‏ Nehemiah 13

1Уыцы бон ӕппӕт дзыллӕйы раз хъӕрӕй кастысты Моисейы чиныг. Уым фыст уыди, аммонаг ӕмӕ моавагӕн Хуыцауы адӕмы ӕхсӕнмӕ бацӕуӕн нӕй, зӕгъгӕ, 2уымӕн ӕмӕ уыдон израилӕгтыл дзул ӕмӕ донимӕ нӕ сӕмбӕлдысты, фӕлӕ сын сӕ ныхмӕ баххуырстой Балаамы, цӕмӕй сӕ ралгъита, фӕлӕ уыцы фыдӕлгъыст нӕ Хуыцау раивта арфӕйӕ.

3Ӕгъдауы ныхӕстӕ фехъусгӕйӕ, адӕм ӕцӕгӕлӕтты се’ппӕты дӕр израилӕгтӕй фӕхицӕн кодтой. 4Уымӕй размӕ та, нӕ Хуыцауы хӕдзары уӕттӕм йӕ цӕст чи дардта, уыцы сауджын Елиашив йӕ хӕрз хион Тобиайӕн 5рахицӕн кодта стыр уат; уӕды онг дзы ӕфснайдтой хойраджы хуынтӕ, буд ӕмӕ мигӕнӕнтӕ, ноджы ма левиттӕ, зарӕггӕнджытӕ ӕмӕ дуаргӕстӕм ӕгъдаумӕ гӕсгӕ цы хойраг хауди, уый, сӕн ӕмӕ сойы дӕсӕймаг хӕйттӕ, стӕй, сауджынтӕн кӕй хастой, уыцы хуынтӕ. 6Уыцы рӕстӕг ӕз Йерусалимы нӕ уыдтӕн: Вавилоны паддзах Артаксерксы паддзахиуӕгыл дыууадӕс ӕмӕ ссӕдз азы куы сӕххӕст ис, уӕд ӕм фӕцыдтӕн. Цалдӕр боны фӕстӕ дзы мӕхи фӕстӕмӕ ракуырдтон. 7Йерусалиммӕ куы ӕрбаздӕхтӕн ӕмӕ куы фехъуыстон, Елиашив Тобиайӕн Хуыцауы хӕдзары кӕрты уат радта, уый, 8уӕд мӕстӕй рафыхтӕн ӕмӕ Тобиайы хӕдзары дзаума иууылдӕр ӕддӕмӕ раппӕрстон. 9Бафӕдзӕхстон, агъуыст сыгъдӕггонд куыд ӕрцӕуа ӕмӕ Хуыцауы галуаны мигӕнӕнтӕ, хойраджы хуынтӕ ӕмӕ буд фӕстӕмӕ уырдӕм хаст куыд ӕрцӕуой, афтӕ.

10Уымӕй уӕлдай ма базыдтон, левиттыл сӕ хай кӕй нӕ сӕмбӕлы ӕмӕ уымӕ гӕсгӕ левиттӕ ӕмӕ зарӕггӕнджытӕй алчи ам лӕггад кӕныны бӕсты йӕ хуымы куыст бакӕнынмӕ кӕй азгъордта, уый. 11Уый тыххӕй ӕз бауайдзӕф кодтон, хистӕрад кӕй бӕрны уыди, уыдонӕн, ӕдзӕллагӕй цӕмӕн ныууагътам Хуыцауы хӕдзар, зӕгъгӕ. Ӕрӕмбырд кодтон левитты ӕмӕ сӕ алкӕй йӕ бынаты сӕвӕрдтон. 12Уыйадыл иудейӕгтӕ иууылдӕр хор, сӕн ӕмӕ сойы дӕсӕймаг хӕйттӕ къӕбицтӕм хӕссын райдыдтой. 13Къӕбицгӕстӕй сӕвӕрдтой сауджын Шелеми, динамонӕг Цадок ӕмӕ левит Педаиайы, семӕ ма ӕххуысгӕнӕгӕй — Хананы, Маттаниайы фырт Заккуры фырты, уымӕн ӕмӕ ӕууӕнкджын адӕмыл нымад уыдысты. Бафӕдзӕхстон сын, се’фсымӕртӕм цы хӕйттӕ хауы, уыдон сын куыд уарой.

14Ӕппӕт уыдӕттӕ мын бахъуыды кӕн, мӕ Хуыцау, ӕмӕ, мӕ Хуыцауы хӕдзар ӕмӕ уымӕн лӕггад кӕныны тыххӕй цы биноныг хъуыддӕгтӕ сарӕзтон, уыдон мын нымад ӕрцӕуӕнт! 15Уыцы бонты ӕз федтон: сабаты Иудейы сӕн дыгътой, куыристӕ ластой ӕмӕ хӕрджытыл сӕн, сӕнӕфсир, легъуи ӕмӕ ӕндӕр уӕргътӕ ӕвӕрдтой. Сабаты ӕппӕт уыдӕттӕ Йерусалиммӕ ластой. Тӕккӕ уыцы бон сын ӕз карзӕй загътон, цӕмӕй сабаты мацы уӕй кӕной. 16Иудейы цӕрӕг тирӕгтӕ дӕр ластой кӕсаг ӕмӕ ӕндӕр уӕййӕгтӕ ӕмӕ сӕ сабатбон уӕй кодтой Иудейы ӕмӕ Йерусалимы цӕрджытӕн. 17Ӕз бауайдзаф кодтон Иудейы уӕздӕттӕн, ахӕм ӕвзӕр митӕ уӕ сӕрмӕ цӕмӕн хӕссут ӕмӕ сабаты бон цӕмӕн чъизи кӕнут, зӕгъгӕ. 18Уӕ фыдӕлтӕ дӕр, зӕгъын, раст афтӕ кодтой, ӕмӕ Хуыцау уымӕн сӕвӕрдта Йӕ бӕллӕх махыл дӕр ӕмӕ ацы сахарыл дӕр. Ныр сымах та сабат чъизи кӕнут ӕмӕ уымӕй ноджы тынгдӕр Хуыцауы мӕсты кӕнут уӕхимӕ.

