Deuteronomy 27
Ӕгъдауы ныхӕстӕ — нывондхӕссӕны дуртыл
1Ӕмӕ, израилӕгты хистӕртӕ йемӕ, афтӕмӕй загъта адӕмӕн Моисей: «Абон уын ӕз цыдӕриддӕр фӕдзӕхсын, уыдон ӕххӕст кӕнут. 2Дунедарӕг, уӕ Хуыцау, сымахӕн кӕй дӕтты, уыцы бӕстӕм куы ахизат Иорданы фаллаг фарсмӕ, уӕд дзы стыр дуртӕ сӕвӕрут ӕмӕ сӕ чъырӕй сцӕгъдут. 3Фаллаг фарсмӕ куы бахизат, Дунедарӕг, уӕ Хуыцау, сымахӕн кӕй дӕтты, ӕхсыр ӕмӕ мыд кӕцӕй хъары, уыцы зӕхмӕ бацӕуыны охыл, Дунедарӕг, уӕ фыдӕлты Хуыцау, сымахӕн зӕрдӕ куыд бавӕрдта, афтӕ, уӕд-иу сыл ацы Ӕгъдауы ныхӕстӕ иууылдӕр ныффыссут. 4Иорданы фаллаг фарсмӕ куы ахизат, уӕд, цы дуртӕй уын зӕгъын, уыдон Эвалы хохы сӕр сӕвӕрут ӕмӕ сӕ чъырӕй сцӕгъдут. 5Уыцы ран Дунедарӕгӕн, уӕ Хуыцауӕн, нывондхӕссӕн саразут, ӕфсӕйнаг кӕуыл нӕ андзӕвыди, ахӕм дуртӕй. 6Ӕнӕвнӕлд дуртӕй скӕнут нывондхӕссӕн Дунедарӕгӕн, уӕ Хуыцауӕн, ӕмӕ йыл хӕссут иууылсудзинаг нывӕндтӕ Дунедарӕгӕн, уӕ Хуыцауӕн. 7Фидыды нывӕндтӕ хӕссут ӕмӕ хӕрут, цин кӕнут Дунедарӕджы, уӕ Хуыцауы, раз. 8Дзӕбӕх куыд зыной ӕмӕ сын ӕнцонӕй равзарӕн куыд уа, афтӕ ныффыссут дуртыл ацы Ӕгъдауы ныхӕстӕ». 9Моисей, сауджын левиттӕ йемӕ, афтӕмӕй загъта ӕгас Израилӕн: «Лӕмбынӕг хъусут, израилӕгтӕ! Абон сымах баистут Дунедарӕджы, уӕ Хуыцауы, адӕм. 10Хъусут уӕдӕ Дунедарӕгмӕ, уӕ Хуыцаумӕ, ӕмӕ ӕххӕст кӕнут, абон уын кӕй дзурын, Йӕ уыцы фӕдзӕхстытӕ ӕмӕ фӕтк».Арфӕтӕ ӕмӕ ӕлгъыстытӕ дзурыны фӕтк
11Уыцы бон Моисей бафӕдзӕхста адӕмӕн: 12«Иорданы сӕрты куы ахизат, уӕд Симеон, Левий, Иудӕ, Иссахар, Йосеф ӕмӕ Бениамины мыггӕгтӕ хъуамӕ Геризимы хохыл ӕрлӕууой ӕмӕ адӕмӕн арфӕ ракӕной. 13Рувим, Гад, Асир, Зевулон, Дан ӕмӕ Неффалимы мыггӕгтӕ та Эвалы хохыл хъуамӕ ӕрлӕууой ӕмӕ сӕ фелгъитой. 14Левиттӕ хъуамӕ хъӕлӕсыдзагӕй ныхъхъӕр кӕной ӕмӕ фехъусын кӕной ӕппӕт израилӕгтӕн: 15„Ӕлгъыст фӕуӕд, Дунедарӕгӕн ӕлгъаг чи у, ахӕм гуымиры чи сараза, ӕрмдӕсныйы конд гуымиры сусӕгӕй чи сӕвӕра, уый!“Адӕм та иууылдӕр иумӕ зӕгъӕнт: „Аммен!“ 16„Ӕлгъыст фӕуӕд, йӕ фыды кӕнӕ йӕ мады чи бафхӕра, уый!“Адӕм та иууылдӕр иумӕ зӕгъӕнт: „Аммен!“ 17„Ӕлгъыст фӕуӕд, йӕ сыхаджы арӕныл фалдӕр чи ахӕца!“ Адӕм та иууылдӕр иумӕ зӕгъӕнт: „Аммен!“ 18„Ӕлгъыст фӕуӕд, куырм адӕймаджы галиу фӕндагмӕ чи аздаха, уый!“ Адӕм та иууылдӕр иумӕ зӕгъӕнт: „Аммен!“ 19„Ӕлгъыст фӕуӕд, ӕрцӕуӕггаг, сидзӕр ӕмӕ сидзӕргӕсы бартӕ йӕ къӕхты бын чи кӕна, уый!“ Адӕм та иууылдӕр иумӕ зӕгъӕнт: „Аммен!“ 20„Ӕлгъыст фӕуӕд, йӕ фыды усимӕ ӕмуат чи ӕрцӕуа, йӕ фыды чи фегад кӕна, уый!“ Адӕм та иууылдӕр иумӕ зӕгъӕнт: „Аммен!“ 21„Ӕлгъыст фӕуӕд, фосимӕ чи схуысса, уый!“ Адӕм та иууылдӕр иумӕ зӕгъӕнт: „Аммен!“ 22„Ӕлгъыст фӕуӕд, йӕ хӕрз хоимӕ кӕнӕ мадӕй иу, фыдӕй хицӕн, йе та фыдӕй иу, мадӕй хицӕн цы хоимӕ сты, уыимӕ ӕмуат чи ӕрцӕуа, уый!“ Адӕм та иууылдӕр иумӕ зӕгъӕнт: „Аммен!“ 23„Ӕлгъыст фӕуӕд, йӕ усы мадимӕ ӕмуат чи ӕрцӕуа, уый!“ Адӕм та иууылдӕр иумӕ зӕгъӕнт: „Аммен!“ 24„Ӕлгъыст фӕуӕд, сусӕгӕй искӕй чи амара!“Адӕм та иууылдӕр иумӕ зӕгъӕнт: „Аммен!“ 25„Ӕлгъыст фӕуӕд, искӕй амарын ӕмӕ ӕнаххос адӕймаджы туг ныккалыны тыххӕй гӕртам чи райса, уый!“Адӕм та иууылдӕр иумӕ зӕгъӕнт: „Аммен!“ 26„Ӕлгъыст фӕуӕд, ацы Ӕгъдау чи нӕ нымайа ӕмӕ йын йӕ алы ныхас дӕр чи не’ххӕст кӕна, уый!“Адӕм та иууылдӕр иумӕ зӕгъӕнт: „Аммен!“
Copyright information for
OssIBT2022