Judg 14 | OssIBT2022 | STEP | Иу хатт Самсон Тимнайы сахармӕ ацыд ӕмӕ дзы иу филистимаг чызджы федта.

‏ Judges 14

Самсон ус ракуырдта

1 Иу хатт Самсон Тимнайы сахармӕ ацыд ӕмӕ дзы иу филистимаг чызджы федта. 2 Сӕхимӕ куы ӕрыздӕхт, уӕд йӕ фыд ӕмӕ йӕ мадӕн загъта: «Тимнайы сахары иу филистимаг чызджы федтон, ӕмӕ мын ӕй ракурут». 3 Фӕлӕ йын йӕ фыд ӕмӕ йӕ мад загътой: «Ау, нӕ мыггаг ӕмӕ нӕ адӕмы’хсӕн сылгоймӕгтӕ нал ис? Ӕнӕсунӕт филистимӕгтӕй ус ракурын цӕмӕн сфӕнд кодтай?» Самсон дзуапп радта: «Ракурут мын уыцы чызджы, мӕ зӕрдӕмӕ фӕцыди». 4 Уыцы заман израилӕгтӕ уыдысты филистимӕгты дӕлбар. Дунедарӕджы фӕндыд, цӕмӕй филистимӕгтӕ сӕхӕдӕг загъд ракъахой. Самсоны фыд ӕмӕ мад нӕ зыдтой, уыцы хъуыддаг Дунедарӕгӕй кӕй рацыди, уый.

5 Самсон йӕ ныййарджытимӕ Тимнайы сахармӕ ацыд. Сахары сӕндӕттӕм куы бахӕццӕ сты, уӕд Самсоны размӕ рыхгӕ иу лӕппын домбай разгъордта. 6 Дунедарӕджы Уд ӕртыхсти Самсоныл, ӕмӕ домбайы йӕ къухтӕй сӕныччы скъуыдтӕ акодта. Уыцы хабар йӕ фыд ӕмӕ йӕ мадӕн нӕ радзырдта.

7 Самсон Тимнайы сахармӕ ӕрбацыд ӕмӕ, чызгимӕ куы аныхас кодта, уӕд йӕ зӕрдӕмӕ ноджы тынгдӕр фӕцыди. 8 Цасдӕр рӕстӕджы фӕстӕ Самсон ногӕй ӕрбацыди Тимнамӕ — чызджы курынмӕ. Фӕндагыл, цы домбайы амардта, уый фенынмӕ баздӕхти. Домбайы марды разынди мыд ӕмӕ бирӕ мыдыбындзытӕ. 9 Самсон мыдӕй йӕ армы дзаг систа ӕмӕ дарддӕр хӕргӕ араст ис. Йӕ ныййарджыты куы баййӕфта, уӕд мыдӕй уыдонӕн дӕр авӕрдта, фӕлӕ сын, домбайы мардӕй йӕ кӕй систа, уый нӕ загъта.

10 Ӕмӕ мӕнӕ Самсоны фыд чызджы хӕдзармӕ бацыди. Усгур лӕппуты’гъдаумӕ гӕсгӕ Самсон уым куывд скодта. 11 Фысымтӕ йӕ ӕрбацӕугӕ куы федтой, уӕд ын фынгӕмбӕлттӕн дӕс ӕмӕ ссӕдз адӕймаджы ӕрбахуыдтой. 12 Самсон сын загъта: «Цӕй ӕмӕ уын уыци-уыци радзурон. Куывд авд боны фӕстӕ фӕуыдзӕнис, ӕмӕ йӕ кӕд уӕдмӕ базонат, уӕд уын ратдзынӕн дӕс ӕмӕ ссӕдз хӕдоны гӕнӕй уафт хъуымацӕй, стӕй ма ноджыдӕр дӕс ӕмӕ ссӕдз фӕлысты. 13 Куынӕ йӕ базонат, уӕд та мын гӕнӕй уафт хъуымацӕй дӕс ӕмӕ ссӕдз хӕдоны сымах ратдзыстут, стӕй дӕс ӕмӕ ссӕдз фӕлысты». Уыдон ын дзуапп радтой: «Цӕй, радзур нын дӕ уыци-уыци, хъусӕм дӕм». 14 Самсон сын загъта: «Иннӕты чи хордта, уый йӕхӕдӕг сси хӕринаг, тыхджын сси адджын». Филистимӕгтӕ ӕртӕ боны фӕхъуыды кодтой, фӕлӕ уыци-уыци сӕ бон базонын нӕ уыди. 15 Куывды цыппӕрӕм бон куы ралӕууыд, уӕд Самсоны усӕн загътой: «Дӕ сӕрыхицауы ракъах, ӕмӕ уыци-уыцийӕн йӕ дзуапп схъӕр кӕна. Науӕд дын дӕхи дӕр ӕмӕ дӕ бинонты дӕр басудздзыстӕм. Цӕмӕн нӕм фӕдзырдтат? Цӕмӕй нӕ бастигъат, уымӕн?» 16 Уӕд ус, цӕссыгкалгӕ, Самсонӕн загъта: «Нал мӕ уарзыс! Мӕ хӕстӕджытӕн мын уыци-уыци радзырдтай ӕмӕ йын йӕ дзуапп мӕнӕн дӕр нӕ дзурыс!» Самсон ын афтӕ зӕгъы: «Мӕ ныййарджытӕн куы ницы схъӕр кодтон, уӕд ӕй дӕуӕн цӕмӕн хъуамӕ радзурон?» 17 Ус ӕнӕхъӕн авд боны, цалынмӕ куывд цыди, уӕдмӕ фӕкуыдта ӕмӕ йӕ сӕрыхицауы иу ран нал уагъта. Самсон дзы стыхсти ӕмӕ йын ӕвдӕм бон уыци-уыцийы дзуапп загъта, уый та йӕ радзырдта филистимӕгтӕн. 18 Ӕвдӕм бон, хур нӕма аныгуылд, афтӕ сахары цӕрджытӕ Самсонӕн дзуапп радтой: «Цы ис мыдӕй адджындӕр? Чи у домбайӕ тыхджындӕр?» Самсон сын загъта: «Мӕ дыгӕрдыгыл мын куынӕ хуым кодтаиккат, уӕд мын мӕ уыци-уыци нӕ базыдтаиккат».

19 Дунедарӕджы Уд Самсоныл ӕртыхсти. Самсон Ашкелонмӕ ацыд ӕмӕ уым дӕс ӕмӕ ссӕдз лӕджы амардта. Сӕ дарӕстӕ сын раласта ӕмӕ сӕ, уыци-уыци чи базыдта, уыдонӕн радта. Уый фӕстӕ мӕстджынӕй йӕ фыды хӕдзармӕ раздӕхти. 20 Самсоны усы та йӕ сиахсӕмбӕлттӕй иуӕн радтой.