоносоры фыццаг фын

1Вавилойнаг паддзах Навуходоносор дыккаг аз паддзахиуӕг куы кодта, уӕд федта ӕнахуыр фын. Уыйадыл катайы бацыд ӕмӕ йӕ хуыссӕг нал ахста. 2Паддзах фӕсидти кӕлӕнгӕнджытӕ, дӕсныфӕрсджытӕ, стъалыдӕснытӕ ӕмӕ халдейаг куырыхонтӕм. Куы ӕрбацыдысты ӕмӕ йӕ разы куы ӕрлӕууыдысты, уӕд сын 3паддзах загъта: «Ӕз федтон фын ӕмӕ тыхсын, уымӕн ӕмӕ йӕ мӕ бон бамбарын нӕу». 4Халдейаг куырыхонтӕ паддзахӕн дзуапп радтой арамейаг ӕвзагыл: «Паддзах, бирӕ азты нын дзӕбӕхӕй цӕр! Мах стӕм дӕ цагъартӕ. Радзур нын дӕ фын, ӕмӕ дын, цы амоны, уый зӕгъдзыстӕм». 5Паддзах халдейӕгтӕн загъта: «Мӕ ныхасӕн ивӕн нӕй! Мӕ фын цы амоны, уый мын куынӕ зӕгъат, уӕд уӕ уӕнггай скӕндзысты, уӕ хӕдзӕрттӕ та уын хӕлддзӕгты кӕритӕ фестын кӕндзысты! 6Фӕлӕ мын мӕ фын куы радзурат ӕмӕ мын, цы нысан кӕны, уый куы зӕгъат, уӕд уын хӕрзиуджытӕ ратдзынӕн ӕмӕ уын стыр кад скӕндзынӕн. Мӕ фын цы амоны, уый мын зӕгъут!» 7Уыдон ын ногӕй загътой: «Паддзах, мах дӕ цагъартӕ стӕм. Радзур нын дӕ фын, ӕмӕ дын уӕд, цы амоны, уый зӕгъдзыстӕм». 8– 9Паддзах сын загъта: «Ныр ӕз бамбӕрстон, фӕдфӕливӕнтӕ кӕй кӕнут, уый. Мӕ бардзырд нӕ аивдзынӕн, уый уынут ӕмӕ зонут: мӕ фын мын куынӕ райхалат, уӕд уӕм ӕнхъӕлмӕ кӕсы ӕрмӕстдӕр иу тӕрхон! Баныхас кодтат ӕмӕ мын гӕды ныхӕстӕ кӕнут, ома кӕд исты хуызы фервӕзиккам. Радзурут мын мӕ фын, ӕмӕ мӕ уӕд бауырндзӕн, уӕ бон ӕй райхалын кӕй у, уый!»

10Куырыхонтӕ паддзахӕн загътой: «Зӕххыл никӕй бон бауыдзӕн паддзахы домӕн сӕххӕст кӕнын. Иу номдзыд ӕмӕ хъомысджын паддзах дӕр дӕсныфӕрсджытӕ, кӕлӕнгӕнджытӕ ӕмӕ стъалыдӕснытӕм ахӕм фарст никуыма радта. 11Паддзахы фарст ахӕм зын у, ӕмӕ йын, хуыцӕутты йеддӕмӕ, дзуапп ничи ратдзӕн, фӕлӕ уыдон адӕмимӕ нӕ цӕрынц». 12Уыцы ныхӕстӕм паддзах фыр мӕстӕй тӕгӕлтӕ хаудта ӕмӕ бардзырд радта, Вавилоны куырыхонты иууылдӕр ныццӕгъдут, зӕгъгӕ.

13Куырыхонты амарыны бардзырд куы рацыд, уӕд Даниил ӕмӕ йе’мбӕлттӕм дӕр ӕнхъӕлмӕ касти мӕлӕт. 14– 15Паддзах вавилойнаг куырыхонты амарын бабар кодта Ариохӕн, паддзахы хъахъхъӕнджыты хицауӕн. Даниил Ариохмӕ бацыд ӕмӕ йӕ бафарста: «Паддзах ахӕм карз тӕрхон цӕмӕн рахаста?» Уый Даниилӕн хъуыддаг бамбарын кодта. 16Уӕд Даниил паддзахмӕ бацыд ӕмӕ фын райхалынӕн рӕстӕг ракуырдта.

Хуыцау Навуходоносоры фын раргом кодта

17Даниил ӕрбацыди йӕ хӕдзармӕ ӕмӕ йе’мбӕлттӕн, Хананиа, Мишаел ӕмӕ Азариайӕн, хабар бамбарын кодта: 18Уӕларвон Хуыцауӕй хорзӕх курӕнт, цӕмӕй сын фыны сусӕгдзинад раргом кӕна ӕмӕ сӕ Вавилоны иннӕ куырыхонтимӕ ма амарой. 19Уыцы ӕхсӕв Даниил федта цӕстылуайӕн, ӕмӕ йын сусӕгдзинад раргом чындӕуыд.

