‏ Nehemiah 3

1Алчер Елиашив бавдӕлд ӕмӕ йӕ сауджын ӕфсымӕртимӕ Фысвосы кулдуар сарӕзтой. Срухс ӕй кодтой ӕмӕ йын йӕ дуӕрттӕ сӕвӕрдтой. Сӕдӕйы мӕсыгӕй Хананелы мӕсыгмӕ дӕр къул самадтой ӕмӕ йӕ срухс кодтой.

2Уыдоны фарсмӕ къулы хай дарддӕр амадтой йерихонӕгтӕ, сӕ фарсмӕ та — Имрийы фырт Заккур.

3Кӕсаджы кулдуар арӕзтой Сенаайы байзӕддӕгтӕ: йӕ хъайвантӕ йын ныффидар кодтой, йӕ дуӕрттӕ йын ӕрцауыгътой, йӕ гуыдыртӕ ӕмӕ йын йе’хгӕнӕнтӕ сӕвӕрдтой.

4Уыдоны фарсмӕ къул дарддӕр амадта Уриайы фырт Меремот, Хакоцы байзӕддаг, сӕ фарсмӕ та — Варахийы фырт Мешуллам, Мешезавелы байзӕддаг; уый фарсмӕ — Баанайы фырт Цадок.

5Уыдоны фарсмӕ къул дарддӕр амадтой текойӕгтӕ; уӕвгӕ, сӕ тӕккӕ нымаддӕртӕй никӕй бафӕндыд Дунедарӕджы номыл бакусын.

6Зӕронд кулдуарыл архайдтой Пасеахы фырт Иоада ӕмӕ Бесодиайы фырт Мешуллам; кулдуар сарӕзтой, йӕ дуӕрттӕ йын ӕрцауыгътой, йӕ гуыдыртӕ ӕмӕ йын йе’хгӕнӕнтӕ сӕвӕрдтой.

7Уыдоны фарсмӕ къул амайыныл дарддӕр, Цӕугӕдоны фаллаг фарсы хицауы цӕрӕнты онг, архайдтой гивонаг Мелатиа ӕмӕ меронотаг Йадон, семӕ — гивонӕгтӕ ӕмӕ мицпайӕгтӕ.

8Къулы иннӕ хай амадта Хархаиайы фырт, зӕрингуырд Уззиел, йӕ фарсмӕ та — Хананиа, хӕрздӕфгӕнӕнтӕ аразӕг. Уыйадыл Йерусалим, куыд уыди, афтӕ фӕстӕмӕ скодтой — суанг Фӕтӕн Къулы онг.

9Уыдоны фарсмӕ къулы иннӕ хай амайыныл архайдта Хуры фырт Рефайа, Йерусалимы ӕрдӕгзылды хицау.

10Къулы иннӕ хай, растдӕриддӕр йӕ хӕдзары бакомкоммӕ, амадта Харумафы фырт Иедайа, дарддӕр та — Хашавниайы фырт Хаттуш. 11Къул дарддӕр, уыимӕ — Пецы мӕсыг дӕр, амадтой Харимы фырт Малкиа ӕмӕ Пахат-Моавы фырт Хашшув.

12Къул йӕ чызджытимӕ дарддӕр скодта Халлохешы фырт Шаллум, Йерусалимы ӕрдӕгзылды хицау.

13Дӕлвӕзы Кулдуар самадтой Ханун ӕмӕ заноахӕгтӕ, йӕ дуӕрттӕ йын ӕрцауыгътой, йӕ гуыдыртӕ ӕмӕ йын йе’хгӕнӕнтӕ сӕвӕрдтой. Уымӕй уӕлдай ма къулӕй ноджыдӕр мин ӕлмӕрины — Фаджыскалӕн кулдуары онг — самадтой. 14Фаджыскалӕн кулдуар самадта Рехавы фырт Малкиа, Бет-Керемы зылды хицау. Йӕ дуӕрттӕ йын сӕвӕрдта, гуыдыртӕ ӕмӕ ӕхгӕнӕнтӕ ӕрцауыгъта.

