Eze 46 | OssIBT2022 | STEP | Афтӕ зӕгъы Дунедарӕг Хуыцау: «Мидӕггаг кӕрты скӕсӕнварс кулдуар кусгӕ бонты, ӕхсӕз боны дӕргъы, ӕхгӕд уыдзӕн, фӕлӕ сабаты, стӕй мӕйноджы бӕрӕгбоны уыдзӕни гом.

‏ Ezekiel 46

1 Афтӕ зӕгъы Дунедарӕг Хуыцау: «Мидӕггаг кӕрты скӕсӕнварс кулдуар кусгӕ бонты, ӕхсӕз боны дӕргъы, ӕхгӕд уыдзӕн, фӕлӕ сабаты, стӕй мӕйноджы бӕрӕгбоны уыдзӕни гом. 2 Фӕтӕг-иу бацӕуӕд кулдуары раз ӕддаг тыргъыл ӕмӕ-иу ӕрлӕууӕд кулдуары цӕджындзты раз. Сауджынтӕ-иу ын ӕрхӕссӕнт йӕ иууылсудзинаг ӕмӕ йӕ фидыды нывонд, уый та-иу кулдуары раз бакувӕд Дунедарӕгмӕ ӕмӕ рацӕуӕд. Кулдуар-иу изӕрмӕ ӕхгӕд ма ӕрцӕуӕд. 3 Бӕстӕйы адӕм-иу, кулдуарыл бахизыны размӕ, Дунедарӕгмӕ бакувӕнт, сабаты дӕр ӕмӕ мӕйноджы бӕрӕгбоны дӕр. 4 Адӕмы фӕтӕг-иу Дунедарӕгӕн сабаты ӕрхӕссӕд иууылсудзинӕгтӕ: ӕхсӕз ӕнӕсахъат фысы ӕмӕ иу ӕнӕсахъат фыр. 5 Хойраджы хуынӕн-иу фыр-нывондимӕ ӕрхӕссӕд ссады иу ефӕ, алы уӕрыккимӕ та — йӕ къух цас амона, уый бӕрц, стӕй ссады ефӕимӕ — оливӕйы сойы иу гин.

6 Мӕйноджы бӕрӕгбоны-иу галты рӕгъауӕй нывондӕн ӕрхӕссӕд ӕнӕсахъат гал, стӕй ӕхсӕз уӕрыччы ӕмӕ иу фыр, уыдон дӕр ӕнӕсахъат куыд уой, афтӕ.

7 Хойраджы хуынӕн-иу гал-нывондимӕ ӕрхӕссӕд ссады иу ефӕ, фыр-нывондимӕ дӕр — афтӕ, алы уӕрыккимӕ та — йӕ къух цас амона, уый бӕрц, стӕй ссады ефӕимӕ — оливӕйы сойы иу гин. 8 Адӕмы фӕтӕг-иу куы’рбацӕуа, уӕд-иу мидӕмӕ бацӕуӕд кулдуары раз тыргъыл, ӕддӕмӕ дӕр-иу рацӕуӕд афтӕ. 9 Бӕстӕйы адӕм бӕрӕгбӕтты заман Дунедарӕджы размӕ куы цӕуой, уӕд, бакувынмӕ цӕгатварс кулдуарыл чи бацӕуа, уый-иу фӕстӕмӕ та рацӕуӕд хуссарварс кулдуарыл, хуссарварс кулдуарыл чи бацӕуа, уый та-иу фӕстӕмӕ рацӕуӕд цӕгатварс кулдуарыл. Мидӕмӕ цы кулдуарыл бацыд, ууыл-иу ма рацӕуӕд фӕстӕмӕ, фӕлӕ рацӕуӕд уымӕн йӕ бакомкоммӕ кулдуарыл. 10 Адӕмы фӕтӕг семӕ хъуамӕ уа. Адӕм куы бацӕуой, уӕд-иу бацӕуӕд уый дӕр, куы рацӕуой, уӕд та-иу уый дӕр рацӕуӕд.

11 Бӕрӕгбӕтты заман-иу адӕмы фӕтӕг гал-нывондимӕ ӕмӕ фыр-нывондимӕ хойраджы хуынтӕн ӕрхӕссӕд ссады фӕйнӕ ефӕйы, уӕрыччытимӕ та — йӕ къух цас амона, уый бӕрц, стӕй ссады ефӕимӕ — оливӕйы сойы иу гин.

