Deu 30 | OssIBT2022 | STEP | Ӕппӕт ацы арфӕтӕ ӕмӕ ӕлгъыстытӕ уыл куы ӕрцӕуой, Дунедарӕг уӕ, уӕ Хуыцау, ӕппӕт адӕмты’хсӕн куы ныххӕлиу кӕна ӕмӕ, се’хсӕн ӕрцӕргӕйӕ, уӕхи куы ӕрӕмбарат,

‏ Deuteronomy 30

Израилы фидӕн йӕ бирӕ фыдӕвзарӕнты фӕстӕ

1 Ӕппӕт ацы арфӕтӕ ӕмӕ ӕлгъыстытӕ уыл куы ӕрцӕуой, Дунедарӕг уӕ, уӕ Хуыцау, ӕппӕт адӕмты’хсӕн куы ныххӕлиу кӕна ӕмӕ, се’хсӕн ӕрцӕргӕйӕ, уӕхи куы ӕрӕмбарат, 2 Дунедарӕгмӕ, уӕ Хуыцаумӕ, куы раздӕхат, сымах дӕр ӕмӕ уӕ цот дӕр Йӕ коммӕ куы кӕсат ӕмӕ уын абон цыдӕриддӕр фӕдзӕхсын, уыдон зӕрдиагӕй куы ӕххӕст кӕнат, 3 уӕд уын Дунедарӕг, уӕ Хуыцау, ныххатыр кӕндзӕн, уӕ раздӕры ӕдыхст цард уын фӕстӕмӕ раздахдзӕн, дунейы адӕмты’хсӕнӕй уӕ ӕрӕмбырд кӕндзӕн, 4 Арвы кӕрон куы ныххӕлиу уа уӕ хъӕстӕ, уӕд дӕр уӕ ӕрбаиу кӕндзӕни Дунедарӕг, уӕ Хуыцау, ӕмӕ уӕ фӕстӕмӕ ӕрбаздахдзӕн. 5 Ӕркӕндзӕни уӕ Дунедарӕг, уӕ Хуыцау, уӕ фыдӕлты бӕстӕм, ӕмӕ йӕ уӕхи бакӕндзыстут. Дунедарӕджы хорзӕхӕй даргъ-уӕрӕх ацӕудзӕн уӕ мыггаг, уӕ фыдӕлтӕй фӕфылдӕр уыдзыстут.

6 Дунедарӕг, уӕ Хуыцау, сунӕт скӕндзӕн уӕ зӕрдӕтӕн, стӕй уӕ байзӕддӕгты зӕрдӕтӕн дӕр, цӕмӕй Дунедарӕджы, уӕ Хуыцауы, уарзат ӕппӕт зӕрдӕйӕ ӕмӕ баззайат сӕрӕгасӕй. 7 Уӕд Дунедарӕг, уӕ Хуыцау, ацы ӕлгъыстытӕ иууылдӕр уе знӕгты, чи уӕ нӕ уарзы ӕмӕ уӕ фӕдыл чи зылд, уыдоны ныхмӕ сараздзӕн. 8 Сымах та ногӕй Дунедарӕджы коммӕ кӕсдзыстут ӕмӕ Йын ӕххӕст кӕндзыстут Йе’ппӕт фӕдзӕхстытӕ, абон уын ӕз кӕй хъусын кӕнын, уыдон. 9 Дунедарӕг, уӕ Хуыцау, сымахӕн алцыдӕр парахатӕй ратдзӕн, уӕ алы хъуыддаг дӕр уыдзӕни ӕнтыстджын; уӕ байзӕддаг, уӕ фосы зӕйц ӕмӕ уӕ зӕххы тыллӕг арфӕгонд уыдзысты. Йӕ хорзӕхтӕ уын лӕвар кӕнгӕйӕ, Дунедарӕг ногӕй цин кӕндзӕни, уӕ фыдӕлтыл куыд цин кодта, афтӕ, 10 Дунедарӕджы, уӕ Хуыцауы, коммӕ куы кӕсат, ацы Ӕгъдауы чиныджы цы фӕдзӕхстытӕ ӕмӕ уагӕвӕрдтӕ фыст ис, уыдон куы ӕххӕст кӕнат, Дунедарӕгмӕ, уӕ Хуыцаумӕ, ӕппӕт зӕрдӕйӕ ӕмӕ ӕппӕт уды хъаруйӕ уе’ргом куы раздахат, уӕд.