15Суадоны кулдуар самадта Кол Хозейы фырт Шаллум, Мицпайы зылды хицау. Сарӕзта йӕ, уӕлейӕ йын ӕрдынагъуыст скодта, гуыдыртӕ ӕмӕ ӕхгӕнӕнтӕ йыл сӕвӕрдта. Уымӕй уӕлдай ма паддзахы дыргъдоны акомкоммӕ, Силоамы цадӕй Давиды сахарӕй ӕрхизӕн къӕпхӕнты онг, къул самадта.

16Дарддӕр — Давиды зӕппӕдзтӕй хикъахт цад ӕмӕ ӕфсӕддонты агъуысты онг — къул самадта Азбукы фырт Неемиа, Бет-Цуры ӕрдӕгзылды хицау.

17Дарддӕр къул амайыныл архайдтой левиттӕ: Банийы фырт Рехум, уыдоны фӕстӕ — Хашавиа, Кеилайы ӕрдӕгзылды хицау.

18Къул дарддӕр самадтой се’фсымӕртӕ: Хенадады фырт Баввей, Кеилайы ӕрдӕгзылды хицау.

19Уый фарсмӕ къулы иннӕ хай, тигъыл цы хотыхдон ис, уый схизӕны акомкоммӕ, сарӕзта Йешуайы фырт Езер, Мицпайы хицау.

20Иннӕ хай, тигъӕй алчер Елиашивы хӕдзары дуары онг, самадта Заббайы фырт Барух.

21Дарддӕр, Елиашивы хӕдзары дуарӕй Елиашивы хӕдзары тигъмӕ, къул самадта Уриайы фырт Меремот, Хакоцы фырты фырт.

22Дарддӕр къул самадтой ӕввахсдӕр рӕттӕй ӕрбацӕуӕг сауджынтӕ. 23Сӕ фарсмӕ, сӕхи хӕдзары акомкоммӕ, къулы хай самадтой Бениамин ӕмӕ Хашшув.

Уыдоны фарсмӕ, сӕхи хӕдзары цур, — Маасеайы фырт Азариа, Ананиайы байзӕддаг.

24Йӕ фарсмӕ, къулы иннӕ хай, Азариайы хӕдзарӕй тигъы фӕзилӕнмӕ, амадта Хенадады фырт Биннуй. 25Йӕ фарсмӕ, ахӕстоны кӕрты цур, тигъы ӕмӕ паддзахы уӕллаг хӕдзары мӕсыджы акомкоммӕ — Узайы фырт Палал. Йӕ фарсмӕ — Парошы фырт Педаиа.

26Офел, зӕгъгӕ, сахары уыцы ран цӕрӕг Кувӕндоны кусджытӕ самадтой къулы иннӕ хай — скӕсӕнӕрдыгӕй Донхӕссӕн кулдуармӕ, цы мӕсыг дзы фӕцыд, уый онг.

27Сӕ фарсмӕ къул дарддӕр амадтой текойӕгтӕ: стыр цӕстахадгӕ мӕсыгӕй Офелы къулы онг. 28Дарддӕр, Бӕхты кулдуарӕй уӕлӕмӕ, цӕгатӕрдӕм, амадтой сауджынтӕ: алчидӕр — йӕ хӕдзары акомкоммӕ.

29Сӕ фарсмӕ, йӕ хӕдзары акомкоммӕ, амадта Иммеры фырт Цадок.

Уый фарсмӕ та — Шеханиайы фырт Шемайа, скӕсӕйнаг кулдуары хъахъхъӕнӕг.

30Дарддӕр, къулы иннӕ хай, амадтой Шелемийы фырт Хананиа ӕмӕ Цалафы ӕхсӕзӕм фырт Ханун.

Сӕ фарсмӕ, йӕ агъуысты акомкоммӕ, къул дарддӕр амадта Варахийы фырт Мешуллам.

31Йӕ фарсмӕ Хацорфийы фырт Малкиа, зӕрингуырд, амадта дарддӕр къул Кувӕндоны кусджытӕ ӕмӕ сӕудӕджерты хӕдзары онг, Цӕстдарджыты кулдуары акомкоммӕ, сахары къулы фисыны уӕллаг агъуысты онг. 32Фисыны уӕллаг агъуыстӕй Фысвосы кулдуары онг та къул амадтой зӕрингуырдтӕ ӕмӕ сӕудӕджертӕ.