Jos 17 | OssIBT2022 | STEP | Йӕ хал схаудта Йосефы фыццаг зӕнӕг Менассиайы хӕдзарвӕндагӕн дӕр. Менассиайы фыццаг зӕнӕг Махирӕн — Галаады фыдӕн — йӕ байзӕддӕгтӕ хъӕбатыр хӕстонтӕ кӕй уыдысты, уымӕ гӕсгӕ сӕ хай — Галаад ӕмӕ Башан

‏ Joshua 17

Менассиайы хӕдзарвӕндаджы хай

1 Йӕ хал схаудта Йосефы фыццаг зӕнӕг Менассиайы хӕдзарвӕндагӕн дӕр. Менассиайы фыццаг зӕнӕг Махирӕн — Галаады фыдӕн — йӕ байзӕддӕгтӕ хъӕбатыр хӕстонтӕ кӕй уыдысты, уымӕ гӕсгӕ сӕ хай — Галаад ӕмӕ Башан — райстой раздӕр. 2 Уыцы халмӕ гӕсгӕ зӕххытӕ райстой Менассиайы байзӕддаджы иннӕ мыггӕгтӕ дӕр: Авиезеры мыггаг, Хелекы мыггаг, Асриелы мыггаг, Шехемы мыггаг, Хеферы мыггаг, Шемидайы мыггаг. Авиезер, Хелек, Асриел, Шехем, Хефер, Шемида сты Йосефы фырт Менассиайы нӕлгоймаг-байзӕддӕгтӕ ӕмӕ сӕ мыггӕгты фыдӕлтӕ. 3 Цалфахадӕн (йӕ фыдӕлтӕ хистӕрӕй кӕстӕрмӕ: Менассиа, Махир, Галаад ӕмӕ Хефер) фырттӕ нӕ уыди, фӕлӕ ӕрмӕст чызджытӕ: Махла, Ноа, Хогла, Милка ӕмӕ Тирца. 4 Чызджытӕ сауджын Елеазармӕ, Нуны фырт Йешуамӕ ӕмӕ адӕмы хицӕуттӕм бацыдысты ӕмӕ сын загътой: «Дунедарӕг Моисейӕн бафӕдзӕхста не’фсымӕрты ӕмрӕнхъ махӕн дӕр фыдӕй-фыртмӕйы исбонӕн зӕххытӕ раттын». Ӕмӕ сын Дунедарӕджы фӕдзӕхстмӕ гӕсгӕ сӕ фыды ӕфсымӕртау лӕвӕрд ӕрцыди зӕххытӕ. 5 Афтӕмӕй Иорданы скӕсӕнварс Галаады ӕмӕ Башаны зӕххытӕй уӕлдай Менассиайы хӕдзарвӕндагмӕ ӕрхауди дӕс хайы, 6 уымӕн ӕмӕ Менассиайы байзӕддӕгтӕ, чызджытӕ, фыдӕй-фыртмӕйы исбон райстой йӕ нӕлгоймаг байзӕддӕгты ӕмрӕнхъ. Галаады зӕхх та ӕрхауди Менассиайы иннӕ байзӕддӕгтӕм.

7 Менассиайы зӕхх Ашерӕй аххӕссыд Михметаты онг, уый ис Шехемы акомкоммӕ. Уырдыгӕй Менассиайы арӕн йӕхи айтыгъта хуссарӕрдӕм, Ен-Таппуахы донгуырӕны цур Йашувы онг. 8 Таппуахы алыварс зӕхх баци Менассиайы хай, Менассиайы арӕныл Таппуахы сахар йӕхӕдӕг та — Ефремы байзӕддӕгты хай. 9 Дарддӕр арӕн ӕрхызти Канайы тӕрфмӕ. Уырдыгӕй хуссарӕрдӕм сахартӕ сты Ефремы, кӕд Менассиайы сахарты ӕхсӕн сты, уӕддӕр. Дарддӕр Менассиайы арӕн цыди тӕрфы цӕгатвӕрсты ӕмӕ ӕххӕссыди суанг Зӕххастӕуы денджызмӕ. 10 Хуссары зӕххытӕ сты Ефремы, цӕгаты зӕххытӕ та — Менассиайы. Сӕ арӕн уыди Зӕххастӕуы денджыз. Цӕгатӕрдыгӕй ӕмарӕн уыдысты Асиримӕ, скӕсӕнӕрдыгӕй та — Иссахаримӕ. 11 Иссахары ӕмӕ Асиры зӕххыл Менассиамӕ ӕрхаудысты Бет-Шеан, Ивлеам, Дор, Ен-Дор, Таанах ӕмӕ Мегиддо сӕ сахаргӕрӕттимӕ. 12 Фӕлӕ Менассиайы байзӕддӕгты бон нӕ бацис уыцы сахартӕ байсын, ӕмӕ ханаанӕгтӕ ацы зӕххыл цӕргӕйӕ баззадысты. 13 Фӕстӕдӕр та израилӕгтӕ сӕ тыхы куы бацыдысты, уӕд ханаанӕгтӕй цагъайрӕгтӕ скодтой, фӕлӕ сӕ нӕ фӕсырдтой.

Йосефы байзӕддӕгтӕ сӕ хъаст хӕссынц Йешуамӕ

14 Иуахӕмы Йосефы байзӕддӕгтӕ Йешуайӕн загътой: «Иунӕг хал нын цӕмӕн сӕппӕрстай ӕмӕ нын иу хай йеддӕмӕ цӕуылнӕ радтай фыдӕй-фыртмӕйы исбонӕн, Дунедарӕджы арфӕйӕ тынг куы сбирӕ стӕм, уӕд?» 15 Йешуа сын дзуапп радта: «Кӕд афтӕ сбирӕ стут, ӕмӕ уын Ефремы хӕхбӕстӕ скъуындӕг ис, уӕд марадзут, хъӕдбӕстӕм балидзут ӕмӕ уым периззӕгтӕ ӕмӕ рефаимты зӕххыл уӕхицӕн бынат ӕрсыгъдӕг кӕнут». 16 Йосефы байзӕддӕгтӕ загътой: «Хӕхбӕстӕ нын скъуындӕг ис цӕрынӕн. Дӕлвӕзы чи цӕры, уыцы ханаанӕгтӕм та — Бет-Шеан ӕмӕ йӕ сахаргӕрӕтты, стӕй Изреелы дӕлвӕзы — ис ӕфсӕндзагъд хӕстон уӕрдӕттӕ». 17 Уӕд Йешуа Йосефы хӕдзарвӕндагӕн — Ефремы ӕмӕ Менассиайы байзӕддӕгтӕн — загъта: «Бирӕ адӕм стут, ӕмӕ уӕ хъару дӕр бирӕ у. Уымӕ гӕсгӕ иу халӕй нӕ ахицӕн уыдзӕн уӕ хай, 18 фӕлӕ хъӕдбыны хӕхбӕстӕ дӕр сымах уыдзӕн. Ӕрсыгъдӕг ӕй кӕнут, ӕмӕ хохрӕбынтимӕ уӕхи бауыдзӕн. Ханаанӕгтӕм та кӕд ӕфсӕндзагъд уӕрдӕттӕ ис ӕмӕ цыфӕнды тыхджын сты, уӕддӕр сӕ фӕсурдзыстут».