‏ Jeremiah 44

1Иудейӕгтӕй мысыраг сахартӕ Мигдол, Тахпанхес, Ноф ӕмӕ Патросы чи’рцарди, уыдоны тыххӕй Дунедарӕг Йеремиайӕн загъта: 2Уӕларвӕфсады Бардарӕг, Израилы Хуыцау, афтӕ зӕгъы: сымах федтат, Йерусалим ӕмӕ Иудейы сахартӕй алкӕмӕн дӕр цы бӕллӕхтӕ бавзарын кодтон, уый. Хӕлддзӕгтӕ систы ныр, ничиуал дзы цӕры. 3Сӕ фыдракӕндтӕй Мӕ смӕсты кодтой, нӕдӕр уӕхӕдӕг, нӕдӕр уӕ фыдӕлтӕ кӕй нӕ зыдтой, уыцы хуыцӕуттӕн буд сыгътой ӕмӕ сын лӕггад кодтой. 4Ӕз сӕм ӕрвылбон ӕрвыстон Мӕ лӕггадгӕнджыты, пехуымпарты, ахӕм ныхӕстимӕ: «Уе’лгъаг митӕ ныууадзут, ӕнӕуынон Мын сты». 5Фӕлӕ Мӕм уыдон нӕ хъуыстой, сӕ фыдракӕндтӕ нӕ уагътой ӕмӕ ӕндӕр хуыцӕуттӕн будсудзӕн кодтой. 6Ӕмӕ сыл уӕд Мӕ судзгӕ маст ныккалди, Иудейы сахартӕ ӕмӕ Йерусалимы уынгты пиллон артӕй ссыгъд, хӕлддзӕгтӕ ӕмӕ ӕдзӕрӕг быдыр фестадысты.

7Ӕмӕ ныр Уӕларвӕфсады Бардарӕг, Израилы Хуыцау, афтӕ зӕгъы: «Уӕхиуыл ахӕм ӕвирхъау бӕллӕх цӕмӕн ӕфтаут? Иудӕйы хӕдзарвӕндагӕй уӕхи цӕмӕн хауын кӕнут, уӕ нӕлгоймӕгтӕ ӕмӕ уӕ сылгоймӕгтӕ, уӕ сывӕллӕттӕ ӕмӕ уӕ ноггуырд сабиты цӕмӕн сафут, удӕгасӕй уӕ куыд мачиуал баззайа, афтӕ? 8Уӕ хъуыддӕгтӕй Мӕ цӕмӕн мӕсты кӕнут? Мысыры зӕххыл, ӕрцӕрынмӕ кӕдӕм ӕрбацыдыстут, уым ӕндӕр хуыцӕуттӕн буд цӕмӕн судзут? Фесафдзыстут уӕхи! Зӕххыл цӕрӕг адӕмтӕ уӕ иууылдӕр ӕлгъитдзысты, фӕхудинаг уыдзыстут се’хсӕн.

9Уӕ фыдӕлтӕ, иудейаг паддзӕхтӕ ӕмӕ сӕ устытӕ, стӕй уӕхӕдӕг ӕмӕ уӕ бинойнӕгтӕ Иудейы зӕххыл ӕмӕ Йерусалимы уынгты цы фыдракӕндтӕ фӕкодтой, уыдон уӕ ферох сты, мыййаг? 10Абоны онг не’рсабыр стут ӕмӕ тӕрсгӕ нӕ кӕнут. Ме’Гъдау, Мӕ уагӕвӕрдтӕ, сымах ӕмӕ уӕ фыдӕлтӕн кӕй радтон, уыдон не’ххӕст кӕнут».

