Isaiah 55
Скувут Хуыцаумӕ — фервӕзын уӕ кӕна
1«Дойны кӕмӕн у — ардӕм рацӕуӕнт ӕмӕ нуазӕнт!Ӕхца уӕ кӕмӕ нӕй — ардӕм рацӕуӕнт ӕмӕ
лӕвар исӕнт сӕн ӕмӕ ӕхсыр!
Ӕхца фидын сын нӕ хъӕуы.
2Уе’взистӕй цӕмӕн дӕттут,
къӕбӕры аккаг уын цы нӕу, уый сӕрмӕ?
Уӕ хъиамӕтӕй дӕр цӕмӕн фидут,
уе стонг уын цы нӕ сафы, ууыл?
Мӕ коммӕ куы кӕсат,
уӕд уӕ хойраг уыдзӕни фӕрнӕйдзаг,
уӕ удтӕ ӕфсаддзыстут хӕрзад хӕринагӕй.
3Ӕрбайхъусут Мӕм ӕмӕ Мӕм ӕрбацӕут!
Кӕсут Мӕ коммӕ ӕмӕ цӕрат!
Ӕз мыггагмӕ бафидаудзынӕн уемӕ ӕмӕ,
Давидӕн зӕрдӕ цы хорзӕхтӕй бавӕрдтон,
уыдон бахай кӕндзынӕн сымахӕн дӕр.
4Адӕмты раз Ӕз Мӕ цагъары
скодтон Ме’вдисӕн,
адӕмтӕн — фӕтӕг ӕмӕ зондамонӕг.
5Сымах фӕрцы Мӕ ныр базондзысты
алы адӕмтӕ.
Фӕдзурдзыстут, кӕй нӕ зыдтат
ӕмӕ уын уӕхи чи нӕ зыдта,
уыцы адӕмтӕм,
ӕмӕ уӕм цӕудзысты ӕвӕстиатӕй,
уымӕн ӕмӕ фендзысты,
Ӕз, Дунедарӕг, уӕ Хуыцау,
Израилы Стыр Хуыцау,
сымах куыд скадджын кодтон, уый».
6Агурут Дунедарӕджы ӕмӕ Йӕ ссардзыстут,
кувут Ӕм, уымӕн ӕмӕ уӕм ӕрӕввахс ис!
7Ӕнаккаг йӕ хъуыддӕгтӕ ныууадзӕд,
хӕлд — йӕ фӕндтӕ.
Раздӕхӕнт Дунедарӕгмӕ — ныббардзӕн сын,
раздӕхӕнт нӕ Хуыцаумӕ — бирӕбараг у Уый.
8Дунедарӕг зӕгъы: «Мӕ хъуыдытӕ
сымах хъуыдыты хуызӕн не сты,
сымах гӕнӕнтӕ та — Мӕ гӕнӕнты хуызӕн.
9Зӕххы сӕрмӕ арв цас бӕрзонд у,
уый бӕрц бӕрзонддӕр сты
Мӕ гӕнӕнтӕ дӕр сымах гӕнӕнтӕй,
Мӕ хъуыдытӕ та — уӕ хъуыдытӕй.
10Къӕвда кӕнӕ мит куы рауары,
уӕд арвмӕ фӕстӕмӕ нӕ аздӕхы,
цалынмӕ зӕххӕн йӕ дойны басӕтты, уӕдмӕ.
Ӕмӕ афтӕмӕй зӕхх свӕййы сойджын,
ӕмӕ йыл ӕрзайы хортӕ —
тауинагӕн дӕр ӕмӕ хойрагӕн дӕр.
11Гъе ахӕм хъысмӕт ис,
Ӕз цы ныхас фӕзӕгъын, уымӕн дӕр.
Пайда не’рхӕсгӕйӕ Мӕм
фӕстӕмӕ нӕ раздӕхы,
фӕлӕ Мын сӕххӕст кӕны Мӕ фӕндон,
саразы, цӕй тыххӕй йӕ рарвыстон, уый».
Сӕрибар адӕмы цин
12Рацӕудзыстут цинимӕ,арвитдзысты уӕ фарнимӕ.
Фӕндагыл уын зардзысты
хӕхтӕ ӕмӕ уӕлвӕзтӕ,
ӕмдзӕгъд уын кӕндзысты
быдыры ӕппӕт бӕлӕстӕ.
13Сындзкъутӕры бӕсты
ӕрзайдзӕни кипарис,
пысырайы бӕсты та — мирт.
Ӕмӕ уый уыдзӕни Дунедарӕджы кадӕн,
уыдзӕни мыггагмӕйы ӕвдисӕйнаг,
ӕнӕфехалгӕ нысан.
Copyright information for
OssIBT2022