‏ Nehemiah 4

1Мах къул кӕй аразӕм, уый Санбаллатӕн йӕ тъӕнгтӕ цагъта, ӕмӕ маст кодта иудейӕгтӕн, хынджылӕг сӕ кодта 2йе’фсымӕртӕ ӕмӕ самариаг ӕфсӕддонты раз: «Цы архайынц ацы ницӕйаг иудейӕгтӕ? Ау, ахӕм бар сын ратдзысты, ӕмӕ нывӕндтӕ хӕссой? Ау, сӕ куыст искуы кӕронмӕ фӕуыдзысты? Ау, дуртӕ, чи ныртхутӕг, уыцы сыгъд дуртӕ ныхъхъӕбӕр уыдзысты?»

3Аммонаг Тобиа дӕр йӕ цуры уыд ӕмӕ йын загъта: «Уадз ӕмӕ аразой: рувас ыл куы ауайа, уӕд дӕр ӕркӕлдзӕн сӕ дурӕй амад къул».

4Фехъуысӕд дӕм, нӕ Хуыцау, сӕ къӕхты бын нӕ куыд кӕнынц, уый! Се’лгъыстытӕ сын сӕхи сӕрыл ӕруадз, уацайраджы хал куыд ахӕрой ӕмӕ кӕйдӕр зӕххыл ӕгадӕй сӕ бонтӕ куыд ӕрвитой! 5Се’наккаг митӕ сын ма ныббар, аразджыты тӕригъӕд сын ма ныххатыр кӕн! 6Цыфӕндыйӕ дӕр мах куыстам ӕмӕ нӕ къул ӕрдӕгмӕ фестӕм, ӕмӕ дарддӕр кусынмӕ дӕр адӕм цӕттӕ сты.

7Санбаллат ӕмӕ Тобиа, араббӕгтӕ, аммонӕгтӕ ӕмӕ ашдодӕгтӕ куы фехъуыстой, Йерусалимы къултӕ ногӕй аразӕм, сӕ къахыртӕ сын ӕхгӕнӕм, уӕд мӕстӕй ссыгъдысты. 8Баныхас кодтой иууылдӕр иумӕ, Йерусалимы ныхмӕ схӕцӕм ӕмӕ сӕ ныкъкъуылымпы кӕнӕм, зӕгъгӕ.

9Мах нӕ Хуыцаумӕ куывтам, ӕхсӕвӕй-бонӕй хӕстифтонгӕй лӕууыдыстӕм, цӕмӕй фыдгулӕй нӕхи бахъахъхъӕнӕм.

10Иудейӕгтӕ бустӕ кодтой: «Уаргъхӕсджытӕн сӕ хъару басасти, быронӕн та ныккӕнӕн дӕр нӕй; къул саразынӕн не стӕм мах».

11Нӕ фыдгултӕ та дзырдтой: «Ӕвиппайды се’хсӕн куыд февзӕрдзыстӕм, куыд сӕ ныццӕгъддзыстӕм ӕмӕ хъуыддаг куыд ӕрбайхалдзыстӕм, уый уыдон зонгӕ дӕр нӕ бакӕндзысты».

12Сӕ фарсмӕ цӕрӕг иудейӕгтӕ нӕм алы рӕттӕй иу-дӕс хатты ӕрбацыдысты ӕмӕ нын загътой, кӕцырдыгӕйты нӕм лӕбурынвӕнд кӕнынц, уый.

13Уӕд ӕз, систӕ ӕрдӕгамад кӕм уыдысты, уымыты адӕмы ӕрлӕууын кодтон мыггаггай, цирхъытӕ, ӕрцытӕ ӕмӕ ӕрдынтимӕ. 14Ӕркастӕн сӕм ӕмӕ сын сӕ номдзыддӕртӕн ӕмӕ сӕ хицӕуттӕн, стӕй иннӕ адӕмӕн загътон: «Ма тӕрсут фыдгулӕй! Рох уӕ ма уӕд цытджын ӕмӕ тасӕфтауӕг Дунедарӕг, афтӕмӕй схӕцут уе’фсымӕртӕ, уӕ лӕппутӕ ӕмӕ уӕ чызджытӕ, уӕ устытӕ ӕмӕ уӕ хӕдзӕртты сӕраппонд!»

15Не знӕгтӕ куы фехъуыстой, сӕ фӕнд нын зындгонд у, уый, уӕд сын Хуыцау сӕ фыдвӕндтӕ сӕ хъуыры фӕбадын кодта, махӕй та алчидӕр фӕстӕмӕ къул аразынмӕ бавнӕлдта, йӕ куысты сӕр ӕрлӕууыди. 16Уыцы бонӕй фӕстӕмӕ мӕ кусджыты иу ӕмбис кусгӕ кодта, иннӕ ӕмбис та ӕд ӕрцытӕ, ӕд уартытӕ ӕмӕ ӕд ӕрдынтӕ, сӕ уӕлӕ уыди згъӕрхӕдӕттӕ, афтӕмӕй лӕууыдысты. Ӕфсадхонтӕ дӕр ӕмбырдӕй уыдысты Иудӕйы хӕдзары фӕскъул. 17Къуламайджытӕ ӕмӕ уаргъхӕсджытӕ иу къухӕй кусгӕ кодтой, иннӕмӕй та ӕрцытыл хӕцыдысты. 18Аразджытӕй алкӕмӕн дӕр йӕ кард баст уыди йӕ астӕуыл, афтӕмӕй куыстой. Мӕ цуры та лӕууыд хӕтӕлӕйуасӕг.

19Ӕз загътон номдзыддӕртӕ ӕмӕ хицӕуттӕн, стӕй иннӕ адӕмӕн: «Куыст тынг хъазуат ӕмӕ дзӕвгар у. Къулыл ныххӕлиу стӕм, кӕрӕдзийӕ — дӕрддзӕф. 20Уымӕ гӕсгӕ уӕ хъус дарут, ӕмӕ уӕм хӕтӕлы уаст кӕцӕй фехъуыса, уырдӕм-иу ӕвӕстиатӕй ӕрбамбырд ут. Нӕ Хуыцау нӕ бӕсты тох кӕндзӕни».

21Афтӕ уыди нӕ куыст: сӕуӕхсидӕй суанг стъалыты фӕзындмӕ адӕмӕн се’мбис ӕрцытӕ нӕ уӕгъд кодтой сӕ къухтӕй.

22Ноджыдӕр ма уыди уыцы рӕстӕг мӕ ныхас адӕмӕн: «Йерусалимы уӕ алчидӕр ӕхсӕвиуат кӕнӕд йӕ лӕггадгӕнджытимӕ: уыдон нын ӕхсӕв хъахъхъӕнӕг уыдзысты, бон та кусгӕ кӕндзысты».

23Нӕ ластам нӕ дарӕс нӕдӕр мӕхӕдӕг, нӕдӕр ме’фсымӕртӕ, нӕдӕр мӕ лӕггадгӕнджытӕ, нӕдӕр мӕ хъахъхъӕнджытӕ. Алчидӕр нӕ рахизӕрдыгӕй йӕ фарсмӕ цӕттӕйӕ дардта йӕ цирхъ, алкӕмӕн дӕр нӕ йӕ цуры уыди дон.