Eze 8 | OssIBT2022 | STEP | Ӕхсӕзӕм аз, ӕхсӕзӕм мӕйӕн йӕ фӕндзӕм бон, ӕз бадтӕн мӕ хӕдзары, Иудейы хистӕртӕ дӕр — мӕ разы, ӕмӕ мыл уым Дунедарӕг Хуыцауы къух бандзӕвыд.

‏ Ezekiel 8

Гуымирытӕ Йерусалимы Кувӕндоны

1 Ӕхсӕзӕм аз, ӕхсӕзӕм мӕйӕн йӕ фӕндзӕм бон, ӕз бадтӕн мӕ хӕдзары, Иудейы хистӕртӕ дӕр — мӕ разы, ӕмӕ мыл уым Дунедарӕг Хуыцауы къух бандзӕвыд.

2 Ӕз федтон: мӕнӕ чидӕр — адӕймаджы хуызӕн, астӕуӕй дӕлӕмӕ — артӕнгӕс, астӕуӕй уӕлӕмӕ та — цӕхӕркалгӕ згъӕрау. 3 Ӕрбадардта мӕм къухы хуызӕн цыдӕр, мӕ сӕрыхъуынтӕй мӕ фелвӕста. Уд мӕ арв ӕмӕ зӕххы астӕумӕ систа ӕмӕ мӕ Хуыцауӕй лӕвӕрд цӕстылуайӕны ӕрхаста Йерусалиммӕ, йе’ргом цӕгатӕрдӕм арӕзт кӕмӕн уыд, уыцы мидӕггаг кулдуары цурмӕ. Уым лӕууыди, Дунедарӕгӕн Йӕ маст кӕмӕ сыгъди, уыцы гуымиры.

4 Уым мын раргом ис Израилы Хуыцауы кад, быдыры кӕй федтон, уый ӕнгӕс. 5 Дунедарӕг мын загъта: «Адӕймаджы фырт! Акӕс-ма цӕгатӕрдӕм». Ӕз акастӕн цӕгатӕрдӕм ӕмӕ нывондхӕссӕны кулдуары цур цӕгатӕрдыгӕй федтон, бацӕуӕны тӕккӕ раз чи лӕууыд, уыцы зӕрдӕхсайды гуымирыйы. 6 Дунедарӕг мын загъта: «Адӕймаджы фырт! Федтай, цытӕ аразынц, уый? Уыныс, Израилы адӕм ацы ран цытӕ аразынц, уый? Ӕвирхъау ӕлгъаг митӕ кӕнынц, цӕмӕй Ӕз Мӕ Кувӕндон ныууадзон. Фӕлӕ кӕс дарддӕр, ӕмӕ ноджы фыддӕр ӕлгъаг митӕ фендзынӕ».

7 Дунедарӕг мӕ бакодта кӕрты дуармӕ, ӕмӕ уым къулы федтон хуынкъ. 8 Дунедарӕг мын загъта: «Адӕймаджы фырт! Бакъах-ма къул». Ӕз бакъахтон къул ӕмӕ федтон цавӕрдӕр дуар. 9 Дунедарӕг мын афтӕ зӕгъы: «Бацу ӕмӕ фен, ацы бынаты цы’лгъаг митӕ кӕнынц, уый». 10 Ӕз бацыдтӕн ӕмӕ къултыл федтон алы хилӕгойты ӕмӕ ӕлгъаг цӕрӕгойты нывтӕ, стӕй, Израилы адӕм кӕмӕ куывтой, уыцы алыхуызон гуымирыты нывтӕ. 11 Израилы хистӕртӕй ӕвдайы бӕрц лӕууыдысты сӕ разы, Шафаны фырт Иазани дӕр се’хсӕн, афтӕмӕй. Алкӕй къухы дӕр сӕ уыди будсудзӕн, ӕмӕ буды хӕрздӕфы къуыбылӕйттӕ хӕрдмӕ цыдысты. 12 Дунедарӕг мын загъта: «Уыныс, адӕймаг, Израилы хистӕртӕй алчидӕр талынджы, йӕ гуымирыты нывтӕй фӕлыст уаты, цытӕ кӕны, уый? Уыдон дзурынц, Дунедарӕг мах нӕ уыны, зӕгъгӕ, Йӕхи, дам, атигъ кодта ацы зӕххыл».

13 Ноджы мын загъта: «Кӕс дарддӕр ӕмӕ ноджы фыддӕр ӕлгъаг митӕ фендзынӕ». 14 Стӕй мӕ бакодта Дунедарӕджы Кувӕндоны кулдуары цурмӕ, йе’ргом цӕгатӕрдӕм арӕзт кӕмӕн уыди, уымӕ. Уыцы ран бадтысты сылгоймӕгтӕ ӕмӕ куыдтой Таммуз-хуыцауы ^{▼▼Таммуз — зӕххы бӕркад ӕмӕ къӕвдайы «хуыцау» Вавилоны, адӕмон уырнынадмӕ гӕсгӕ-иу амарди хурхӕтӕны заман ӕмӕ-иу къӕвдаты афон райгас ис.} мӕлӕтыл.

15 Дунедарӕг мын загъта: «Уыныс, адӕймаг? Кӕс дарддӕр ӕмӕ ноджы фыддӕр ӕлгъаг митӕ фендзынӕ».

16 Дунедарӕг мӕ бакодта Кувӕндоны мидӕггаг кӕртмӕ, ӕмӕ дын мӕнӕ Дунедарӕджы Кувӕндоны къӕсӕрмӕ, тыргътӕй нывондхӕссӕны’хсӕн, фондз ӕмӕ ссӕдз лӕджы лӕууы. Сӕ чъылдымтӕ сарӕзтой Дунедарӕджы Кувӕндонмӕ, се’ргом та хурыскӕсӕнмӕ ӕмӕ хурыскӕсӕнӕрдӕм хурӕн куывтой. 17 Дунедарӕг мын загъта: «Уыныс, адӕймаг? Иудейы адӕм ацы ран цы’лгъаг митӕ кӕнынц, уыдон сын фаг не сты! Нӕ, фӕлӕ ма ӕгас бӕстӕ байдзаг кодтой фыдмитӕй ӕмӕ Мын ноджы тынгдӕр ссыгътой Мӕ маст. Кӕс-ма, къалиутӕ сӕ фындзтӕм куыд схӕссынц, уымӕ. 18 Уыдӕтты тыххӕй сыл Ӕз Мӕ маст ныххуырсдзынӕн. Мӕ цӕст сын нӕ фӕтӕригъӕд кӕндзӕн ӕмӕ сын нӕ ныббардзынӕн. Хъӕрӕй Мӕм куы дзыназой, уӕд дӕр сӕ нӕ фехъусдзынӕн».