19Уый фӕстӕ, сабаты размӕ, изӕрдалынгты Йерусалимы сахары кулдуар сӕхгӕнын кодтон ӕмӕ загътон, сабат цалынмӕ ахицӕн уа, уӕдмӕ йӕ ӕхгӕдӕй куыд дарой. Мӕ адӕмӕй ма кулдуары раз хъахъхъӕнджытӕ дӕр сӕвӕрдтон, сабатбон мидӕмӕ куыд ницы ӕрбахастӕуа, афтӕ. 20Афтӕмӕй сӕудӕджертӕ ӕмӕ алы базайрӕгты уӕйгӕнджытӕ Йерусалимы сисы ӕдде иу-дыууӕ хатты бахсӕвиуат кодтой. 21Ӕз сын рагацау фӕдзӕхстон, дзӕгъӕлы ӕхсӕвиуат кӕнут къулы рӕбын, зӕгъгӕ. Искуы ма афтӕ куы бакӕной, уӕд тӕрхоны раз кӕй ӕрлӕудзысты, уымӕй сын зӕрдӕ бавӕрдтон. Уӕдӕй фӕстӕмӕ сабаты никуыуал ӕрбацыдысты.

22Левиттӕн загътон, цӕмӕй сӕхи ссыгъдӕг кӕной ӕмӕ кулдуары раз хъалагъур ӕрлӕууой, сабаты бон уаз куыд уа, афтӕ. Уыдӕттӕ дӕр мын ма ферох кӕн, мӕ Хуыцау, ӕмӕ мын ныххатыр кӕн Де стыр хорзӕхы фӕрцы!

23Уыцы бонты ма ӕз федтон, ашдодаг, аммонаг ӕмӕ моаваг сылгоймӕгтӕ чи ракуырдта, ахӕм иудейӕгты. 24Уыдонӕн сӕ цот аздӕхтысты ашдодаг кӕнӕ ӕндӕр адӕмты хӕццӕ ӕвзагыл дзурынмӕ, иудейагау та нӕ зонынц. 25Уый тыххӕй ӕз семӕ схъаугъа дӕн, ралгъыстон сӕ, кӕйдӕрты дзы нӕмгӕ дӕр ракодтон, сӕ сӕрыхъуынтӕй сӕ фӕралас-балас кодтон ӕмӕ сын загътон, цӕмӕй Хуыцауӕй басомы кӕной, сӕ чызджыты ӕцӕгӕлон адӕмтӕм моймӕ кӕй нал дӕтдзысты, уыдоны чызджыты та сӕхицӕн дӕр ӕмӕ сӕ фырттӕн дӕр кӕй нал курдзысты. 26Уыдӕтты тыххӕй, зӕгъын, нӕ фӕтӕригъӕдджын ис Израилы паддзах Соломон? Ахӕм паддзах иунӕг адӕммӕ дӕр нӕ уыди. Йӕ Хуыцау ӕй уарзта ӕмӕ йӕ ӕппӕт израилӕгтӕн паддзах скодта, фӕлӕ йӕ ӕндӕрбӕстаг сылгоймӕгтӕ фӕтӕригъӕдджын кодтой. 27Ӕмӕ ныр, ахӕм ӕвирхъау фыддзинад кӕй кӕнут, нӕ Хуыцауы раз тӕригъӕды кӕй цӕут ӕмӕ ӕцӕгӕлон сылгоймӕгты кӕй курут, мах хъуамӕ уымӕ хъусӕм!

28Иоадайы байзӕддӕгтӕй дӕр иу, алчер Елиашивы фырт, хоронаг Санбаллаты сиахс уыди, ӕмӕ йӕ уый тыххӕй ӕз мӕ цурӕй фӕтардтон. 29Ма сын ныббар, мӕ Хуыцау, сауджыны ном цӕсты кӕй бафтыдтой ӕмӕ сауджын ӕмӕ левиты ардбахӕрд кӕй фехӕлдтой, уый!

30Афтӕ ссыгъдӕг кодтон сауджынтӕ ӕмӕ левитты ӕппӕт ӕцӕгӕлон чъизитӕй, ӕмӕ сӕ алкӕй дӕр ногӕй бафтыдтон йӕ куыстыл. 31Батыхстӕн, цӕмӕй суг дӕр афоныл уа ӕмӕ хоры сӕртӕ дӕр.

Ма мӕ рох кӕн, о мӕ Хуыцау, хорз мын ракӕн!