‏ Job 6

Иовы дзуапп Елифазӕн

1Ӕмӕ дзуапп радта Иов: 2«Тӕхуды, мӕ рисӕн сбарӕн куы уаид,
мӕ мастӕн — тӕрӕзтыл ӕрӕвӕрӕн!
3Уӕд денджызы змисӕй уӕззаудӕр уаид,
мӕ дзыхы дӕр ныхас уымӕн нӕ бады.
4Ӕппӕтхъомысы фӕттӕ мӕ ахызтысты,
марг дарынц мӕ удӕн,
фыртас мыл бафтыдта Хуыцау.
5Искуыдӕр ма хъӕддаг хӕрӕг
хизгӕ-хизын фӕуасы?
Искуыдӕр ма гал
йӕ кӕвдӕсы раз богътӕ фӕкӕны?
6Ӕдзӕхх хойраг адӕн кӕмӕн у?
Айчы урсы цӕй ад ис?
7Ахӕм хойрагыл бандзӕвон,
уый дӕр мын ӕнад у,
ныр ме’намонд сси мӕ хойраг.
8Тӕхуды, куы сӕххӕст уаид мӕ курдиат,
куы нӕ мын фӕсаид ме’нхъӕлц Хуыцау!
9Тӕхуды, Хуыцауы мӕ ныцъцъист кӕнын куы бафӕндид
ӕмӕ мын мӕлӕтдзаг цӕф куы ныккӕнид!
10Мӕ зӕрдӕ фӕлӕууид уӕд,
ӕмӕ раин мӕ хъизӕмӕртты,
уымӕн ӕмӕ никуы атигъ кодтон мӕхи
Уаз Хуыцауы ныхӕстыл!
11Цы ныфсӕй фӕразон,
хъару мӕм куынӕуал ис?
Цы уыдзӕн мӕ кӕрон? Цы ма у мӕ цард?!
12Исты мын дуры фидар ис?
Исты ӕфсӕйнагӕй конд дӕн?
13Мӕхицӕн ӕххуыс мӕхимидӕг агурон,
цавӕр ӕнцой мын ис?
14Дӕ тыхст хӕларӕн батӕригъӕд кӕн,
Хуыцауы тас ӕм куынӕуал уа, уӕддӕр.
15Фӕлӕ мӕныл ме’фсымӕртӕ
тагъд донау сӕ зӕрдӕ сивтой,
уалдзыгон донвӕдау раив-баив кӕнынц.
16Уыдон — ихы бын сау ӕрсдонау,
йӕ мидӕг миты фӕзгъӕртӕ
кӕмӕн ленк кӕны.
17Ӕнтӕфы айсысынц,
ӕмӕ сӕ донвӕд сурӕй аззайы.
18Уыдоны аххосӕй
чырӕласджытӕ фӕдзӕгъӕл вӕййынц,
ӕдзӕрӕг быдыры сӕ мӕлӕт ссарынц.
19Дзӕгъӕлы сӕ фӕагурынц
темайаг чырӕтӕ,
сӕ зӕрдӕ сыл дарынц
савайаг фӕндаггӕттӕ;
20сӕ зӕрдӕдарӕн мӕнг разындзӕн,
фыдӕнхъӕл фӕуыдзысты,
хуыскъ ададжы цурмӕ
куы бахӕццӕ уой, уӕд.
21Сымах дӕр уыдоны хуызӕн —
мӕ дудгӕбон мын федтат ӕмӕ фӕтарстыстут.
22Куы ницы уӕ агуырдтон,
уӕ мулкӕй уын мӕ тӕрхонгӕнӕгӕн
гӕртам куы нӕ домдтон!
23Куы нӕ уын загътон:
„Ме знӕгтӕй мӕ фервӕзын кӕнут,
ме’фхӕрджытӕн мын ахӕстаргъ бафидут!“
24Зонд мын бацамонут,
ӕмӕ мӕ дзых сӕхгӕнон,
цы фӕрӕдыдтӕн,
уый мын бамбарын кӕнут.
25Ӕргом ныхас зын уромӕн у,
фӕлӕ уӕ уайдзӕфтӕ
куы ницы марынц!
26Мӕ ныхӕстӕм мын
фау ӕрхӕссынмӕ хъавут?
Ӕмӕ сӕ дымгӕйы хай куы бакодтат?
27Сымах сидзӕры тыххӕй
хӕлттӕ ӕппарут,
уӕ хӕларӕн дзыхъхъ къахут.
28Ӕрбакӕсут-ма мӕм,
уӕхи раз уӕ нӕ асайдзынӕн!
29Уӕхи ӕрӕмбарут, фыддзинад ма’руадзут,
ӕрбайхъусут, ме’рдыгӕй ис рӕстдзинад!
30Ау, ме’взаг сайгӕ кӕны,
ау, мӕ ком мӕнгдзинады ад нал иртасы?!