Даниил Хуыцауӕн арфӕ ракодта: 20«Хуыцауы ном арфӕгонд уӕд мыггагмӕ! Уымӕ ис хъару ӕмӕ уӕлзонд! 21Йӕ фӕндонӕй замантӕ заманты ивынц; адӕймагӕй паддзах дӕр Уый скӕны, йӕ бынатӕй дӕр ӕй Уый сисы; куырыхонтӕн ратты уӕлзонд, ӕмбаргӕты схайджын кӕны зондӕй. 22Ды раргом кӕныс арф сусӕгтӕ, талынджы Дӕ ницы ис бамбӕхсӕн. Ды кӕм дӕ, уым ӕппынӕдзухӕй рухс у.

23Кад ӕмӕ Дын арфӕ кӕнын, мӕ фыдӕлты Хуыцау! Радтай мын хъару ӕмӕ уӕлзонд! Сӕххӕст нын кодтай нӕ курдиат — паддзахы фын нын раргом кодтай».

Паддзахы фын

24Уый фӕстӕ Даниил ацыдис Ариохмӕ, паддзах вавилойнаг куырыхонты кӕмӕн марын кодта, уымӕ ӕмӕ йын загъта: «Ма амар вавилойнаг куырыхонты. Бакӕн мӕ паддзахмӕ, ӕмӕ йын ӕз, йӕ фын цы амоны, уый зӕгъдзынӕн». 25Ариох Даниилы уайтагъд паддзахы раз балӕууын кодта ӕмӕ загъта: «Паддзах! Иудейӕ кӕй ӕрбакодтой, уыцы хаст адӕмы’хсӕн иу лӕджы ссардтон. Уый дын, дӕ фын цы амоны, уый радзурдзӕн».

26Уӕд паддзах, Белтешацар кӕй хуыдтой, уыцы Даниилы бафарста: «Дӕуӕн дӕ бон ӕцӕг у мӕ фын радзурын ӕмӕ, цы амоны, уый зӕгъын?» 27Даниил паддзахӕн дзуапп радта: «Паддзах цы сусӕгдзинадӕй фӕрсы, уый йын куырыхонтӕ, кӕлӕнгӕнджытӕ, дӕсныфӕрсджытӕ ӕмӕ стъалыдӕснытӕ нӕ раргом кӕндзысты. 28Фӕлӕ уӕлӕрвты ис сусӕгтӕ Ӕргомгӕнӕг Хуыцау, ӕмӕ Уый паддзах Навуходоносорӕн раргом кодта, рӕстӕджы кӕрон цы ӕрцӕудзӕнис, уыдӕттӕ.

29Паддзах, ӕхсӕвыгон сагъӕсы куы бацыдтӕ, уӕд дын сусӕгтӕ Ӕргомгӕнӕг фенын кодта фидӕны цаутӕ. 30Паддзах, ӕз дунейы ӕппӕтӕй зондджындӕр нӕ дӕн. Ацы сусӕгдзинад мын уымӕн раргом ис, цӕмӕй дын дӕ фын райхалон, ӕмӕ дӕ цы тыхсын кӕны, уый бамбарай.

31Паддзах, мӕнӕ цы федтай: дӕ разы лӕууыдис егъау гуымиры, ӕвирхъау ӕрттывд кодта ӕмӕ йӕ уындӕй тас ӕфтыдта. 32Йӕ сӕр уыди сыгъдӕг сыгъзӕринӕй, йӕ риу ӕмӕ йӕ къухтӕ — ӕвзистӕй, йӕ гуыбын ӕмӕ йӕ синтӕ — ӕрхуыйӕ, 33йӕ зӕнгтӕ — ӕфсӕнӕй, йӕ фадтӕ та — ӕлыгӕй. 34Уалынджы хохӕй йӕхи ӕгъдауӕй дур фӕхицӕн ис, гуымирыйы ӕлыг ӕмӕ ӕфсӕйнагӕй конд къӕхтыл ӕрхаудис ӕмӕ сӕ ныззыгуым кодта. 35Ӕмӕ уӕд ӕфсӕн, ӕлыг, ӕрхуы, ӕвзист ӕмӕ сыгъзӕрин нызгъӕлӕнтӕ сты. Дымгӕ сӕ сӕрдыгон мусы зыгуымау ахаста, ӕмӕ сӕ фӕд дӕр нал фӕзынди. Гуымирыйыл цы дур ӕрхауди, уый та фестади, зӕхх ӕгасӕй дӕр чи бацахста, ахӕм хох.

36Уый уыди дӕ фын. Ныр та паддзахӕн радзурдзынӕн, цы амоны, уый.