11Уымӕ гӕсгӕ Уӕларвӕфсады Бардарӕг, Израилы Хуыцау, афтӕ зӕгъы: «Ӕз сымахӕй уӕ фыдбылызӕн Ме’ргом аздахдзынӕн, ӕппӕт иудейӕгты ныццӕгъддзынӕн! 12Мысырмӕ ацӕуын ӕмӕ уым ӕрцӕрын чи сфӕнд кодта, уыцы иудейӕгтӕй ма чи аирвӕзт, уыдоны иууылдӕр фесафдзынӕн. Се’ппӕт дӕр Мысыры амӕлдзысты, кард ӕмӕ стонгӕй се сӕфт ссардзысты, стырӕй, чысылӕй. Адӕмтӕ сӕ ӕлгъитдзысты, сӕ уындӕй сӕ стыр тасы ӕфтаудзысты, сӕгад уыдзысты, ӕмӕ сӕ худинаджы кой айхъуысдзӕн. 13Йерусалимы сахар куыд бафхӕрдтон, афтӕ, Мысыры зӕххыл чи’рцарди, уыцы иудейӕгты дӕр кард, стонг ӕмӕ рынӕй бафхӕрдзынӕн.

14Иудейӕгтӕй ма чи аирвӕзт, Мысырмӕ чи ӕрбацыд ӕмӕ дзы чи ӕрцард, уыдонӕй ничи фервӕздзӕн, фӕстӕмӕ дзы Иудейы бӕстӕм цӕрынмӕ ничи раздӕхдзӕн. Уыдон бӕллынц раздӕхынмӕ ӕмӕ ногӕй Иудейы зӕххыл ӕрцӕрынмӕ, фӕлӕ иугай лидзджытӕй уӕлдай ничиуал раздӕхдзӕн фӕстӕмӕ».

15Сӕ устытӕ ӕндӕр хуыцӕуттӕн буд кӕй судзынц, уый цы нӕлгоймӕгтӕ зыдтой, стӕй, уыцы ран цы сылгоймӕгтӕ лӕууыдысты, уыдон ӕмӕ адӕм се’ппӕт дӕр, мысыраг Патросы цӕрджытӕ, Йеремиайӕн дзуапп радтой: 16«Дунедарӕджы номӕй нын ды цытӕ дзурыс, уыдӕттӕм нӕ хъусдзыстӕм. 17Мах нӕ сомытӕ дарддӕр ӕххӕст кӕндзыстӕм, уӕларвы ус-хуыцауӕн буд судздзыстӕм ӕмӕ йын сӕн калдзыстӕм, нӕхӕдӕг ӕмӕ нӕ фыдӕлтӕ, нӕ паддзӕхтӕ ӕмӕ нӕ фӕтӕгтӕ раздӕр Иудейы сахартӕ ӕмӕ Йерусалимы уынгты куыд кодтой, афтӕ. Уыцы заман мах уыдыстӕм ӕфсӕст ӕмӕ амондджын, фыдбылыз цы у, уый нӕ зыдтам. 18Уӕларвы ус-хуыцауӕн буд куынӕуал судзӕм ӕмӕ йын сӕн куынӕуал калӕм, уӕдӕй фӕстӕмӕ та алцӕмӕй дӕр хъуаг ӕййафӕм, кард ӕмӕ стонгӕй сӕфӕм».

19Сылгоймӕгтӕ та загътой: «Уӕларвы ус-хуыцауӕн буд куы сыгътам ӕмӕ йын сӕн куы калдтам, уӕд ӕй, ау, нӕ сӕрыхицӕуттӕ нӕ зыдтой, йӕ нывимӕ йын гуылтӕ кӕй фыцӕм, уый?»

