‏ Lamentations 5

1О Дунедарӕг! Ӕрымыс нӕ, ӕркӕс нӕм,
нӕ худинаг нын фен!
2Нӕ исбон не знӕгтӕм куы’рхауди,
нӕ хӕдзӕрттӕ — ӕцӕгӕлӕттӕм!
3Куы баззадыстӕм сидзӕртӕй, ӕнӕ фыдӕй,
нӕ мадӕлтӕ идӕдзтӕ систы!
4Куы’лхӕнӕм доны хъуыртт ӕхцайӕ,
нӕхи сугӕн куы фидӕм!

5Хӕстӕг у не знаг, басаста нын нӕ хъару.
О, сулӕфын куынӕуал у нӕ бон!
6Мысырӕгтӕй, ассириӕгтӕй
ӕххуыс куы агурӕм,
цӕмӕй къӕбӕрӕй бафсӕдӕм!
7Нӕ фыдӕлтӕ тӕригъӕдтӕ фӕкодтой,
ныр уыдон нал сты, фӕлӕ сӕ фидӕм мах!
8Цагъайрӕгтӕ нын хицӕуттӕ куы систы,
фервӕзын сӕ куынӕуал у нӕ бон!

9Нӕ цардыл н’ ауӕрдгӕйӕ, агурӕм къӕбӕр:
ӕдзӕрӕг быдыры нӕ фӕдыл зилы кард!
10Цыма нӕ’фсӕйнаг пецы басыгъдӕуыд, уыйау
ӕххормагӕй нӕ царм ныссау ис!
11Сионы худинаг кӕнынц нӕ устыты,
иудейаг сахарты — нӕ чызджыты!
12Фыдгултӕ нын ӕрцауыгътой нӕ фӕтӕгты,
сӕгад сты нӕ хистӕртӕ!
13Нӕ тырынтӕ куыройы фыдтӕ зилынц,
фӕкӕлынц сугты бын нӕ лӕппутӕ!
14Кулдуары раз нал бадынц нӕ зӕрӕдтӕ,
нӕ зарынц лӕппутӕ!

15Нӕ зӕрдӕты куы амард цин,
нӕ кафт куы раивта кӕуынӕй!
16Нӕ кады худтӕ
куы’рхаудысты нӕ сӕртӕй!
О, додойаг куы фестӕм мах
нӕ тӕригъӕды аххосӕй!
17Нӕ зӕрдӕтӕ фӕйнӕрдӕм тонынц,
нӕ цӕстыты рухс бамынӕг.
18О, сафтид ис Сионы хох,
хъӕддаг куыйтӕ йыл зилынц!

19О Дунедарӕг! Ды паддзахиуӕг кӕныс ӕнусмӕ!
Дӕ паддзахы бадӕн — мыггагӕй мыггагмӕ!
20Цӕмӕн нӕ ныууагътай уый бӕрц рӕстӕгмӕ?
Цӕуылнӕ нӕ ӕрымысыдтӕ ныронг?
21О Дунедарӕг! Раздах нӕ Дӕхимӕ,
ӕмӕ уӕд раздӕхдзыстӕм.
О, ратт нын ногӕй рагзаманты цард!
22Ау, бынтон нӕ аппӕрстай Дӕхицӕй?
Дӕ мастӕн нӕй кӕрон?