37Паддзах! Ды дӕ паддзӕхты паддзах! Уӕларвон Хуыцау дӕ скодта паддзахад, хъомыс, тых ӕмӕ кады аккаг, 38ӕгас дунейы дӕ адӕм, зӕххон сырдтӕ ӕмӕ уӕларвон мӕргътӕн хицау скодта. Сыгъзӕрин сӕр ды дӕ! 39Дӕ фӕстӕ фӕзындзӕн ӕндӕр, лӕмӕгъдӕр, паддзахад, уый фӕстӕ та ӕртыккаг — ӕрхуы паддзахад. Йӕ паддзах ӕгас зӕххыл паддзахиуӕг кӕндзӕн. 40Цыппӕрӕм паддзахад ӕфсӕйнагау фидар уыдзӕн. Ӕфсӕйнаг алцы куыд ныппырх ӕмӕ ныззыгуым кӕны, афтӕ уый дӕр, йӕ размӕ цы паддзахӕдтӕ уыди, уыдон ныддӕрӕн кӕндзӕн. 41Къӕхтӕ ӕмӕ къахы ӕнгуылдзтӕ ӕлыг ӕмӕ ӕфсӕнӕй конд кӕй уыдысты, уый та, паддзахад кӕй ныддихтӕ уыдзӕн, уый амоны. Хӕрз чысыл рӕстӕг ӕфсӕнвидар уыдзӕн, уымӕн ӕмӕ ӕфсӕн ӕмӕ ӕлыг ӕмхӕццӕйӕ федтай. 42Кӕм фидар уыдзӕн, кӕм та — лӕмӕгъ, къахы фадтӕ ӕфсӕн ӕмӕ ӕлыгӕй конд кӕй уыдысты, уымӕ гӕсгӕ. 43Ӕфсӕйнаг ӕмӕ ӕлыг фӕрсӕй-фӕрстӕм куыд уыдысты, афтӕ паддзахады хӕйттӕ дӕр иудзинадмӕ тырндзысты ӕмӕ сӕ чызджыты кӕрӕдзимӕ моймӕ дӕтдзысты, фӕлӕ, ӕфсӕйнаг ӕлыгимӕ куыд нӕ баиу уыдзӕн, афтӕ уыдонмӕ дӕр иудзинад никуы фӕзындзӕн. 44Ацы паддзахӕдты заман Уӕларвон Хуыцау сырӕзын кӕндзӕн мыггагмӕйы паддзахад. Уыцы паддзахадыл ӕндӕр адӕмтӕ никуы фӕуӕлахиз уыдзысты, никуы фесӕфдзӕн. Йӕ размӕ цы паддзахӕдтӕ уыди, уыдоны ныззыгуым кӕндзӕн, йӕхӕдӕг та лӕудзӕнис ӕнусмӕ. 45Ды уый тыххӕй федтай, хохӕй йӕхи ӕгъдауӕй дур куыд фӕхицӕн ис ӕмӕ ӕфсӕйнаг, ӕрхуы, ӕлыг, ӕвзист ӕмӕ сыгъзӕрин куыд базгъӕлӕнтӕ сты, уый. Гъе, афтӕ стыр Хуыцау паддзахӕн базонын кодта фидӕны цаутӕ. Фыны цыдӕриддӕр федтай, уыдон ӕнӕмӕнг сӕххӕст уыдзысты, ӕмӕ дын дӕ фын раст кӕй райхӕлдтон, ууыл гуырысхо ма кӕн».

Паддзах Даниилы схорзӕхджын кодта

46Уӕд паддзах Навуходоносор Даниилы раз зӕххыл ныддӕлгом ис ӕмӕ бардзырд радта, цӕмӕй йӕ хуынтӕй сбуц кӕной, йӕ номыл ын буд ссудзой. 47Паддзах загъта Даниилӕн: «Уӕ Хуыцау ӕцӕг у хуыцӕутты Хуыцау, паддзӕхты Паддзах ӕмӕ сусӕгтӕ Ӕргомгӕнӕг, уый тыххӕй ӕмӕ ды ацы сусӕгдзинад раргом кодтай». 48Уый фӕстӕ паддзах Даниилы ноджы уӕлдӕр систа, бирӕ зынаргъ лӕвӕрттӕ йын ракодта ӕмӕ йӕ ӕппӕт Вавилонийы хицауӕй сӕвӕрдта. Даниил сси вавилойнаг куырыхонты сӕргълӕууӕг. 49Даниилы курдиатмӕ гӕсгӕ паддзах Вавилоны зылды хъуыддӕгтӕ иууылдӕр бабар кодта Шадрах, Мешах ӕмӕ Авед-Негойӕн, Даниил та раздӕрау паддзахы галуаны лӕггад кодта.