‏ Ezekiel 44

Скӕсӕнварсы ӕхгӕд кулдуар

1Уыцы лӕг мӕ ногӕй скӕсӕнварс кулдуары цурмӕ ӕрбакодта. Кулдуар уыди ӕхгӕд. 2Дунедарӕг мын загъта: «Ацы кулдуар уыдзӕн ӕхгӕд ӕмӕ нӕ байгом уыдзӕн. Ницавӕр адӕймаг ыл бахиздзӕн, уымӕн ӕмӕ йыл Дунедарӕг, Израилы Хуыцау, бахызти. Уымӕ гӕсгӕ баззайдзӕни ӕхгӕдӕй. 3Фӕлӕ адӕмы фӕтӕгӕн ис уыцы кулдуары цур бадыны бар ӕмӕ уым, Дунедарӕджы раз, къӕбӕр аходыны бар. Ӕцӕг-иу мидӕмӕ дӕр ӕмӕ ӕддӕмӕ дӕр цӕуӕд кулдуары раз тыргъыл».

Кувӕндоны куысты тыххӕй фӕдзӕхстытӕ

4Уый фӕстӕ мӕ уыцы лӕг цӕгатварс кулдуарыл бакодта Кувӕндоны размӕ. Ӕз федтон, Дунедарӕджы кадӕй Кувӕндон йемыдзаг куыд баци, уый ӕмӕ ныддӕлгом дӕн зӕххыл. 5Дунедарӕг мын загъта: «Адӕймаджы фырт! Дӕ цӕстытӕ ӕмӕ дӕ хъустӕ байгом кӕн ӕмӕ дӕ зӕрдыл бадар, Дунедарӕджы хӕдзары ӕппӕт уагӕвӕрдтӕ ӕмӕ ӕппӕт ӕгъдӕутты тыххӕй дын цы дзурын, уыдӕттӕ. Дӕ хъус дар, Кувӕндоны бацӕуӕнтыл мидӕмӕ дӕр ӕмӕ ӕддӕмӕ дӕр цӕуын кӕмӕн ӕмбӕлы, уыдонмӕ. 6Израилы хиваст адӕмӕн зӕгъ: Афтӕ зӕгъы Дунедарӕг Хуыцау: Израилы адӕм, кӕрон скӕнут уе’ппӕт ӕнаккаг митӕн. 7Мӕ Кувӕндонмӕ Мын мауал кӕнут ӕцӕгӕлӕтты, буарӕй дӕр ӕмӕ зӕрдӕйӕ дӕр ӕнӕсунӕт чи у, уыдоны, ӕмӕ Мын мауал ӕгад кӕной Мӕ Кувӕндон. Фиу ӕмӕ Мын туг, Мӕ хойраг, нывондӕн куы хастат, уӕд адон уӕ цуры уыдысты, ӕмӕ-иу афтӕмӕй уӕ алы ӕлгъӕгтӕй фехӕлдтат, Ӕз уемӕ цы фидыд сарӕзтон, уый. 8Мӕ Кувӕндоны Мын уазлӕггад нӕ кодтат, уӕхи бӕсты-иу дзы ӕндӕрбӕстӕгты лӕггадгӕнджытӕй сӕвӕрдтат.

9Уымӕ гӕсгӕ Дунедарӕг Хуыцау афтӕ зӕгъы: нырӕй фӕстӕмӕ Мӕ Кувӕндонмӕ иу ӕцӕгӕлон дӕр — буарӕй дӕр ӕмӕ зӕрдӕйӕ дӕр ӕнӕсунӕт чи у — нал бацӕудзӕн, суанг Израилы адӕмӕн се’хсӕн куы цӕра, уӕд дӕр. 10Афтӕ сӕ азымы тыххӕй ӕфхӕрд ӕрцӕудзысты левиттӕ дӕр, Израил йӕ фӕндагӕй куы адзӕгъӕл, уӕд Мӕ чи ныууагъта ӕмӕ гуымирытӕм кувын чи райдыдта, уыдон. 11Мӕ Кувӕндоны кусдзысты дуаргӕстӕй ӕмӕ лӕггадгӕнджытӕй. Адӕмӕн ӕргӕвддзысты сӕ иууылсудзинӕгтӕ ӕмӕ иннӕ нывондӕгтӕ, лӕудзысты сӕ цуры ӕмӕ сын лӕггад кӕндзысты. 12Адӕм сӕ гуымирытӕн нывӕндтӕ куы хастой, уӕд сын адон кӕй лӕггад кодтой ӕмӕ уымӕй Израилы адӕмы тӕригъӕды кӕй бафтыдтой, уый тыххӕй сӕм Ӕз Мӕ къух сисдзынӕн, — зӕгъы Дунедарӕг Хуыцау, — ӕмӕ сӕ азымы тыххӕй ӕфхӕрд баййафдзысты. 13Уыдон Мӕ разы сауджынлӕггад нал кӕндзысты, нал сын уыдзӕни уаз дзауматӕ ӕмӕ иууылуаз хуынтӕм бавналыны бар. Се’лгъаг миты тыххӕй худинаджы бын фӕуыдзысты. 14Ӕз сӕ бафтаудзынӕн Кувӕндоны лӕггад кӕныныл, стӕй йӕ алы куыстытӕ ӕххӕст кӕныныл.

