Gal 1 | OssIBT2022 | STEP | Павелӕй, адӕмы уынаффӕйӕ нӕ, адӕймаджы фӕрцы дӕр нӕ, фӕлӕ Йесо Чырысти ӕмӕ Йӕ мӕрдтӕй райгасгӕнӕг Фыд Хуыцауы фӕндӕй апостол чи сси, уымӕй,

‏ Galatians 1

Арфӕйы ныхӕстӕ

1 Павелӕй, адӕмы уынаффӕйӕ нӕ, адӕймаджы фӕрцы дӕр нӕ, фӕлӕ Йесо Чырысти ӕмӕ Йӕ мӕрдтӕй райгасгӕнӕг Фыд Хуыцауы фӕндӕй апостол чи сси, уымӕй, ^a 2 стӕй, мемӕ чи ис, ӕппӕт уыцы ӕфсымӕртӕй Галатийы аргъуантӕм.

3 Хорзӕх ӕмӕ уын фарн — Хуыцауӕй, нӕ Фыдӕй, ӕмӕ Бардарӕг Йесо Чырыстийӕ. 4 Чырысти нӕ тӕригъӕдты тыххӕй Йӕхи ӕрхаста нывондӕн, цӕмӕй нӕ фервӕзын кӕна ацы мӕнгард дунейӕ — афтӕ бафӕндыди Хуыцауы, нӕ Фыды. ^b 5 Кад Ын уӕд ӕнусӕй-ӕнустӕм! Аммен.

Ӕндӕр Фарны Уац нӕй

6 Дисы мӕ ӕфтауы, Чырыстийы хорзӕхы фӕрцы уӕ Йӕхимӕ Ӕрхонӕгӕй ӕндӕр Фарны Уацмӕ уе’ргом куыд тагъд здахын райдыдтат, уый. 7 Уый ӕндӕр Фарны Уац нӕу, ӕрмӕст ис, уӕ зонд уын чи змӕнты ӕмӕ Чырыстийы Фарны Уац сзыгъуыммӕ кӕнын кӕй фӕнды, ахӕмтӕ. ^c 8 Фӕлӕ уын суанг мах кӕнӕ зӕд уӕларвӕй куы хъусын кӕна, мах уын кӕй нӕ хъусын кодтам, ахӕм Фарны Уац, уӕд дӕр ӕлгъыст фӕуӕд йӕ хъусынгӕнӕг. 9 Раздӕр цы дзырдтам, уый зӕгъын ныр дӕр: махӕй цы Фарны Уац фехъуыстат, уымӕй фӕстӕмӕ уын ӕндӕр Фарны Уац чи хъусын кӕны, уый ӕлгъыст фӕуӕд.

10 Ӕз абон адӕмы хорзӕхмӕ тырнын ӕви Хуыцауы? Мыййаг, адӕмы зӕрдӕ балхӕныныл архайын? Абон дӕр ма ӕз адӕмы зӕрдӕ балхӕныныл куы архаин, уӕд Чырыстийы цагъар нӕ уаин. ^d

Павел апостол куыд сси

11 Зонут ӕй, ме’фсымӕртӕ: ӕз цы Фарны Уац фехъусын кодтон, уый адӕймагӕй нӕ рацыд. 12 Ӕз ӕй адӕймагӕй нӕ фехъуыстон, адӕймаг мын ӕй нӕ бацамыдта, фӕлӕ мын ӕй Йесо Чырысти раргом кодта. ^e

13 Ӕз иудейаг диныл хӕст куы уыдтӕн, уӕд цы уагӕй цардтӕн, Хуыцауы Аргъуан ӕфхӕрыныл куыд нӕ ауӕрстон ӕмӕ йӕ куыд дӕрӕн кодтон, уый тыххӕй сымах фехъуыстат. ^f 14 Иудейаг диныл мӕхи хъарынӕй ӕз мӕ бирӕ дзуттаг ӕмгӕрттӕн фӕдӕн сӕ разӕй, ӕгӕр ӕнувыдӕй ӕххӕст кодтон мӕ фыдӕлты ӕгъдӕуттӕ. 15 Фӕлӕ ма мады гуыбыны куы уыдтӕн, уӕд мӕ Чи сӕвзӕрста, стӕй мӕ Йӕ хорзӕхмӕ гӕсгӕ Чи ӕрхуыдта, уыцы Хуыцауы куы бафӕндыд ^g 16 мӕнӕн Йӕ Фырты раргом кӕнын, Йӕ Фарны Уац муртаттӕгтӕм цӕмӕй хӕссон, уӕд адӕмӕй никӕимӕ уынаффӕ кодтон. ^h 17 Мӕ размӕ апостол чи сси, уыдонмӕ нӕ ацыдтӕн Йерусалиммӕ, фӕлӕ ацыдтӕн Аравимӕ, уырдыгӕй та ӕрбаздӕхтӕн Дамаскмӕ.

18 Стӕй, ӕртӕ азы фӕстӕ, ацыдтӕн Йерусалиммӕ, цӕмӕй базонгӕ уон Кифӕимӕ; ӕмӕ йӕм фӕдӕн фынддӕс боны. ⁱ 19 Иннӕ апостолтӕй, Бардарӕг Йесойы ӕфсымӕр Йаковы йеддӕмӕ, ӕз никӕй федтон. ^j 20 Цы уӕм фыссын, зӕгъын уын Хуыцауы раз, уымӕй та сайгӕ нӕ кӕнын. ^k

21 Уый фӕстӕ ацыдтӕн Сири ӕмӕ Киликимӕ. ^l 22 Иудейы чи ис, Чырыстийы уыцы аргъуанты уырнджытӕн лӕгӕй-лӕгмӕ зонгӕ нӕ уыдтӕн. 23 Ӕрмӕст фехъуыстой, зӕгъгӕ, кӕддӕр сӕ чи ӕфхӕрдта, уый ныр, раздӕр йӕ фесафыныл кӕмӕн архайдта, уыцы уырнындзинады тыххӕй хъусын кӕны Фарны Уац. 24 Ӕмӕ мӕн тыххӕй кад кодтой Хуыцауӕн.