Lev 25 | OssIBT2022 | STEP | Дунедарӕг Синайы хохыл Моисейӕн загъта: «Фехъусын кӕн израилӕгтӕн:

‏ Leviticus 25

Ӕнцойы аз

1 Дунедарӕг Синайы хохыл Моисейӕн загъта: «Фехъусын кӕн израилӕгтӕн: 2 кӕй уын дӕттын, уыцы зӕхмӕ куы бацӕуат, уӕд-иу алы ӕвдӕм аз дӕр уыцы зӕххыл мацы кусут, уымӕн ӕмӕ уый Дунедарӕджы сабат у. 3 Ӕхсӕз азы дӕргъы уӕ хуымтӕ таут ӕмӕ уӕ сӕнӕфсиртӕ’хсӕдут — уӕ зӕххы бӕркад ӕфснайут, 4 ӕвдӕм аз та зӕххӕн уӕд сабаты ӕнцой, Дунедарӕджы сабат. Уӕ хуымтӕ-иу ма байтаут ӕмӕ-иу уӕ сӕнӕфсиртӕ ма бахсӕдут. 5 Уӕ хуымты йӕхи’гъдауӕй цы ӕрзайа, уыдон-иу ма ӕркӕрдут; кӕй нӕ бахсӕстой, уыцы сӕнӕфсиры цупӕлттӕ дӕр-иу ма ӕртонут. Уыцы аз уӕд ӕнцойы аз зӕххӕн. 6 Сабаты аз зӕххыл цыдӕриддӕр ӕрзайа, уый уыдзӕни уӕ хойраг — уӕхицӕн, уӕ цагъар нӕлгоймӕгтӕн ӕмӕ уӕ цагъар сылгоймӕгтӕн, уе’ххуырстытӕн, уе’хсӕн цӕрӕг ӕрцӕуӕггӕгтӕн, 7 уӕ фосӕн ӕмӕ, уӕ зӕххыл хъӕддаг сырдӕй цы ис, уыдонӕн.

Ӕрдӕгсӕдӕйон аз

8 Анымайут авд хатты авд азы, ӕдӕппӕтӕй авд авды куыд уой. Ӕмӕ сабаты азтӕй авд куы рацӕуа — фараст ӕмӕ дыууиссӕдз азы, 9 уӕд ӕвдӕм мӕйы дӕсӕм бон, Тӕригъӕдтӕ ныббарыны бон, уӕ бӕстӕйы сыкъауадындзтӕй уасут 10 ӕмӕ афтӕмӕй фӕндзайӕм аз банымайут уазыл. Уӕ зӕххыл-иу алкӕмӕн дӕр фехъусын кӕнут, сӕрибар сын лӕвӕрд кӕй цӕуы, уый. Уыцы аз уын уыдзӕни Ӕрдӕгсӕдӕйон аз, алчидӕр уӕ хъуамӕ раздӕха йӕ зӕххы хаймӕ, йӕхи мыггагмӕ. 11 – 12 Уыцы аз-иу мацы байтаут, уӕ хуымты йӕхи’гъдауӕй цы ӕрзайа, уыдон-иу ма ӕркӕрдут, кӕй нӕ бахсӕстой, уыцы сӕнӕфсиры цупӕлттӕ-иу ма ӕртонут, уымӕн ӕмӕ фӕндзайӕм аз у Ӕрдӕгсӕдӕйон аз, уазыл ӕй нымайут. Ӕрмӕстдӕр уӕ хуымты йӕхи’гъдауӕй цы’рзайа, уыдон-иу хӕрут.

13 Ӕрдӕгсӕдӕйон азы-иу алчидӕр фӕстӕмӕ йӕ зӕххы хаймӕ раздӕхӕд. 14 Де’фсымӕрӕн, израилагӕн, зӕхх куы уӕй кӕнай кӕнӕ дзы куы ӕлхӕнай, уӕд-иу кӕрӕдзийы ма сайут. 15 Зӕхх дзы куы ӕлхӕнай, уӕд-иу банымай, Ӕрдӕгсӕдӕйон азы фӕстӕ цал азы рацыди, уый. Зӕхх дын чи уӕй кӕна, уый дӕр банымайӕд, Ӕрдӕгсӕдӕйон азы’рцыдмӕ уыцы зӕххӕй тыллӕг цал азы исӕн уыдзӕн, уый. 16 Уыцы азтӕ цас фылдӕр уой, уыйас зӕххӕн йӕ аргъ фылдӕр уӕд, цас къаддӕр уой, уыйас та — къаддӕр, уымӕн ӕмӕ дын уӕй кӕны ӕрмӕстдӕр уал азы тыллӕг. 17 Уӕ кӕрӕдзи-иу ма сайут, фӕлӕ тӕрсут уӕ Хуыцауӕй. Ӕз Дунедарӕг дӕн, уӕ Хуыцау. 18 Ӕххӕст Мын кӕнут Мӕ уагӕвӕрдтӕ ӕмӕ Ме’гъдӕуттӕ, ӕмӕ уӕд ацы зӕххыл ӕдасӕй цӕрдзыстут. 19 Зӕхх уын йӕ бӕркад дӕтдзӕн, ӕмӕ ӕфсӕст уыдзыстут.