12 Адӕмы фӕтӕг Дунедарӕгӕн иууылсудзинаг кӕнӕ фидыды нывонд бархийӕ ӕрхӕссинаг куы уа, уӕд-иу ын байгом кӕнӕнт скӕсӕйнаг кулдуар, ӕмӕ-иу, сабаты куыд бакодта, афтӕ ӕрхӕссӕд йӕ иууылсудзинаг ӕмӕ йӕ фидыды нывонд, уый фӕстӕ-иу рацӕуӕд. Куы рацӕуа, уӕд-иу кулдуар ӕхгӕд ӕрцӕуӕд йӕ фӕдыл.

13 Алы бон дӕр-иу, ӕрвылрайсом, Дунедарӕгӕн иууылсудзинагӕн ӕрхӕсс афӕдздзыд уӕрыкк. 14 Алы райсом дӕр ыл хойраджы хуынӕн ӕфтау ссады ефӕйы ӕхсӕзӕм хай ӕмӕ оливӕйы сойы гины ӕртыццаг хай, ссад сызмӕнтынӕн. Уый у ӕрвылбоны уагӕвӕрд мыггагмӕ, Дунедарӕгӕн хойраджы хуын хӕссыны тыххӕй. 15 Ӕрвылрайсом дӕр иууылсудзинагӕн хӕссын хъӕуы фыс, стӕй хойраджы хуын ӕмӕ оливӕйы сой».

Адӕмы фӕтӕгты фыдӕй-фыртмӕйы исбоны тыххӕй фӕдзӕхстытӕ

16 Афтӕ зӕгъы Дунедарӕг Хуыцау: «Адӕмы фӕтӕг йӕ исбонӕй йӕ фырттӕй искӕмӕн лӕвар куы ракӕна, уӕд уыцы лӕвар дарддӕр ӕрхаудзӕни уый фырттӕм дӕр. Афтӕмӕй уыцы исбон суыдзӕни фыдӕй-фыртмӕйы исбон. 17 Йӕ исбонӕй йӕ цагъартӕй искӕмӕн куы ралӕвар кӕна, уӕд цагъары хай уыдзӕни ссӕрибары афӕдзы онг, стӕй фӕстӕмӕ суыдзӕн адӕмы фӕтӕджы исбон. Афтӕмӕй йӕ исбон ӕрмӕст йӕ фыртты хай суыдзӕн. 18 Ӕцӕг, фӕтӕгӕн йӕ бон нӕу адӕмы исбонӕй райсын, сӕ зӕххытӕй сӕ сурын. Йӕ фырттӕн йӕ бон дӕттын у ӕрмӕст йӕхи исбонӕй, Мӕ адӕмӕй та йӕ зӕххы хайӕ никӕй ӕмбӕлы сурын».

Нывӕндты дзидза фыцӕн цӕлгӕнӕнтӕ

19 Кулдуары фарсмӕ бацӕуӕныл мӕ уыцы лӕг бакодта сауджынтӕн лӕвӕрд уаз агъуыстытӕм, се’ргом цӕгатӕрдӕм арӕзт кӕмӕн уыд, уыдонмӕ. Се’ппӕты кӕрон, ныгуылӕнварсӕрдыгӕй, уыдис иу бынат. 20 Уыцы лӕг мын загъта: «Сауджынтӕ ацы бынаты фыцдзысты фиддоны ӕмӕ тӕригъӕды нывӕндтӕ, стӕй хойраджы хуынтӕ. Ӕддаг кӕртмӕ дзы ницы рахӕсдзысты, цӕмӕй адӕмӕй, уаз цы у, ууыл мачи бандзӕва». 21 Уыцы лӕг мӕ ракодта ӕддаг кӕртмӕ, бакодта мӕ кӕртӕн йӕ цыппар къуыммӕ дӕр, ӕмӕ ма йын йӕ алы къуымы дӕр федтон фӕйнӕ кӕрты. 22 Кӕрты къуымты уыди фӕйнӕ сӕрӕмбӕрзт кӕрты. Уыдонӕй алкӕцы дӕр дӕргъмӕ уыди дыууиссӕдз ӕлмӕрины, уӕрхмӕ та — дӕс ӕмӕ ссӕдз. Афтӕмӕй, цыппар къуымы кӕртытӕ уыдысты ӕмиӕстӕ. 23 Алы кӕртӕн дӕр йӕ алыварс уыди быру, быруйы ӕмкъул та алырдыгӕй — къонатӕ. 24 Уыцы лӕг мын загъта: «Адон сты, Кувӕндоны лӕггадгӕнджытӕ адӕмы нывӕндтӕ кӕм фыцынц, уыцы цӕлгӕнӕнтӕ».