Eze 41 | OssIBT2022 | STEP

‏ Ezekiel 41

1 – 2 Уый фӕстӕ мӕ уыцы лӕг бакодта Кувӕндонмӕ ӕмӕ йӕ сбарста. Йӕ бацӕуӕны уӕрх уыди дӕс ӕлмӕрины, бацӕуӕнӕн йӕ фӕйнӕфарс къулты дӕргъ — фӕйнӕ фондз ӕлмӕрины, йӕ цӕджындзты бӕзн та — фӕйнӕ ӕхсӕз ӕлмӕрины. Кувӕндонӕн мидӕгӕй йӕ дӕргъ уыди цыппор ӕлмӕрины, йӕ уӕрх та — ссӕдз ӕлмӕрины. 3 Уыцы лӕг бацыди Кувӕндоны рӕбинаг агъуысты размӕ ӕмӕ йын сбарста йӕ бацӕуӕны цӕджындзтӕ. Сӕ уӕрх уыдис ӕхсӕз ӕлмӕрины, бацӕуӕнӕн йӕ фӕйнӕфарс къулты дӕргъ — фӕйнӕ авд ӕлмӕрины, сӕ бӕзн та, къултӕн дӕр ӕмӕ бацӕуӕны цӕджындзтӕн дӕр, — дыууӕ ӕлмӕрины. 4 Рӕбинаг агъуыстӕн сбарста йӕ дӕргъ ӕмӕ йӕ уӕрх, ӕмӕ дыууӕрдӕм дӕр уыди фӕйнӕ ссӕдз ӕлмӕрины, Кувӕндонӕн йӕ уӕрхы хуызӕн. Загъта мын: «Уый у Рухсмонуат».

Кувӕндоны агъуыстытӕ ӕмӕ сӕ мидвӕлыст

5 Уый фӕстӕ уыцы лӕг сбарста Кувӕндоны къулты бӕзн, ӕмӕ уыди ӕхсӕз ӕлмӕрины. Кувӕндоны алыварс, ӕртӕрдыгӕй, уыди фӕрссаг хатӕнтӕ, сӕ уӕрх — фӕйнӕ цыппар ӕлмӕрины. 6 Фӕрссаг хатӕнтӕ нымадӕй уыдысты ӕртын ӕртӕ, хатӕн хатӕны ӕмкъул, се’ппӕт дӕр цыдысты Кувӕндонӕн йе’ртӕ къулы рӕбынты, семӕ уыдысты баст, фӕлӕ сыл не’ндзӕвыдысты. 7 Кувӕндоны агъуыст алырдыгӕй, хӕрдмӕ куыд цыди, афтӕ кодта уӕрӕхӕй-уӕрӕхдӕр, фӕрссаг хатӕнты фӕрцы, ӕмӕ уымӕ гӕсгӕ уӕле уӕрӕхдӕр уыди. Бинаг уӕладзыгӕй уӕллаг уӕладзыгмӕ ссӕуын хъуыдис астӕуккаг уӕладзыгыл.

8 Кувӕндоны бындуры ӕз федтон бӕрзондӕвӕрд астӕрд, фӕрссаг хатӕнтӕн дӕр сӕ бындуры уый уыди, йӕ бӕрзӕнд — ӕхсӕз ӕлмӕрины. 9 – 10 Фӕрссаг хатӕнты ӕддаг къулӕн йӕ бӕзн уыди фондз ӕлмӕрины. Кувӕндоны фӕрссаг хатӕнты ӕмӕ сауджынты хатӕнты’хсӕн цы тыгъдад уыди, уымӕн йӕ уӕрх — ссӕдз ӕлмӕрины. 11 Астӕрды гом тыгъдадӕй фӕрссаг хатӕнтӕм уыди дыууӕ дуары, иу цӕгатӕрдыгӕй, иннӕ та хуссарӕрдыгӕй. Хатӕнты алыварс астӕрдӕн йӕ уӕрх уыди фондз ӕлмӕрины.

