Isa 11 | OssIBT2022 | STEP | Йессейы калд бӕласы бындзӕфхад суадздзӕни тау, ӕмӕ дзы ног тала сырӕздзӕн.

‏ Isaiah 11

Йессейы уидаджы тау

1 Йессейы калд бӕласы бындзӕфхад
суадздзӕни тау, ӕмӕ дзы ног тала сырӕздзӕн.
2 Ууыл ӕртыхсдзӕни Дунедарӕджы Уд —
уӕлзонд ӕмӕ ӕмбарынады Уд,
уынаффӕ ӕмӕ хъомысы Уд,
зонынады ӕмӕ Дунедарӕгӕн аргъуыц кӕныны Уд.
3 Уый йе’ппӕт хъарутӕй тырндзӕн
Дунедарӕгӕн аргъуыц кӕнынмӕ!
Ӕдде бакӕсгӕйӕ цы зыны,
уымӕ гӕсгӕ нӕ тӕрхон кӕндзӕни;
дам-думтӕм хъусгӕйӕ,
уынаффӕ нӕ рахӕсдзӕни.
4 Мӕгуыр адӕмӕн раст тӕрхон кӕндзӕн,
зӕххыл цӕрӕг ӕфхӕрд адӕмӕн
сӕ хъуыддӕгтӕ ӕвзардзӕни рӕстӕй.
Йӕ дзырды цӕфӕй стӕрхон кӕндзӕн зӕххӕн,
фыдгӕнӕджы Йӕ раулӕфтӕй фесафдзӕн!
5 Рӕстдзинад суыдзӕни Йӕ рон,
иузӕрдиондзинад ӕрбабӕтдзӕни Йӕ синтыл.

6 Уӕд бирӕгъ хӕларӕй цӕрдзӕн уӕрыккимӕ,
фыранк хуысдзӕни сӕныччы фарсмӕ,
род ӕмӕ лӕппын домбай уыдзысты иумӕ,
ӕнахъом саби сӕ хиздзӕни.
7 Стур хиздзӕн арсимӕ,
сӕ цот та хуысдзысты фӕрсӕй-фӕрстӕм,
домбай стурау ӕууилдзӕни зыгуым.
8 Дзидзидай саби хъаздзӕни
маргджын калмы хуынчъы раз,
йӕ къух-иу дзы атъысдзӕни.
9 Мӕ уаз хохыл сӕ кой дӕр нал уыдзӕн
фыдми ӕмӕ знаггадӕн,
уымӕн ӕмӕ, денджыз донӕй йемыдзаг куыд вӕййы,
афтӕ ӕгас зӕххыл сбирӕ уыдзысты
Дунедарӕджы тыххӕй зонындзинӕдтӕ.

Хаст адӕм ӕрбаздӕхдзысты фӕстӕмӕ

10 Уыцы заман куы ралӕууа,
уӕд, Йессейы Ӕвзарӕй цы тала сырӕза,
уый адӕмтӕн суыдзӕни цӕстуынгӕ нысан,
адӕмтӕ йӕ бацагурдзысты.
Цы бынаты ӕрцӕра, уымӕн йӕ кады кой
айхъуысдзӕни дӕрдтыл.
11 Уыцы заман куы ралӕууа,
уӕд Дунедарӕг ногӕй Йӕ къух ӕрдардзӕн
ӕмӕ ссӕрибар кӕндзӕн,
Йӕ адӕмӕй ма чи баззайа, уыдоны.
Фӕстӕмӕ ӕрбаздахдзӕн,
Йӕ адӕмӕй ма Ассири, Мысыр, Патрос,
Куш, Елам, Шинар ӕмӕ Хаматы бӕстӕты,
стӕй денджызгӕрон сахарты
удӕгасӕй чи баззайа, уыдоны.
12 Йӕ тырыса сисдзӕни адӕмты раз
ӕмӕ тард израилӕгты,
стӕй, чи ныххӕлиу ис, уыцы иудейӕгты —
нӕлгоймагӕй, сылгоймагӕй —
ӕрбаздахдзӕни зӕххы цыппар кӕронӕй.

13 Уӕд ефремонты фыдӕхӕн
кӕрон ӕрцӕудзӕни,
уӕд иудейӕгты фыдӕхӕн
йӕ кой дӕр нал уыдзӕн.
Ефремонтӕ иудейӕгтӕм
нал хӕлӕг кӕндзысты,
иудейӕгтӕ знаджы цӕстӕй
нал кӕсдзысты ефремонтӕм.
14 Иумӕ абырсдзысты ныгуылӕнӕрдӕм,
филистимӕгты бӕстӕм,
бастигъдзысты скӕсӕны адӕмты.
Едом ӕмӕ Моавы бӕстӕтыл
ӕрӕвӕрдзысты сӕ бархъомыс.
Аммонӕгтӕ сын дӕлбариуӕг кӕндзысты.
15 Дунедарӕг Йӕ азары амӕттаг бакӕндзӕни
Мысыры скӕнсӕнварс денджызы донбакӕлӕн,
Йӕ къух сисдзӕн Евфраты донмӕ дӕр,
ахӕм тыхджын дымгӕ йыл рауадздзӕн,
ӕмӕ йӕ авд суадоны фестын кӕндзӕн,
цӕхгӕрмӕ сыл тӕнӕг дзабырты хиздзысты.
16 Уӕд, Дунедарӕгӕн Ассирийы цы адӕм баззайа,
уыдон уырдыгӕй здӕхдзысты уӕрӕх фӕндагыл,
кӕддӕр Израилы адӕм
Мысыры зӕххӕй куыд здӕхтысты, афтӕ.