Isaiah 56
Ӕцӕгӕлон адӕмты тыххӕй
1Дунедарӕг зӕгъы:«Хӕссут раст уынаффӕтӕ, раст тӕрхон,
уымӕн ӕмӕ уӕ тагъд рӕстӕджы
фервӕзын кӕндзынӕн
ӕмӕ уын Мӕ рӕстдзинад раргом кӕндзынӕн.
2Тӕхудиаг сты,
Мӕ уынаффӕтӕ Мын чи ӕххӕст кӕны,
фидар сыл чи хӕцы,
сабаты уагӕвӕрдтӕ халын чи нӕ уадзы
ӕмӕ ӕнӕгъдау мийӕ йӕхи чи хизы, уыдон».
3Дунедарӕджы адӕмы’хсӕн чи ӕрцард
ӕмӕ семӕ чи баиу,
уыцы ӕцӕгӕлӕттӕй мачи зӕгъӕд,
Дунедарӕг мӕ
Йӕ адӕмы’хсӕнӕй асуринаг у, зӕгъгӕ!
Сахъат евнухтӕй дӕр мачи дзурӕд,
уый мӕнӕ хуыскъ бӕласы къуыдыр йеддӕмӕ,
куы ницы дӕн, зӕгъгӕ!
4Уымӕн ӕмӕ Дунедарӕг
евнухты тыххӕй дӕр зӕгъы:
«Мӕ сабаты уагӕвӕрдтӕ Мын
чи ӕххӕст кӕны,
Мӕ уагӕвӕрдтӕ йӕ уды рӕбинаг кӕмӕн сты,
5уымӕн Мӕ Хӕдзары ныссадздзынӕн цырт
ӕмӕ йыл ныффысдзынӕн йӕ ном.
Мӕ фырттӕ ӕмӕ Мын Мӕ чызджытӕй
суыдзӕни ахсджиагдӕр.
Ӕз ын ратдзынӕн,
мыггагмӕ чи нӕ фесӕфдзӕн, ахӕм ном.
6Уӕдӕ ӕцӕгӕлӕттӕй дӕр Дунедарӕгимӕ
чи баиу ис, лӕггад Ын кӕныны охыл,
Дунедарӕджы ном чи уарзы, йӕхи Йын цагъар чи скодта
ӕмӕ Йын Йӕ сабаты уагӕвӕрдтӕ
чи ӕххӕст кӕны,
Мӕ уагӕвӕрдтӕ йӕ уды рӕбинаг кӕмӕн сты,
7уыдоны Ӕз се’ппӕты дӕр фӕхондзынӕн
Мӕ уаз хохмӕ.
Мӕ кувӕн хӕдзары сын балӕвар кӕндзынӕн
цин ӕмӕ Мын барст уыдзысты,
Мӕ нывондхӕссӕныл Мын
цы иууылсудзинӕгтӕ ӕрхӕссой
ӕмӕ Мын цы кусӕрттӕ акӕной, уыдон.
Ӕмӕ Мын уӕдӕй фӕстӕмӕ адӕмтӕ
Мӕ Хӕдзар хондзысты
ӕппӕт адӕмты кувӕн хӕдзар».
8Алы бӕстӕтыл чи ныххӕлиу ис,
уыцы израилӕгты фӕстӕмӕ
сӕхи зӕхмӕ Чи ӕрбакодта, Уый,
Дунедарӕг Хуыцау, зӕгъы:
«Ӕцӕгӕлӕттӕй уемӕ чи баиу,
уыдоныл ма Ӕз ноджыдӕр бафтаудзынӕн».
Адӕмы зондцух раздзӕуджытӕ
9Ӕрбацӕут, хъӕддаг сырдтӕ,хъӕды цӕрӕгойтӕ, ӕрбацӕут ӕмӕ хӕрут!
10Мӕ адӕмы раздзӕуджытӕ
иууылдӕр куырм сты, ницы’мбарынц.
Иууылдӕр сты гоби куыйтау —
сӕ бон срӕйын дӕр нӕу.
Хуыссын бирӕ уарзынц ӕмӕ сӕхи ауагътой,
фынӕйӕ сӕнттӕ цӕгъдынц.
11Куыйтау зыд ӕмӕ кӕрӕф сты,
ӕфсис нӕ зонынц.
Адӕмы хъӕр кӕмӕ нӕ хъуысы,
уыцы фыййӕуттау сӕ алчи
тыхсы ӕрмӕст йӕхи удыл, йӕхи пайдайыл.
12Сидынц: «Цомут ӕмӕ абон
дзӕбӕх нынцъухӕм сӕн ӕмӕ махсымӕ,
райсом та дзы ноджы хуыздӕр
фӕкӕсдзыстӕм нӕхимӕ!»
Copyright information for
OssIBT2022