Ezra 4
1Иудӕ ӕмӕ Бениамины знӕгтӕн сӕ хъустыл ӕрцыд, уацарӕй чи ӕрбаздӕхти, уыдон Дунедарӕджы, Израилы Хуыцауы хӕдзар аразынц, зӕгъгӕ. 2Зоровавел ӕмӕ мыггӕгты хистӕртӕм ӕрбацыдысты ӕмӕ сын загътой: «Мах дӕр уемӕ Кувӕндон араздзыстӕм, уымӕн ӕмӕ нӕ Ассирийы паддзах Есар-Хаддон ам куы’рцӕрын кодта, уӕдӕй абонмӕ мах дӕр сымахау нӕхи уӕ Хуыцауыл фӕдзӕхсӕм ӕмӕ Йын нывӕндтӕ хӕссӕм». 3Фӕлӕ сын Зоровавел, Йешуа ӕмӕ Израилы хӕдзарвӕндӕгты иннӕ хистӕртӕ загътой, махӕн, дам, уемӕ аразгӕ нӕу хӕдзар нӕ Хуыцауӕн. Дунедарӕгӕн, Израилы Хуыцауӕн, мах нӕхӕдӕг сараздзыстӕм хӕдзар, Персы паддзах Кир нын куыд бафӕдзӕхста, афтӕ. 4Уыйадыл уымы адӕм иудейӕгты размӕ цӕлхдуртӕ ӕвӕрын райдыдтой, тӕрсын сӕ кодтой ӕмӕ сын сӕ арӕзтад къуылымпы кодтой. 5Цӕмӕй хъуыддагӕй мацы рауайа, уый тыххӕй уынаффӕгӕнджытӕн гӕртӕмттӕ лӕвӕрдтой. Афтӕ кодтой, Кир Персы паддзах куы уыди, уӕд. Афтӕ кодтой Дарийы паддзахиуӕджы райдайӕны онг. 6Ксеркс куы сси паддзах, уӕд та цъыфкалӕнтӕ фӕфыстой Иудейы ӕмӕ Йерусалимы цӕрджытыл. 7Артаксерксы заман дӕр Бишлам, Митредат, Тавел ӕмӕ се’мбӕлттӕ арамейаг дамгъӕтӕй ныффыстой Артаксерксмӕ, Персы паддзахмӕ, арамейаг ӕвзагыл. 8Уынаффӕйы лӕг Рехум ӕмӕ нымӕрдар Шимшай Йерусалимы ныхмӕ сӕ иу фыстӕджы афтӕ фыстой Артаксерксмӕ: 9«Рехум, уынаффӕйы лӕг, нымӕрдар Шимшай ӕмӕ сӕ иннӕ ӕмкусджытӕ — динайӕгтӕ, афарсатхӕгтӕ, тарплайӕгтӕ ▼▼Ацы бынатӕн ма ис ахӕм ӕмбарынад дӕр: фыццаг ӕртӕ адӕмыхатты бӕсты — «тӕрхоны лӕгтӕ, паддзахады барджынтӕ ӕмӕ стыр хицӕуттӕ».
, афарсатхӕгтӕ, аркевӕгтӕ, вавилойнӕгтӕ, дегайӕгтӕ, еламӕгтӕ Шушанӕй, 10стӕй хъомысджын ӕмӕ цытджын Ашшурбанипал уацары кӕй райста, Самарийы сахарты ӕмӕ доны фале иннӕ сахарты кӕй ӕрцӕрын кодта, уыцы адӕмтӕ, ӕмӕ афтӕ дарддӕр». 11Сӕ фыстӕджы мӕнӕ куыд загъдӕуыди: «Паддзах Артаксерксмӕ, бирӕ цӕра, — йӕ цагъартӕ, доны фале цӕрджытӕ, ӕмӕ афтӕ дарддӕр. 12Паддзах хъуамӕ зона, йӕ разӕй рацӕуӕг иудейӕгтӕ кӕй ӕрбацыдысты махмӕ Йерусалиммӕ ӕмӕ ногӕй аразынц ацы ӕнӕсӕттон ӕмӕ хъӕхъхъаг сахар. Йӕ къултӕ йын амайынц, йӕ бындуртӕ йын фидар кӕнынц. 13Паддзахӕн хъуамӕ зындгонд уа: ацы сахар арӕзт куы’рцӕуа ӕмӕ йын йӕ къултӕ амад куы фӕуой, уӕд уыдон налдӕр хъалон, налдӕр фиддон, налдӕр илци фиддзысты, ӕмӕ уый паддзахы къазнайӕн ӕнӕмӕнг зиан уыдзӕни. 14Мах паддзахы раз хӕсджын кӕй стӕм ▼▼Дзуттаг тексты: «мах хӕрӕм паддзахы галуаны цӕхх». Уыцы заман-иу адӕм бадзырд сфидар кӕнынӕн цӕхх бахордтой.