20 Сымах бафӕрсдзыстут: „Куы ницы байтауӕм ӕмӕ тыллӕг куынӕ ӕрӕмбырд кӕнӕм, уӕд ӕвдӕм аз цы хӕрдзыстӕм?“ 21 Ӕз уын ӕхсӕзӕм аз раарфӕ кӕндзынӕн, ӕмӕ уӕ зӕхх ӕртӕ азы бӕркад ратдзӕн. 22 Ӕстӕм аз байтаудзыстут уӕ хуымтӕ, хӕргӕ та нырма кӕндзыстут уӕ раздӕры тыллӕгӕй. Цалынмӕ фарӕстӕм азы тыллӕг ӕрзайа, уӕдмӕ уын фаг уыдзӕн.

Зӕхх фӕстӕмӕ балхӕныны тыххӕй

23 Зӕхх мыггагмӕ ауӕй кӕнӕн нӕй, уымӕн ӕмӕ уый Мӕн у, сымах та стут, Мӕ зӕххыл чи ӕрцард, ахӕм ӕрцӕуӕггӕгтӕ. 24 Зӕхх куы ӕлхӕнат, уӕд хъуамӕ бар раттат фӕстӕмӕ йӕ балхӕнынӕн. 25 Де’фсымӕр, израилаг, куы смӕгуыр уа ӕмӕ йӕ зӕххы хай куы ауӕй кӕна, уӕд-иу йӕ хӕстӕгдӕр къабӕзтӕй исчи ӕрбацӕуӕд ӕмӕ йын йӕ зӕхх фӕстӕмӕ балхӕнӕд. 26 Чи йӕ балхӕна, ахӕм къабаз ын куынӕ разына, фӕлӕ фӕстӕдӕр йӕхӕдӕг куы схъӕздыг уа ӕмӕ йӕ балхӕнынхъом куы суа, 27 уӕд-иу анымайӕд, йӕ зӕхх ауӕй кӕнынӕй цал азы рацыди, уый ӕмӕ ӕлхӕнӕгӕн, цы азтӕ ма баззади, уыдоны аргъ бафидӕд. Уӕд фӕстӕмӕ йӕ зӕххы хаймӕ раздӕхын йӕ бон суыдзӕн. 28 Кӕд ӕмӕ уыцы аргъ бафидыны фаг не суа, уӕд та, кӕй ауӕй кодта, уыцы зӕхх Ӕрдӕгсӕдӕйон азмӕ баззайдзӕн, чи йӕ балхӕдта, уый къухы. Уыцы аз, чи йӕ балхӕдта, уый уыцы зӕххы хай суӕгъд кӕндзӕн, ӕмӕ, чи йӕ ауӕй кодта, фӕстӕмӕ уый исбонмӕ раздӕхдзӕн.

29 Исчи быруйӕ ӕхгӕд сахары йӕ хӕдзар куы ауӕй кӕна, уӕд ын, йӕ ауӕй кӕнынӕй цалынмӕ афӕдз нӕ рацӕуа, уӕдмӕ фӕстӕмӕ балхӕнӕн уыдзӕн. Уыцы рӕстӕджы дӕргъы йын балхӕнӕн уыдзӕни. 30 Афӕдзы кӕронмӕ, бырухгӕд сахары цы хӕдзар ис, уый фӕстӕмӕ ӕлхӕд не’рцыди, зӕгъгӕ, уӕд мыггагмӕ суыдзӕни йӕ балхӕнӕджы, стӕй уымӕн йӕ байзӕддӕгты исбон; Ӕрдӕгсӕдӕйон азы дӕр нал суӕгъд уыдзӕн. 31 Ӕнӕбыру хъӕуты цы хӕдзӕрттӕ ис, уыдон та нымад цӕуынц зӕххы хӕйттыл: фӕстӕмӕ сын балхӕнӕн ис, Ӕрдӕгсӕдӕйон азы сӕ суӕгъд кӕнын хъӕуы. 32 Фӕлӕ левиттӕн сӕ сахарты кӕддӕриддӕр бар ис сӕ хӕдзӕрттӕ фӕстӕмӕ балхӕнынӕн. 33 Левитты сахары цы хӕдзар ауӕй кӕной, уый балхӕнӕн ис, Ӕрдӕгсӕдӕйон азы йӕ суӕгъд кӕнын хъӕуы, уымӕн ӕмӕ, левитты сахарты цы хӕдзӕрттӕ ис, уыдон израилӕгты’хсӕн сты сӕ исбон. 34 Сӕ сахарты раз цы сӕрвӕттӕ ис, уыдонӕн та уӕйгӕнӕн нӕй, уымӕн ӕмӕ мыггагмӕ сӕ исбон сты.

