Lev 22 | OssIBT2022 | STEP | Дунедарӕг Моисейӕн загъта:

‏ Leviticus 22

Кувинагӕй хӕрыны бар кӕмӕн ис

1 Дунедарӕг Моисейӕн загъта: 2 «Фехъусын кӕн Аарон ӕмӕ йӕ фырттӕн: израилӕгтӕ Хуыцауӕн цы кувинӕгтӕ’рбахӕссынц, уыдонимӕ арӕхстгай архайут, Мӕ уаз ном Мын ма фегад кӕнут. Ӕз Дунедарӕг дӕн. 3 Фӕлтӕрӕй-фӕлтӕрмӕ израилӕгтӕ Дунедарӕгӕн цы кувинӕгтӕ хӕссынц, уыдонмӕ уӕ байзӕддӕгтӕй ӕнӕсыгъдӕгӕй исчи куы бавнала, уӕд ӕй Ӕз фесафдзынӕн, нал ӕрлӕудзӕн Мӕ разы. Ӕз — Дунедарӕг.

4 Аароны байзӕддӕгтӕй хъотырӕй рынчын чи уа кӕнӕ йӕ цъӕй кӕмӕн миза, уый кувинӕгтӕй ма хӕрӕд, цалынмӕ ссыгъдӕг уа, уӕдмӕ. Мардыл бандзӕвынӕй цы дзаума фӕчъизи ис, ууыл чи бандзӕва, йӕ мыг йӕхи’гъдауӕй кӕмӕн акӕла, 5 исты ӕнӕсыгъдӕг хилӕгой кӕнӕ ӕнӕсыгъдӕг адӕймагыл чи бандзӕва (цавӕрфӕнды ӕнӕсыгъдӕгдзинад дӕр уӕд), 6 — уыдӕттӕй истӕуыл чидӕриддӕр бандзӕва, уый изӕрмӕ ӕнӕсыгъдӕг уыдзӕн. Цалынмӕ йӕхи нӕ цынайа, уӕдмӕ йын кувинӕгтӕй хӕрыны бар нӕй. 7 Хур куы аныгуыла, уӕд ссыгъдӕг уыдзӕн, ӕмӕ уӕд йӕ бон уыдзӕни кувинӕгтӕй бахӕрын, уымӕн ӕмӕ уый йӕ хойраг у.

8 Аароны байзӕддӕгтӕй хӕдмӕл фыд кӕнӕ, сырдтӕ кӕй ныттыдтой, ахӕм цӕрӕгойы фыд мачи бахӕрӕд — фӕчъизи уыдзӕн. Ӕз Дунедарӕг дӕн. 9 Мӕ уагӕвӕрдтӕ Мын ӕххӕст кӕнӕнт, цӕмӕй тӕригъӕды ма бацӕуой ӕмӕ ма амӕлой, сӕхи сыл кӕй атигъ кодтой, уый тыххӕй. Ӕз Дунедарӕг дӕн, уаз Кӕй фӕрцы сты, Уый.

10 Ӕддагон ма бахӕрӕд кувинӕгтӕй: нӕдӕр сауджынӕн йӕ уазӕг, нӕдӕр йе’ххуырст. 11 Фӕлӕ, сауджын ӕлхӕнгӕ кӕй бакӕна, уымӕн йӕ бон у кувинӕгтӕй хӕрын. Сауджыны хойрагӕй хӕрын ӕмбӕлы, йӕ хӕдзары чи райгуыра, уыцы цагъарӕн дӕр. 12 Сауджыны чызг, сауджынты мыггагӕй чи нӕу, ахӕммӕ куы смой кӕна, уӕд ын кувинӕгтӕй хӕрыны бар нӕ уыдзӕн. 13 Фӕлӕ идӕдзӕй куы баззайа кӕнӕ йӕ лӕгӕй куы ахицӕн уа ӕмӕ, цот ын нӕ рацыди, афтӕмӕй фӕстӕмӕ йӕ цӕгатмӕ куы раздӕха, уӕд ын йӕ фыды хойрагӕй хӕрыны бар уыдзӕн. Ӕддагӕттӕй дзы мачи фӕхъӕстӕ уӕд.

14 Кувинагӕй ӕнӕбары чи бахӕра, уый-иу сауджынӕн уыцы кувинаджы аргъ бафидӕд, ноджы ма-иу ӕм йӕ аргъы фӕндзӕм хай дӕр бафтауӕд. 15 Сауджынтӕ дӕр-иу, израилӕгтӕ Дунедарӕгӕн цы уаз хуынтӕ ӕрбахӕссынц, уыдон ма фӕчъизи кӕнӕнт. 16 Ма дзы хӕрӕнт, ма бацӕуӕнт тӕригъӕды, науӕд сӕ азым фидинаг фӕуыдзӕн. Ӕз Дунедарӕг дӕн, уаз Кӕй фӕрцы сты, Уый».