11 Абон уын ӕз цы фӕдзӕхстытӕ дӕттын, уыдон, уӕ зонд цӕмӕ сӕххӕсса, уымӕй уӕлдӕр не сты, ӕгӕр дард дӕр не сты сымахӕй. 12 Уӕларвы не сты, цӕмӕй афтӕ зӕгъат, уӕларвмӕ чи ссӕудзӕн ӕмӕ нын сӕ чи ӕрхӕсдзӕн, цӕмӕй сӕ мах ӕххӕст кӕнӕм, зӕгъгӕ. 13 Фӕсденджыз не сты, цӕмӕй афтӕ зӕгъат, чи фӕцӕудзӕн мах тыххӕй фӕсденджызмӕ ӕмӕ нын сӕ чи ӕрбахӕсдзӕн, цӕмӕй сӕ мах ӕххӕст кӕнӕм, зӕгъгӕ. 14 Тынг хӕстӕг уӕм сты уыдон — уӕ дӕлӕвзаг ӕмӕ уӕ зӕрдӕйы рӕбын, ӕмӕ сӕ уӕ бон ӕххӕст кӕнын у.

Адӕймагӕн йӕ фидӕн йӕхицӕй аразгӕ у

15 Ӕз уын абон уӕ разы ӕвӕрын: цард ӕмӕ фарн кӕнӕ — мӕлӕт ӕмӕ фыдбӕллӕх. 16 Абон уын куыд зӕгъын, афтӕ Дунедарӕджы, уӕ Хуыцауы, куы уарзат, Йӕ фӕндӕгтыл куы цӕуат ӕмӕ Йын Йӕ фӕдзӕхстытӕ, Йӕ фӕтк ӕмӕ Йӕ уагӕвӕрдтӕ куы ӕххӕст кӕнат, уӕд цӕрдзыстут ӕмӕ сбирӕ уыдзыстут; Дунедарӕгӕй, уӕ Хуыцауӕй, арфӕгонд уыдзыстут, уӕхи бакӕнынмӕ цы бӕстӕм цӕут, уым. 17 Фӕлӕ Йыл уӕхи куы атигъ кӕнат, Йӕ коммӕ куынӕ кӕсат, куы адзӕгъӕл уат ӕмӕ ӕндӕр хуыцӕуттӕм кувын ӕмӕ сын лӕггад кӕнын куы райдайат, 18 уӕд — ӕз уын ӕй абон зӕгъын — фесӕфдзыстут. Иорданы фаллаг фарс уӕхи цы бӕстӕ бакӕндзыстут, уым бирӕ нӕ фӕцӕрдзыстут. 19 Абон мын арв ӕмӕ зӕхх ӕвдисӕнтӕ уӕнт уӕ разы, цард кӕнӕ мӕлӕт, арфӕ кӕнӕ уын ӕлгъыст хъардтон. Равзарут цард, ӕмӕ цӕрын бантысдзӕн сымахӕн дӕр ӕмӕ уӕ байзӕддӕгтӕн дӕр, 20 уарзут Дунедарӕджы, уӕ Хуыцауы, хъусут Ӕм ӕмӕ Йыл уӕ зӕрдӕ ма ивут, уымӕн ӕмӕ Уымӕй аразгӕ у уӕ цард, уӕ цӕрӕнбон, Дунедарӕг нӕ фыдӕлтӕ Авраам, Исаак ӕмӕ Йаковӕн цы бӕстӕ раттыныл басомы кодта, уым».