Мӕгуыртӕм фӕкӕсыны тыххӕй

35 Де’фсымӕр, израилаг, куы смӕгуыр уа, йӕхи дарынхъом куынӕуал уа, уӕд-иу ӕм фӕкӕс, ӕрцӕуӕггагмӕ кӕнӕ, уе’хсӕн рӕстӕгмӕ чи’рцӕра, уымӕ куыд фӕкӕсис, афтӕ. Уадз ӕмӕ дарддӕр цӕра дӕ разы. 36 Пайдайы охыл дзы мацы ис, тӕрс дӕ Хуыцауӕй. Уадз ӕмӕ де’фсымӕр дӕ разы цӕра. 37 Пайдайы охыл ын ӕхца ӕфстау ма ратт, хойраг дӕр ын пайдайы фӕдыл ма ауӕй кӕн. 38 Ӕз Дунедарӕг дӕн, уӕ Хуыцау, Мысыры зӕххӕй уӕ Чи ракодта, Уый, цӕмӕй уын раттон Ханааны зӕхх ӕмӕ уон уӕ Хуыцау.

39 Де’фсымӕр, израилаг, куы смӕгуыр уа ӕмӕ дын йӕхи куы ауӕй кӕна, уӕд ыл цагъары’фсондз ма сӕвӕр. 40 Ӕххуырст кӕнӕ уе’хсӕн ӕрцӕрӕг ӕцӕгӕлоны цӕстӕй йӕм кӕс, Ӕрдӕгсӕдӕйон азы онг дӕм кусӕд. 41 Уый фӕстӕ йӕ цотимӕ аздӕхӕд йӕ мыггагмӕ, йӕ фыдӕлты зӕххы хаймӕ. 42 Израилӕгтӕ сты мӕ лӕггадгӕнджытӕ, уымӕн ӕмӕ се’ппӕты дӕр Ӕз ракодтон Мысыры зӕххӕй; цагъартау сӕ уӕйгӕнӕн нӕй. 43 Ӕгъатыр хицау сын ма у, дӕ Хуыцауӕй тӕрс.

44 Дӕ цагъар нӕлгоймӕгтӕ ӕмӕ дӕ цагъар сылгоймӕгтӕ, уӕ алыварс цы адӕмтӕ ис, уыдонӕй уӕнт, се’хсӕнӕй сӕ ӕлхӕнут. 45 Уе’хсӕн цы ӕрцӕуӕггӕгтӕ ис, уыдонӕй, стӕй сӕ бинонтӕй — уӕ зӕххыл чи райгуырди, уыдонӕй дӕр уын ӕлхӕныны бар ис, ӕмӕ уыдзысты уӕ исбон. 46 Уӕ бон сӕ у уӕ байзӕддӕгтӕн исбонӕн ныууадзын, семӕ уӕхи, куыд цагъартимӕ, афтӕ дарын, фӕлӕ уе’фсымӕртӕн, израилӕгтӕн, карз хицӕуттӕ ма ут. 47 Израилӕгты’хсӕн ӕрцӕуӕггагӕй чи ис, уый куы сбонджын уа, де’фсымӕр, израилаг, та куы смӕгуыр уа, ӕмӕ йӕхи ӕрцӕуӕггагӕн кӕнӕ уый мыггагӕй искӕмӕн куы ауӕй кӕна, 48 уӕд ӕй фӕстӕмӕ балхӕнӕн уыдзӕн. Йӕ хӕстӕджытӕй йӕ искӕмӕн балхӕныны бар уыдзӕни: 49 йӕ фыды’фсымӕр, йӕ фыды’фсымӕры фырт кӕнӕ та ӕндӕр хион — тугхӕстӕг ын чи ӕййафы, ахӕмӕн. Кӕд йӕхицӕн йӕ къух амона, уӕд та-иу йӕхӕдӕг йӕхи балхӕнӕд фӕстӕмӕ. 50 Йӕ балхӕнӕгимӕ-иу анымайӕд, йӕхи йын куы ауӕй кодта, уӕдӕй Ӕрдӕгсӕдӕйон азы онг цал азы рацыди, уый. Фидгӕ та йын хъуамӕ бакӕна, уал азы дӕргъы ӕххуырстӕн цас бафыстӕуы, уыйас. 51 Кӕд ма Ӕрдӕгсӕдӕйон азмӕ бирӕ азтӕ баззади, уӕд хъуамӕ, цы аргъӕй йӕ балхӕдӕуыд, уымӕн йӕ фылдӕр хай бафида. 52 Ӕрдӕгсӕдӕйон азмӕ кӕд бирӕ нал баззад, уӕддӕр анымайӕд ӕмӕ уыцы азтӕм гӕсгӕ ӕмбӕлгӕ аргъ бафидӕд. 53 Йӕ балхӕнӕгӕн, иу афӕдзмӕ кӕй баххуырсынц, уыцы кусӕджы хуызӕн уӕд; карз ма уӕд йемӕ. 54 Фӕстӕмӕ ӕлхӕд куынӕ ӕрцӕуа, уӕд йӕ цотимӕ уӕгъдгонд ӕрцӕудзӕн Ӕрдӕгсӕдӕйон азы, 55 уымӕн ӕмӕ израилӕгтӕ сты Мӕ лӕггадгӕнджытӕ, Мысыры зӕххӕй кӕй ракодтон, уыдон. Ӕз Дунедарӕг дӕн, уӕ Хуыцау.