Eze 42 | OssIBT2022 | STEP | Уыцы лӕг мӕ ракодта ӕддаг кӕртмӕ, цӕгатварсмӕ. Уым кӕрт ӕмӕ цӕгатварсы стыр бӕстыхайы ныхмӕ лӕууыд иу бӕстыхай, йӕ мидӕг

‏ Ezekiel 42

Сауджынтӕн лӕвӕрд агъуыстытӕ

1 Уыцы лӕг мӕ ракодта ӕддаг кӕртмӕ, цӕгатварсмӕ. Уым кӕрт ӕмӕ цӕгатварсы стыр бӕстыхайы ныхмӕ лӕууыд иу бӕстыхай, йӕ мидӕг — цалдӕр агъуысты. 2 Уыцы бӕстыхайӕн йӕ дӕргъ уыди сӕдӕ ӕлмӕрины, йӕ уӕрх та фӕндзай ӕлмӕрины. Йӕ бацӕуӕн уыд цӕгатӕрдыгӕй. 3 Мидӕггаг кӕрты къулы, ссӕдз ӕлмӕрины чи уыди, уый бакомкоммӕ ӕмӕ ӕддаг кӕрты астӕрды бакомкоммӕ кӕрӕдзийы ныхмӕ уыдысты ӕртӕуӕладзыгон тыргътӕ. 4 Бӕстыхаймӕ цӕгатӕрдыгӕй уыди, йӕ уӕрх дӕс ӕлмӕрины кӕмӕн уыд, ахӕм бацӕуӕн. Уыцырдыгӕй ма уыди ноджы иу бацӕуӕн. Мидӕггаг кӕртмӕ цыди фӕндаг, йӕ уӕрх — иу ӕлмӕрин. 5 – 6 Бӕстыхайӕн йӕ уӕладзгуытӕ куыд уӕлӕмӕ къӕпхӕнгай кӕй цыдысты, уымӕ гӕсгӕ йӕ агъуыстытӕ куыд уӕлдӕр нарӕгдӕр уыдысты. Ацы бӕстыхайӕн ӕддаг кӕрты алыварс агъуыстытау цӕджындзтӕ нӕ уыди. 7 – 8 Бӕстыхаймӕ бацӕуӕны’рдыгӕй цы тыргъ уыд, уымӕй ӕддаг кӕрты’хсӕн уыди быру. Йӕ дӕргъ фӕндзай ӕлмӕринӕй цыди ӕддаг кӕртыл ӕмӕ баиу ис уыцы кӕрты алыварс агъуыстыты къулимӕ. Бӕстыхай йӕхӕдӕг уыди сӕдӕ ӕлмӕрины дӕргъӕн. 9 Уыцы агъуыстытӕм бынты ӕддаг кӕртӕй, скӕсӕнӕрдыгӕй, уыди бацӕуӕн.

10 Хуссарӕрдыгӕй дӕр ӕддаг кӕрты быруйы ӕмкъул, Кувӕндоны ӕмӕ фӕзы чъылдыммӕ, уыди, цалдӕр агъуысты кӕм уыд, ахӕм бӕстыхай. 11 Сӕ цурты цы фӕндаг цыди, уый уыди, се’ргом цӕгатӕрдӕм кӕмӕн уыд, уыцы агъуыстыты цур фӕндаджы халдих, дӕргъмӕ дӕр ӕмӕ уӕрхмӕ дӕр. Уыдоны халдих уыдысты йе’ппӕт рацӕуӕнтӕ, сӕ арӕзт, сӕ дуӕрттӕ. 12 Се’ргом хуссарӕрдӕм кӕмӕн уыд, уыцы агъуыстыты дуӕртты халдих — сӕ дуӕрттӕ, сӕ бацӕуӕн дуар уыди, быруйы ӕмварс скӕсӕнӕрдӕм чи цыди, тӕккӕ уыцы фӕндаджы был.

13 Кӕимӕ уыдтӕн, уыцы лӕг мын загъта: «Фӕзы цур цӕгатӕрдӕм ӕмӕ хуссарӕрдӕм чи кӕсы, уыцы агъуыстытӕ сты уаз, Кувӕндоны мидӕг, Дунедарӕгӕн чи кусы, уыцы сауджынтӕн лӕвӕрд сты. Ам фӕхӕрынц, нывӕндтӕй сӕм цы хӕйттӕ хауы, уыдон. Ам ӕрӕвӕрынц иууылсыгъдӕг мысайнӕгтӕ, хойраджы хуынтӕ, тӕригъӕды нывонд ӕмӕ фиддоны нывонд, уымӕн ӕмӕ ацы бынат уаз у. 14 Сауджынтӕ-иу уырдӕм куы бацӕуой, уӕд-иу уыцы Кувӕндонӕй ма рацӕуӕнт ӕддаг кӕртмӕ, цалынмӕ, уаз куыст цы дарӕсты кодтой, уыдон уым ныууадзой, уӕдмӕ, уымӕн ӕмӕ уыцы дарӕстӕ уаз сты. Скӕнӕнт-иу ӕндӕр дарӕстӕ, ӕмӕ сын уӕд ӕмбӕлдзӕн адӕммӕ рацӕуын».

Кувӕндоны зылды фӕзахст

15 Уыцы лӕг Кувӕндон ӕд кӕртытӕ куы сбарста, уӕд мӕ скӕсӕнварс кулдуарыл ӕддӕмӕ ракодта ӕмӕ райдыдта барын Кувӕндоны систӕ. 16 Барста сӕ барӕн хъилӕй, ӕмӕ Кувӕндоны скӕсӕнварс уыди фондзсӕдӕ ӕлмӕрины дӕргъӕн; 17 йӕ цӕгатварс дӕр — фондзсӕдӕ ӕлмӕрины дӕргъӕн; 18 йӕ хуссарварс дӕр — фондзсӕдӕ ӕлмӕрины дӕргъӕн. 19 Уӕд фӕзылди ныгуылӕнӕрдӕм, ӕмӕ уыцы фарс дӕр уыди фондзсӕдӕ ӕлмӕрины дӕргъӕн. 20 Афтӕмӕй йын сбарста йӕ цыппар фарсы дӕр, ӕмӕ Кувӕндоны систӕн сӕ дӕргъ алырдыгӕй дӕр уыди фӕйнӕ фондзсӕдӕ ӕлмӕрины. Уыцы систӕ уаз зӕххы хай хицӕн кодтой, уаз чи нӕ уыд, уыцы зӕххӕй.