‏ Job 30

1Ныр та мыл мӕхицӕй кӕстӕртӕ худынц,
мӕ фыййау куыйтӕм дӕр
хӕстӕг кӕй нӕ бауагътаин, уыдон:
2сӕ къухты хъару мӕ кӕм хъӕуы,
стӕй ма сӕм цӕй хъару ис?
3Ӕххормаг ӕмӕ гӕвзыккӕй
басасти сӕ хъару,
афтӕмӕй хъеллау кодтой
гӕныстон быдырты, тары.
4Маст кӕрдӕджытӕ ӕууылдтой,
ӕхсӕлыйы уидаг — сӕ хойраг.
5Адӕм сӕ ӕввахс нӕ уагътой сӕхимӕ,
сӕ фӕдыл-иу хъӕр кодтой,
цыма къӕрныхтӕ уыдысты, уыйау.
6Ахӕмтӕ хуыскъ адӕгты скӕнынц бынат,
къӕдзӕхы’хсӕнты, зӕххы скъуыдты ӕрцӕрынц.
7Къутӕртӕй сӕ ниуын цӕуы,
хӕмпӕлгӕрдӕджы бын батымбылтӕ вӕййынц.
8Хъодыгонд адӕм,
ном кӕмӕн нӕй, уыцы фидиссӕгтӕ,
алы ранӕй дӕр — тард!
9Ӕмӕ ма суанг уыдонӕн дӕр
ӕз фӕндырты цӕгъдинаг фӕдӕн.
10Былысчъилӕй мӕ сӕхи иуварс ласынц,
ӕнӕфсӕрмӕй мыл ту кӕнынц.
11Ӕдых, ӕнӕбон мӕ скодта Хуыцау,
ӕмӕ сӕ бӕттӕнтӕ райхӕлдтой.
12Рахизӕрдыгӕй мыл сӕхи ныццӕвынц,
ӕмӕ куы ахауын, уӕд сӕхи
марынмӕ ӕрцӕттӕ кӕнынц.
13Мӕ фӕндӕгтӕ мын сӕхгӕдтой,
фыдбылыз мын цӕттӕ кӕнынц,
ӕмӕ сӕ бауромӕг нӕй.
14Цыма искуыцӕй раирвӕзтысты,
уыйау мыл ӕваст сӕхи ныццавтой.
15Дудгӕбон акодта мӕ сӕрыл,
мӕ кад мын дымгӕмӕ ныддардӕуыд,
мӕ цардамонд ӕврагъау атади.
16Хъизӕмарӕй мӕлын,
саубон мыл акодта.
17Ме стджыты рыстӕй
ӕхсӕвыгон ӕнцой нал зонын.
18Мӕ дарӕс мын скъуынынц мӕ уӕлӕ,
ме’фцӕгготмӕ мын лӕбурынц.
19Цъыфы мӕ ныппӕрста Уый,
ӕмӕ рыг фестадтӕн, бартхутӕг дӕн.
20О Хуыцау, дзыназын Дӕм,
фӕлӕ мын дзуапп нӕ дӕттыс,
Дӕ разы лӕууын,
фӕлӕ мӕм Ды кӕсгӕ дӕр нӕ кӕныс.
21Ӕгъатыр сдӕ мемӕ,
Дӕ хъомысджын къух мӕ не здахыс.
22Дӕ уӕлныхты мӕ фелвӕстай,
дымгӕмӕ мӕ ныддардтай,
мӕ бындзарӕй мӕ ныууыгътай.
23Зонын ӕй, маргӕ мӕ кӕныс,
удӕгӕстӕ иууылдӕр кӕдӕм бацӕуынц,
уырдӕм у мӕ фӕндаг.
24Ӕнӕуи дӕр, мӕлӕты къахыл чи лӕууы
ӕмӕ фӕдисхъӕр чи кӕны,
уымӕ ма йӕ къух чи сисы?
25Ау, зын раны чи бахауди,
уыдоныл нӕ хъыг кодтон?
Ау, мӕ зӕрдӕ нӕ рысти
мӕгуыры тӕригъӕдӕй?
26Хорзмӕ куы’нхъӕлмӕ кастӕн,
уӕд мӕ сӕр фыдбылыз баййӕфта,
рухсмӕ куы’нхъӕлмӕ кастӕн,
уӕд мыл бон баталынг ис.
27Мӕ хуылф мӕстӕй судзы ӕдзухдӕр,
сау бонтӕ мӕ уӕгъд нӕ уадзынц.
28Сӕудары хъеллау кӕнын,
адӕммӕ ӕххуысмӕ сидын.
29Хъӕддаг куыйтӕн ӕфсымӕр сдӕн,
страустӕн — хӕлар.
30Мӕ царм ныссау ис, алӕбырди мӕ уӕлӕ,
ме стджытӕ мӕ буары тӕвдӕй судзынц.
31Мӕ хъисфӕндыр хъарӕг кӕны,
мӕ уадындз дзыназы, кӕуӕгау.