15Ӕрмӕстдӕр Левийы хӕдзарвӕндаджы сауджынтӕ, Цадокы байзӕддӕгтӕ, сӕ уазлӕггад нӕ ныууагътой Мӕ Кувӕндоны, израилӕгтӕ Мӕ се’ргом куы аздӕхтой, уӕд, ӕмӕ дарддӕр дӕр уыдон лӕггад кӕндзысты Мӕ разы ӕмӕ Мын фиу ӕмӕ туг нывондӕн хӕсдзысты, — зӕгъы Дунедарӕг Хуыцау. — 16Уыдон-иу ӕрбацӕудзысты Мӕ Кувӕндонмӕ ӕмӕ-иу ӕрбаввахс уыдзысты Мӕ фынгмӕ, цӕмӕй Мын лӕггад ӕмӕ уаз куыст кӕной.

17Мидӕггаг кӕрты кулдуармӕ ӕрбацӕугӕйӕ-иу сӕ уӕлӕ скӕнӕнт гӕн хъуымацӕй дарӕстӕ. Мидӕггаг кӕрты кулдуары цур ӕмӕ сыл Кувӕндоны хъуамӕ ма уа къуымбил дарӕстӕ. 18Сӕ сӕртыл сӕ сарыхътӕ дӕр хъуамӕ уой гӕн хъуымацӕй; сӕ хӕлӕфтӕ дӕр хъуамӕ уой гӕн хъуымацӕй. Уымӕн ӕмӕ сын хид кӕнын не’мбӕлы. 19Фӕлӕ-иу сӕ ӕддаг кӕртмӕ рацӕуын куы хъӕуа, адӕмы размӕ, уӕд-иу раласӕнт, цы дарӕсты лӕггад кодтой, уыдон, ныууадзӕнт-иу сӕ уаз агъуыстыты ӕмӕ-иу скӕнӕнт ӕндӕр дарӕстӕ, цӕмӕй сӕ уаз дарӕстӕй адӕмӕй макӕуыл бандзӕвой.

Фӕдзӕхстытӕ сауджынтӕн

20Сӕ сӕртӕ-иу мадӕр дасгӕ акӕнӕнт, мадӕр-иу сӕ сӕрыхъуынтӕ даргъ рауадзӕнт — алвынӕнт-иу сӕ сӕртӕ.

21Сӕн дӕр-иу мачи бануазӕд сауджынтӕй, мидӕггаг кӕртмӕ цӕугӕйӕ.

22Мадӕр сӕ идӕдз усы исчи ракурӕд, мадӕр, йӕ мойӕ чи рахицӕн, ахӕм сылгоймаджы. Ӕмбӕлы сын ӕрмӕст чызг ракурын Израилы адӕмы мыггӕгтӕй, науӕд та — сауджыны идӕдз усы.

23Мӕ адӕмы-иу ахуыр кӕнӕнт, уаз цы у, уый, уаз цы нӕу, уымӕй хицӕн кӕныныл, стӕй сыгъдӕг ӕмӕ ӕнӕсыгъдӕг кӕрӕдзийӕ иртасыныл.

24Быцӕйуаг хъуыддӕгты тыххӕй-иу ӕрлӕууӕнт тӕрхоны раз ӕмӕ-иу алы хъуыддаг дӕр райхалӕнт Мӕ амындтытӕм гӕсгӕ. Ӕххӕст Мын кӕнӕнт Ме’гъдӕуттӕ ӕмӕ Мӕ уагӕвӕрдтӕ, стӕй Мӕ сабаты ӕгъдӕуттӕ.

25Сауджынӕн не’мбӕлы адӕймаджы мардмӕ хӕстӕг бацӕуын, науӕд фӕчъизи уыдзӕн. Ӕрмӕст йӕ фыды, йӕ мады, йӕ фырты, йӕ чызджы, йе’фсымӕры кӕнӕ, моймӕдзыд чи нӕма уыд, йӕ уыцы хойы мардӕй йын ис йӕхи фӕчъизи кӕнӕн. 26Уымӕй куы ссыгъдӕг уа, уӕд-иу ранымайӕд авд боны. 27Ӕмӕ мидӕггаг кӕртмӕ, Кувӕндоны сауджынлӕггад кӕнынмӕ, цӕуинаг цы бон уа, уыцы бон-иу ӕрхӕссӕд тӕригъӕды нывонд, — зӕгъы Дунедарӕг Хуыцау.

28Сауджынты фыдӕй-фыртмӕйы исбоны кой куы кӕнӕм, уӕд Ӕз Мӕхӕдӕг дӕн сӕ исбон. Зӕххы хай сын ма раттут Израилы: Ӕз Мӕхӕдӕг дӕн сӕ хай. 29Уыдон хӕрдзысты хойраджы хуынӕй, тӕригъӕды нывондӕй ӕмӕ фиддоны нывондӕй. Израилы зӕххыл Дунедарӕгӕн цыдӕриддӕр снывонд чындӕуыд, уый дӕр уыдоны хай уыдзӕн. 30Уӕ фыццаг дыргъты хуыздӕртӕ ӕмӕ уӕ алы хуынтӕ, цавӕрфӕнды уой, уӕддӕр, сты сауджынты хай. Уӕ хоры сӕрты ссадӕй цы сфыцат, уый дӕр-иу раттут сауджынӕн, ӕмӕ арфӕгонд уыдзысты уӕ хӕдзӕрттӕ.

31Мацы хӕдмӕлы фыд-иу бахӕрӕд сауджын, мадӕр, сырд кӕй аргӕвста, маргъ уа ӕви фос, уый фыд.