12 Кувӕндонӕн йӕ ныгуылӕнварс цы фӕз уыд, уый ӕмарӕн цыди бӕстыхай, йӕ уӕрх — ӕвдай ӕлмӕрины, йӕ дӕргъ та — нӕуӕдз ӕлмӕрины. Уыцы бӕстыхайӕн йӕ къулты бӕзн уыди фондз ӕлмӕрины. 13 – 14 – 15 Уӕд, чи мӕ ӕрбакодта, уыцы лӕг сбарста Кувӕндоны бӕстыхӕйтты ӕппӕт фӕзахст. Кувӕндон ӕмӕ йе’фтуанагъуысты дӕргъ уыди сӕдӕ ӕлмӕрины, йӕ уӕрх дӕр, йӕ алыварс фӕзимӕ — сӕдӕ ӕлмӕрины.

Афтӕмӕй барст ӕрцыди алцыдӕр: Кувӕндоны хуылф, тыргъ, 16 астӕрдӕй хӕрдмӕ, рудзгуыты онг чи ссыд, уыцы хъӕдын уӕлхуыд фӕлыст, ӕртывазыг фӕлгӕтджын рудзгуытӕ, 17 Кувӕндонмӕ бацӕуӕн кулдуары сӕрмӕ къул, уыимӕ ӕппӕт Кувӕндон — мидӕгӕй дӕр ӕмӕ ӕдде дӕр; 18 конд ӕрцыдысты херувимтӕ, стӕй пальмӕты нывӕфтыдтӕ: дыууӕ херувимы ӕхсӕн — пальмӕ, алы херувимӕн дӕр — дыууӕ цӕсгомы. 19 Иуӕрдыгӕй пальмӕмӕ кӕсы адӕймаджы цӕсгом, иннӕрдыгӕй та — домбайы цӕсгом; ахӕм нывӕфтыдтӕ Кувӕндоны конд ӕрцыдысты алырдыгӕй. 20 Херувимтӕ ӕмӕ пальмӕты нывӕфтыдтӕ конд уыди мидкувӕндоны ӕппӕт къултыл дӕр, астӕрдӕй Кувӕндонмӕ бацӕуӕны уӕлкъӕсӕры онг. 21 Кувӕндонмӕ бацӕуӕны дуарӕн уыди цыппаркъӕпхӕнон тарвӕзтӕ, иу тарваз — иннӕйы мидӕг, Рухсмонуаты бацӕуӕны дӕр афтӕ. 22 Уыди дзы хъӕдын нывондхӕссӕн, йӕ бӕрзӕнд — ӕртӕ ӕлмӕрины, йӕ дӕргъ ӕмӕ йӕ уӕрх та — фӕйнӕ дыууӕ ӕлмӕрины. Йӕ тигътӕ дӕр, йӕ бын дӕр ӕмӕ йӕ къултӕ дӕр уыдысты хъӕдӕй конд. Чи мӕ ӕрбакодта, уыцы лӕг мын загъта: «Уый, Дунедарӕджы раз чи лӕууы, уыцы фынг у».

23 – 24 Кувӕндонмӕ ӕмӕ Рухсмонуатмӕ бацӕуӕнтӕн уыди дывӕлдах дуӕрттӕ, ӕвдузӕнтыл зилгӕ дыгай базыртимӕ. 25 Кувӕндонӕн йӕ дуӕрттыл дӕр уыди херувимтӕ ӕмӕ пальмӕты нывӕфтыдтӕ конд, къултыл куыд уыдис, афтӕ. Тыргъмӕ бацӕуӕны сӕрмӕ та ӕдде уыди аууондар тапка. 26 Тыргъы фӕйнӕфарс къултӕй кастысты рудзгуытӕ, уыдон уыдысты пальмӕты нывӕфтыдтӕй фӕлыст.