, уымӕ гӕсгӕ, исчи паддзахӕн зиан ӕрхӕсса, уымӕ кӕсын нӕ бон нӕу, ӕмӕ йын, хабар куыд у, уый хъусын кӕнӕм. 15Рафӕлдахын кӕн дӕ фыдӕлты зӕрдылдарӕн хабӕртты чиныг ӕмӕ дзы бакӕсдзынӕ, Йерусалим, змӕнтгӕ чи кӕны, паддзӕхтӕн дӕр ӕмӕ бӕстӕйы алы кӕрӕттӕн дӕр зиан чи хӕссы, ахӕм сахар кӕй у, уый. Рагӕй-ӕрӕгмӕ дӕр уисӕн нӕ кӕны ӕмӕ дӕрӕнгонд дӕр уый аххосӕй ӕрцыдис. 16Уымӕ гӕсгӕ мах паддзахӕн хъусын кӕнӕм: ацы сахар фӕстӕмӕ куы рацаразой ӕмӕ йӕ къултӕ куы срӕвдз уой, уӕд-иу, доны фале дын цы исбон ис, ууыл дӕ къух ауигъ». 17Паддзах дзуапп арвыста уынаффӕгӕнӕг Рехуммӕ ӕмӕ нымӕрдар Шимшаймӕ, стӕй Самарийы ӕмӕ доны фале иннӕ сахарты цӕрӕг сӕ иннӕ ӕмбӕлттӕм: «Дунейы фарн уын ӕххуысгӕнӕг уӕд! 18Уӕ фыстӕг мын лӕмбынӕг бакастысты. 19Мӕ фӕндонмӕ гӕсгӕ сбӕлвырд кодтой, уыцы сахар рагӕй-ӕрӕгмӕ дӕр паддзӕхты ныхмӕ растынмӕ цӕттӕ кӕй уыд ӕмӕ-иу дзы уымӕ гӕсгӕ змӕстытӕ ӕмӕ хъӕлӕбатӕ кӕй рауадис, уый. 20Йерусалимы уыдис, доны фале ӕгасӕй дӕр кӕй къухы уыди, хъалонтӕ, фиддонтӕ ӕмӕ илци фыст кӕмӕн цыдис, ахӕм домбай паддзӕхтӕ. 21Уӕдӕ афтӕ: бардзырд раттут, цӕмӕй уыцы адӕм сӕ куыст ныууромой ӕмӕ, цалынмӕ мӕнӕй бар лӕвӕрд нӕ уа, уӕдмӕ уыцы сахар аразынмӕ мачиуал бавнала. 22Лӕмбынӕг кӕсут, ӕнӕрхъуыдыйӕ уӕ мацы аирвӕзӕд. Паддзӕхтӕн зиан цы хӕссы, уый куынӕг кӕнын хъӕуы». 23Паддзах Артаксерксы фыстӕг Рехум ӕмӕ Шимшайыл се’мбӕлттимӕ куыддӕр сӕмбӕлди, афтӕ уыдон иудейӕгтӕм гӕрзифтонгӕй атындзыдтой Йерусалиммӕ ӕмӕ сын сӕ куыст баурӕдтой. 24Афтӕ Йерусалимы Хуыцауы хӕдзар аразыны куыст ӕрлӕууыд ӕмӕ Персы паддзах Дарийы паддзахиуӕджы дыккӕгӕм азмӕ размӕ нал ацыди.
Copyright information for
OssIBT2022