Ecclesiastes 4
1Ӕз федтон, ӕфхӕрд адӕм куыд кӕуынц, уый, ничи сын ӕххуыс кӕны, уымӕн ӕмӕ се’фхӕрджытӕ тыхджын сты. 2Ӕмӕ уӕд мӕрдты удӕгӕстӕй амондджындӕр схуыдтон. 3Сӕ дыууӕтӕй хуыздӕр раны та ис, чи нӕма райгуырд ӕмӕ, арвы бын цы фыдбылызтӕ цӕуы, уый чи нӕма базыдта. 4Ноджы ма федтон: адӕм кусынц ӕмӕ истӕуыл архайынц, кӕрӕдзимӕ хӕлӕг кӕй кӕнынц, уымӕн. Фӕлӕ уыдӕттӕ дӕр аивгъуыйынц, дымгӕ’рцахсыныл куы архайай, уымӕй уӕлдай не сты! 5Афтӕ фӕзӕгъынц: «Ӕдылы магуса у ӕмӕ сыдӕй мӕлдзӕнис». 6Фӕлтау дӕм армыдзаг исты уӕд ӕмӕ ӕнӕмастӕй цӕр, дыууӕ армыдзаджы тыххӕй амал кӕныны ӕмӕ дымгӕйы фӕдыл зилыны бӕсты! 7Ноджы ма иу ӕнӕпайда ӕмӕ, чи аивгъуыйы, ахӕм хъуыддаг федтон зӕххыл: 8кӕмӕндӕр нӕ — ӕрдхорд, нӕ — ӕмбал, нӕ йын — фырт, нӕ — ӕфсымӕр, афтӕмӕй ӕхсӕвӕй-бонӕй ӕвӕлмӕцгӕйӕ кусы, фӕлӕ ӕфтиаджы фыдӕй, кӕм ӕрлӕууа, уый нӕ зоны. Цӕмӕн ӕмӕ кӕмӕн кусы, уый бӕрӕг нӕй. Уый дӕр та аивгъуыйы, стыр бӕллӕх у уый дӕр! 9Ӕмбалимӕ цӕрын хуыздӕр у, дыууӕ лӕджы куыстӕн мызд хуыздӕр фидынц. 10Иу дзы куы ахауа, уӕд ӕй иннӕ сыстын кӕндзӕн. Фӕлӕ иунӕг куы фӕкӕла, уӕд ма йыл чи схӕцдзӕнис? 11Хуыссӕны дӕр дыууӕйӕ хъармдӕр у, иунӕджы та чи схъарм кӕна? 12Знаджы ныхмӕ дӕр дыууӕйӕ хӕцын ӕнцондӕр у, иунӕгыл та йе знӕгтӕ уӕлахиз кӕнынц; бӕндӕн ӕртӕ ӕндахӕй быд куы уа, уӕд тагъд нӕ аскъуындзӕн. 13Мӕгуыр ӕмӕ зондджын лӕппу, уынаффӕтӕм чи нӕ хъусы, ахӕм ӕдылы ӕмӕ зӕронд паддзахӕй хуыздӕр у. 14Зондджын мӕгуыр лӕг суанг ахӕстонӕй дӕр рухсмӕ рацӕуы ӕмӕ паддзахы бынат бацахсы. 15Ӕз кастӕн ӕмӕ, ног ӕвзонг паддзахы заман цы адӕм цӕрдзысты, уыдоныл сагъӕс кодтон. 16Лӕггад ын чи кӕндзӕн, уыцы адӕм змисӕй фылдӕр уыдзысты, фӕлӕ йын сӕ байзӕддӕгтӕ аргъ нӕ кӕндзысты. Ӕмӕ та уыдӕттӕ дӕр аивгъуыйдзысты, уыдон дӕр, дымгӕ’рцахсыныл куы архайай, уымӕй уӕлдай не сты! 17Хуыцауы хӕдзармӕ цӕугӕйӕ, дӕхимӕ лӕмбынӕг кӕс. Хӕстӕг ӕрбалӕуу ӕмӕ байхъус, ӕдылытӕ цы нывӕндтӕ хӕссынц, уымӕй уый хуыздӕр у. Нывӕндтӕ чи хӕссы, уыцы ӕдылытӕ се’взӕр митӕ нӕ фӕуынынц.
Copyright information for
OssIBT2022