Сахъат фос нывондӕн хӕссӕн нӕй

17 Дунедарӕг Моисейӕн загъта: 18 «Фехъусын кӕн Аарон ӕмӕ йӕ фырттӕн, стӕй ӕппӕт израилӕгтӕн: Израилы адӕмӕй кӕнӕ се’хсӕн цӕрӕг ӕрцӕуӕггӕгтӕй исчи сомыйы фӕдыл кӕнӕ барвӕндӕй Дунедарӕгӕн иууылсудзинаг нывонд куы хӕсса, 19 уӕд, цӕмӕй Хуыцауы зӕрдӕ балхӕна, уый тыххӕй йӕ нывонд хъуамӕ уа ӕнӕсахъат ӕмӕ нӕл: гал, фыр кӕнӕ цӕу. 20 Сахъат фос нывондӕн ма хӕссут, уымӕн ӕмӕ барст нӕ уыдзӕн.

21 Исчи сомыйы фӕдыл кӕнӕ йӕ зӕрдӕйы фӕндонмӕ гӕсгӕ стурвосӕй кӕнӕ лыстӕг фосӕй фидыды нывонд куы хӕсса Дунедарӕгӕн, уӕд, цӕмӕй барст ӕрцӕуа, уый тыххӕй равзарӕд ӕнӕсахъат фос, иу аипп дӕр кӕмӕ нӕ уа, ахӕм. 22 Куырм, сахъат кӕнӕ уӕнгсаст чи у, хӕфдзӕстытӕ, хӕлмаг кӕнӕ уыдырн кӕуыл ис, ахӕм фос Дунедарӕгӕн ма хӕссут арты нывондӕн, ма сӕ ӕвӕрут Дунедарӕджы нывондхӕссӕныл. 23 Стур кӕнӕ фысӕн йӕ къӕхтӕ ӕгӕр даргъ кӕнӕ ӕгӕр цыбыр куы уой, уӕд ӕй ис ӕрхӕссӕн бархийы нывондӕн. Сомыйы нывондӕн ӕй нӕй ӕрхӕссӕн, уымӕн ӕмӕ барст нӕ уыдзӕн. 24 Йӕ хъӕппытӕ цъӕл, пырх, тынд кӕмӕн сты кӕнӕ ӕрдызт чи у, ахӕм фос-иу Дунедарӕгӕн нывондӕн ма хӕссут. Ахӕм ми ма бакӕнут уӕ зӕххыл. 25 Ӕцӕгӕлӕттӕй дӕр ма райсут ахӕм фос уӕ Хуыцауӕн нывондӕн ӕрхӕссынӕн. Сахъат кӕй сты ӕмӕ сӕм аиппытӕ кӕй ис, уымӕ гӕсгӕ барст нӕ уыдзысты».

26 Дунедарӕг Моисейӕн загъта: 27 «Ногзад род, уӕрыкк кӕнӕ сӕныччы авд боны ныууадзын хъӕуы йӕ мадимӕ, ӕстӕм бонӕй фӕстӕмӕ йӕ Дунедарӕгӕн нывондӕн ӕрхӕссын ӕмбӕлы. 28 Хъуг кӕнӕ фысы йӕ род кӕнӕ йӕ уӕрыккимӕ уыцы иу бон ма ӕргӕвдут.

29 Дунедарӕгӕн арфӕйы нывонд куы хӕссат, уӕд ӕй ӕрхӕссут афтӕ, цӕмӕй барст уа. 30 Бахӕрын ӕй хъӕуы тӕккӕ уыцы бон, райсоммӕ дзы мацы ныууадзут. Ӕз Дунедарӕг дӕн.

31 Мӕ фӕдзӕхстытӕ Мын ӕххӕст кӕнут. Ӕз Дунедарӕг дӕн. 32 Мӕ уаз ном Мын ма фегад кӕнут, уазыл Мӕ нымайӕнт израилӕгтӕ. Ӕз Дунедарӕг дӕн, сымах уаз Кӕй фӕрцы стут, Уый. 33 Ӕз уӕ ракодтон Мысыры зӕххӕй, цӕмӕй уон уӕ Хуыцау. Ӕз Дунедарӕг дӕн».