‏ Leviticus 23

Израилы адӕмы бӕрӕгбӕттӕ

1Дунедарӕг Моисейӕн бафӕдзӕхста, 2цӕмӕй израилӕгтӕн зӕгъа: «Мӕнӕ — Дунедарӕджы бӕрӕгбӕттӕ, ӕмӕ-иу хъуамӕ уазӕмбырдтӕ скӕнат. Уыцы бонтӕ снысан кодтон Мӕхӕдӕг.

Сабат

3Ӕхсӕз боны кусут, ӕвдӕм бон та ӕнцойбон у — сабат, уыцы бон-иу уазӕмбырд скӕнут. Мацы-иу бакусут, кӕмфӕнды куы цӕрат, уӕд дӕр: уый Дунедарӕджы сабат у.

4Мӕнӕ Дунедарӕджы бӕрӕгбӕттӕ, уазӕмбырдтӕ. Бӕрӕг кӕнын сӕ хъӕуы бӕлвырд афонты.

Куадзӕн ӕмӕ Донгонд дзулты бӕрӕгбон

5Фыццаг мӕйы цыппӕрдӕсӕм бон, дыууӕизӕрастӕу — Дунедарӕджы Куадзӕн. 6Уыцы мӕйы фынддӕсӕм бон та райдайы Донгонд дзулты бӕрӕгбон, Дунедарӕджы кадӕн. Авд боны дӕргъы хӕрут донгонд дзултӕ. 7Фыццаг бон-иу уазӕмбырд скӕнут, мацы-иу бакусут. 8Авд боны дӕргъы Дунедарӕгӕн нывӕндтӕ хӕссут, ӕвдӕм бон та уазӕмбырд скӕнут: мацы-иу бакусут».

Фыццаг куырисы бӕрӕгбон

9Дунедарӕг Моисейӕн загъта: «Фехъусын кӕн израилӕгтӕн, зӕгъ сын: 10кӕй уын дӕттын, уыцы зӕхмӕ куы бацӕуат ӕмӕ уым уӕ хуымтӕ куы ӕркӕрдат, уӕд-иу уӕ хоры фыццаг куырис ӕрбахӕссут сауджынмӕ. 11Уый-иу уыцы куырис Дунедарӕджы раз хӕрдмӕ сисӕд, цӕмӕй Дунедарӕджы зӕрдӕ балхӕна. Сабаты фӕстӕ-иу ӕй дыккаг бон сисӕд.

12Куырис сисыны бон-иу Дунедарӕгӕн иууылсудзинаг нывондӕн ӕрхӕссут ӕнӕсахъат фыргуист. 13Ноджы ма Дунедарӕгӕн арты нывондӕн, ӕхцон хӕрздӕфӕн, ӕрбахӕссут хойраджы хуын — сойамӕст ӕвзаргӕ мӕнӕуы ссад, ефӕйы дыууӕ дӕсӕймаг хайы, стӕй гины цыппӕрӕм хай сӕн. 14Мадӕр дзул, мадӕр цӕкуытӕ, мадӕр хъуыдыды нартхор бахӕрут, цалынмӕ уӕ Хуыцауӕн иууылсудзинаг нывонд ӕрбахӕссат, уӕдмӕ. Уый уын уыдзӕни мыггагмӕйы уагӕвӕрд, фӕлтӕрӕй-фӕлтӕрмӕ, кӕмдӕриддӕр цӕрат, уым.

Хорӕфснайӕнты бӕрӕгбон

15Сабаты, куырис хӕрдмӕ сисыны фӕстӕ цы бон уа, уымӕй анымайут авд ӕнӕхъӕн къуырийы. 16Фӕндзайӕм бон-иу, ӕвдӕм сабаты фӕстӕ, Дунедарӕгӕн уӕ ног тыллӕгӕй хойраджы хуын ӕрбахӕссут. 17Кӕмдӕриддӕр цӕрат — хӕрдмӕ сисынӕн-иу ӕрбахӕссут дыууӕ дзулы. Хъуамӕ конд уой ӕвзаргӕ мӕнӕуы ссадӕй — ефӕйы дыууӕ дӕсӕймаг хайӕ, ӕнхъызт хыссӕйӕ — уӕ хоры сӕрӕй Дунедарӕгӕн хуын. 18Уыцы дзултӕй уӕлдай ма-иу ӕрбакӕнут авд ӕнӕсахъат фыргуисты, стӕй иу гал ӕмӕ дыууӕ фыры. Уыдон уыдзысты иууылсудзинаг нывӕндтӕ Дунедарӕгӕн, хойраджы хуын ӕмӕ сӕнимӕ — Дунедарӕгӕн арты нывондӕн, ӕхцон хӕрздӕфӕн. 19Ноджы ма-иу тӕригъӕды нывондӕн ӕрхӕссут цӕу, дыууӕ фыргуисты та — фидыды нывондӕн. 20Сауджын-иу дыууӕ фыргуисты Дунедарӕджы раз хӕрдмӕ сисӕд хоры сӕртӕй конд дзултимӕ. Уыдон уыдзысты Дунедарӕджы уаз хай, сауджыны хай. 21Тӕккӕ уыцы бон-иу уазӕмбырд скӕнут, мацы-иу бакусут. Уый уын уыдзӕни мыггагмӕйы уагӕвӕрд, кӕмдӕриддӕр цӕрат, уым, фӕлтӕрӕй-фӕлтӕрмӕ.