20Уӕд Йеремиа адӕмӕн, усӕй, лӕгӕй, йӕ ныхмӕ чидӕриддӕр дзырдта, уыдонӕн се’ппӕтӕн дӕр загъта: 21«Сымах ӕмӕ уӕ фыдӕлтӕ, уӕ паддзӕхтӕ, уӕ фӕтӕгтӕ ӕмӕ бӕстӕйы адӕм Йерусалим ӕмӕ Иудейы сахарты будсудзӕн кӕй кодтой, Дунедарӕг уӕ, мыййаг, уый тыххӕй нӕ бафхӕрдта? Уыдӕттӕм кӕсгӕйӕ, нӕ рафыхти Йӕ маст? 22Дунедарӕгӕн Йӕ бон нал уыд уӕ фыдракӕндтӕм, уе’лгъаг митӕм кӕсын, ӕмӕ уӕ зӕхх ӕдзӕрӕг быдыр фестад, ӕлгъитынц ӕй, йӕ уындӕй алкӕй тасы ӕфтауы, ӕмӕ дзы иунӕг цӕрӕг дӕр нал баззад. 23Ӕндӕр хуыцӕуттӕн буд судзгӕйӕ, Дунедарӕджы раз фӕтӕригъӕдджын стут, Дунедарӕджы ныхасмӕ нӕ хъуыстат. Йе’Гъдау, Йӕ уагӕвӕрдтӕ ӕмӕ Йӕ фӕдзӕхстытӕ Йын не’ххӕст кодтат, ӕмӕ уыл ныр ацы бӕллӕх дӕр уымӕн ӕрцыди».

24Уый фӕстӕ Йеремиа ӕгас адӕмӕн, стӕй сылгоймӕгтӕн се’ппӕтӕн дӕр загъта: Мысыры цӕрӕг иудейӕгтӕ, уе’ппӕт дӕр Дунедарӕджы ныхасмӕ байхъусут! 25Уӕларвӕфсады Бардарӕг, Израилы Хуыцау, афтӕ зӕгъы: уӕ устытимӕ цӕмӕйдӕриддӕр зӕрдӕ бавӕрдтат, уыдӕттӕ кодтат! Сымах загътат: «Сӕххӕст кӕндзыстӕм нӕ сомы, уӕларвы ус-хуыцауӕн буд судздзыстӕм ӕмӕ йын сӕн калдзыстӕм». Уӕдӕ сӕххӕст кӕнут уӕ сомытӕ! 26Фӕлӕ байхъусут Дунедарӕджы ныхасмӕ, Мысыры цӕрӕг иудейӕгтӕ! Ард хӕрын Мӕ хъомысджын номӕй, — зӕгъы Дунедарӕг, — Мысыры зӕххыл чи цӕры, уыцы иудейӕгтӕй Мӕ ном никуыуал ничи сдзурдзӕн ӕмӕ уыдонӕй афтӕ ничиуал зӕгъдзӕн: «Цардӕгас у Дунедарӕг Хуыцау!» 27Ӕз уӕм ӕдзухдӕр Мӕ цӕст дардзынӕн — уӕ фарнӕн нӕ, фӕлӕ уӕ фыдбылызӕн! Иудейӕгтӕ Мысыры зӕххыл кард ӕмӕ стонгӕй мӕлдзысты, цалынмӕ бынтон фесӕфой, уӕдмӕ. 28Ӕрмӕстдӕр дзы иуӕй-иутӕ аирвӕздзысты кардӕй ӕмӕ Мысыры зӕххӕй Иудеймӕ раздӕхдзысты. Ӕмӕ уӕд, Мысырмӕ цӕрынмӕ чи’рбацыди, уыцы иудейӕгтӕй ма чи аирвӕза, уыдон базондзысты, Мӕн ӕви уыдоны ныхас сӕххӕст ис, уый. 29Мӕнӕ уын, — зӕгъы Дунедарӕг, — ацы зӕххыл уӕ кӕй бафхӕрдзынӕн, уый нысан. Зонут: Мӕ ныхӕстӕ сӕххӕст уыдзысты уӕ фыдбылызӕн.

30Дунедарӕг афтӕ зӕгъы: «Ӕз Мысыры паддзахы, фараон Хофрайы, йӕ мӕлӕтмӕ цы знӕгтӕ бӕллынц, уыдоны къухмӕ ратдзынӕн. Иудейаг паддзах Цедекиайы дӕр, йӕ мӕлӕтмӕ чи бӕллыд, уыцы знаджы, Вавилоны паддзах Навуходоносоры къухмӕ афтӕ радтон».