22Уӕ тыллӕг куы ӕфснайат, уӕд-иу уӕ хуымты кӕрӕттӕ ма ныккӕрдут, тыллӕгӕй ма хуымы цы’фсиртӕ баззайа, уыдон дӕр ма ӕруидзут, мӕгуыр ӕмӕ ӕрцӕуӕггагӕн сӕ ныууадзут. Ӕз Дунедарӕг дӕн, уӕ Хуыцау».

Сыкъауадындзты бӕрӕгбон

23Дунедарӕг Моисейӕн загъта: 24«Израилӕгтӕн фехъусын кӕн: ӕвдӕм мӕйы фыццаг бон уын уӕд ӕнцойбон, сыкъауадындзты уаст-иу уазӕмбырдмӕ фӕсидӕд. 25Мацы-иу бакусут, Дунедарӕгӕн-иу нывӕндтӕ ӕрхӕссут».

Тӕригъӕдтӕ ныббарыны бон

26Дунедарӕг Моисейӕн бафӕдзӕхста: 27«Ӕвдӕм мӕйы дӕсӕм бон уыдзӕни Тӕригъӕдтӕ ныббарыны бон, ӕмӕ-иу уазӕмбырд скӕнут: ком дарут ӕмӕ-иу Дунедарӕгӕн арты нывӕндтӕ ӕрхӕссут. 28Мацы-иу бакусут уыцы бон, уымӕн ӕмӕ уый у Тӕригъӕдтӕ ныббарыны бон. Дунедарӕджы, уӕ Хуыцауы раз, уыцы бон сӕххӕст вӕййы уӕ тӕригъӕдтӕ ныббарыны ӕгъдау. 29Уыцы бон ком чи нӕ дара, уый йӕ адӕмӕй фӕхъӕудзӕн. 30Уыцы бон исты чи бакуса, уый йӕ адӕмӕй фӕхъӕудзӕн. 31Мацы-иу бакусут. Уый уын уыдзӕни мыггагмӕйы уагӕвӕрд, фӕлтӕрӕй-фӕлтӕрмӕ, кӕмдӕриддӕр цӕрат, уым. 32Сабатау ӕнцойбон у уый сымахӕн, ӕмӕ-иу ком дарут. Уыцы мӕйы фарӕстӕм боны изӕрӕй дыккаг боны изӕрмӕ бӕрӕг кӕнут ӕнцойбон».

Халагъудты бӕрӕгбон

33Дунедарӕг Моисейӕн загъта: «Израилӕгтӕн фехъусын кӕн: 34ӕвдӕм мӕйы фынддӕсӕм бонӕй фӕстӕмӕ авд боны дӕргъы уыдзӕни Халагъудты бӕрӕгбон — Дунедарӕджы кадӕн. 35Фыццаг бон-иу уазӕмбырд скӕнут, мацы-иу бакусут. 36Авд боны дӕргъы Дунедарӕгӕн хӕссут нывӕндтӕ. Ӕстӕм бон-иу уазӕмбырд скӕнут, Дунедарӕгӕн арты нывӕндтӕ ӕрхӕссут. Уый у бӕрӕгбоны фӕстаг бон, мацы-иу бакусут.

37Адон сты Дунедарӕджы бӕрӕгбӕттӕ. Уыцы бонты хъуамӕ кӕнат уазӕмбырдтӕ, Дунедарӕгӕн хӕссат иууылсудзинӕгтӕ, хойраджы хуынтӕ ӕмӕ нывӕндтӕ сӕнимӕ, уыцы бонты куыд ӕмбӕлы, афтӕ. 38Ӕппӕт уыдӕттӕ кӕнут, сабаттӕй — Дунедарӕджы бонтӕй, стӕй уе’ппӕт лӕвӕрттӕй, ардбахӕрд ӕмӕ бархийы нывӕндтӕй уӕлдай.

39Ӕвдӕм мӕйы фынддӕсӕм бонӕй, уӕ тыллӕг ӕфснайд куы фӕуат, уыцы бонӕй фӕстӕмӕ-иу авд боны дӕргъы бӕрӕг кӕнут Дунедарӕджы бӕрӕгбон ▼

▼Ома «Халагъудты бӕрӕгбон».

. Фыццаг бон дӕр ӕмӕ ӕстӕм бон дӕр уын уӕнт ӕнцойбонтӕ. 40Фыццаг бон-иу райсут уӕ бӕлӕсты хуыздӕр дыргътӕй, стӕй пальмӕтӕ, сыфтӕрджын бӕлӕстӕ ӕмӕ донхӕристы къалиутӕ; авд боны дӕргъы цин кӕнут Дунедарӕджы, уӕ Хуыцауы раз. 41Уыцы бӕрӕгбон, Дунедарӕджы бӕрӕгбон, ӕрвылаз дӕр бӕрӕг кӕнут ӕвдӕм мӕйы — авд боны дӕргъы. Уый уын уыдзӕни мыггагмӕйы уагӕвӕрд, фӕлтӕрӕй-фӕлтӕрмӕ; ӕвдӕм бон-иу бӕрӕг кӕнут уыцы бӕрӕгбон.

42Авд боны дӕргъы-иу халагъудты цӕрут. Израилы алы бынӕттон цӕрӕг дӕр уыцы бонты цӕрӕд халагъуды, 43цӕмӕй фӕлтӕрӕй-фӕлтӕрмӕ уӕ байзӕддӕгтӕ зоной, Ӕз израилӕгты Мысыры зӕххӕй куы ракодтон, уӕд сӕ халагъудты кӕй ӕрцӕрын кодтон, уый. Ӕз Дунедарӕг дӕн, уӕ Хуыцау».

44Моисей израилӕгтӕн фехъусын кодта Дунедарӕджы бӕрӕгбӕтты тыххӕй.