Neh 8 | OssIBT2022 | STEP | Ӕвдӕм мӕй куы ралӕууыди ӕмӕ израилӕгтӕ сӕ сахарты куы ӕрбынӕттон сты, уӕд адӕм иууылдӕр иу лӕгау ӕрӕмбырд сты Донхӕссӕн кулдуары цур фӕзмӕ ӕмӕ динамонӕг Езрайӕн загътой, Дунедарӕг Израилӕн кӕй бафӕдзӕхста, Моисейы Ӕгъдауы уыцы тухгӕ чиныг рахӕсс, зӕгъгӕ.

‏ Nehemiah 8

1 Ӕвдӕм мӕй куы ралӕууыди ӕмӕ израилӕгтӕ сӕ сахарты куы ӕрбынӕттон сты, уӕд адӕм иууылдӕр иу лӕгау ӕрӕмбырд сты Донхӕссӕн кулдуары цур фӕзмӕ ӕмӕ динамонӕг Езрайӕн загътой, Дунедарӕг Израилӕн кӕй бафӕдзӕхста, Моисейы Ӕгъдауы уыцы тухгӕ чиныг рахӕсс, зӕгъгӕ. 2 Уыйадыл сауджын Езра ӕвдӕм мӕйы фыццаг бон чиныг рахаста дзыллӕмӕ: нӕлгоймӕгтӕ ӕмӕ сылгоймӕгты ӕмбырдмӕ, ӕмбарынхъом чи у, ӕппӕт уыдонмӕ. 3 Донхӕссӕн кулдуары цур фӕзы сӕумӕйӕ ӕмбисбонмӕ касти дины чиныг нӕлгоймӕгтӕ ӕмӕ сылгоймӕгтӕн, ӕмбарынхъом чи у, уыдонӕн се’ппӕтӕн дӕр, ӕмӕ йӕм адӕм иууылдӕр лӕмбынӕг хъуыстой. 4 Динамонӕг Езра лӕууыди, сӕрмагондӕй йын кӕй сарӕзтой, уыцы бӕрзонд хъӕдын лӕууӕныл. Рахизӕрдыгӕй йӕ фарсмӕ — Маттитиа, Шема, Анайа, Уриа, Хилкиа ӕмӕ Маасеа, галиуӕрдыгӕй — Педаиа, Мишаел, Малкиа, Хашум, Хашбаддана, Захариа ӕмӕ Мешуллам.

5 Езра лӕууыди тӕккӕ бӕрзонддӕр ран, ӕмӕ йӕ се’ппӕт дӕр уыдтой. Чиныг куы байгом кодта, уӕд адӕм иууылдӕр сыстадысты. 6 Езра Стыр Хуыцауӕн, Дунедарӕгӕн, раарфӕ кодта, ӕмӕ адӕм иууылдӕр, аммен, аммен, зӕгъгӕ, сӕ къухтӕ уӕлӕмӕ сдардтой. Уый фӕстӕ сӕ сӕртӕ ӕркъул кодтой, кувгӕ-кувын зӕххыл ныддӕлгом сты. 7 Йешуа, Бани, Шеревиа, Йамин, Аккув, Шабтай, Ходиа, Маасеа, Келита, Азариа, Йозавад, Ханан, Пелаиа, — ацы левиттӕ адӕмӕн ӕмбарын кодтой дин, ӕмӕ сӕм уыдон сӕ бынӕттӕй лӕмбынӕг хъуыстой. 8 Алкӕмӕ дӕр куыд хъуыса, афтӕ сын кастысты Хуыцауы Ӕгъдауы чиныг ӕмӕ сын ӕй ӕмбарын кодтой. Ӕмӕ адӕм, цы сын кастысты, уый ӕмбӕрстой.

9 Адӕм иууылдӕр куыдтой, Ӕгъдауы ныхӕстӕм хъусгӕйӕ. Уымӕ гӕсгӕ сын бынӕттон хицау Неемиа, динамонӕг ӕмӕ сауджын Езра, стӕй, дзыллӕйӕн зондамынд чи лӕвӕрдта, уыцы левиттӕ загътой: «Абон Дунедарӕджы, нӕ Хуыцауы, бӕрӕгбон у. Хъынцъым-ма кӕнут ӕмӕ ма кӕут!»

10 Ноджы ма сын загъта: «Цӕут ӕмӕ сойагӕй дӕр ӕмӕ адджинагӕй дӕр уӕхи хорз фенут. Цӕттӕ кӕмӕ ницы ис, уыдонӕн та хӕйттӕ арвитут: абон нӕ Дунедарӕджы бӕрӕгбон у, ӕмӕ ӕнкъард кӕнын нӕ хъӕуы — Дунедарӕгыл куы цин кӕнат, уӕд уӕ хъаруйыл бафтдзӕни». 11 Афтӕ левиттӕ адӕмы сабыр кодтой, мауал кӕут, уымӕн ӕмӕ абон бӕрӕгбон у ӕмӕ ӕнкъард ма кӕнут, зӕгъгӕ. 12 Уыйадыл адӕм сӕ хӕдзӕрттӕм ацыдысты ӕмӕ иууылдӕр минас кӕнын ӕмӕ хуынтӕ ӕрвитынмӕ фесты. Сразӕнгард сты хъӕлдзӕг бӕрӕгбон аразынмӕ, уымӕн ӕмӕ сын цы ныхӕстӕ загъдӕуыди, уыдон бамбӕрстой ӕмӕ сӕ айстой сӕ зӕрдӕмӕ.

13 Дыккаг бон ӕппӕт адӕмы хӕдзарвӕндӕгты хистӕртӕ, сауджынтӕ ӕмӕ левиттӕ ацыдысты динамонӕг Езрамӕ, цӕмӕй сын дины ныхӕстӕ ӕмбарын кӕна, уый тыххӕй 14 ӕмӕ, Дунедарӕг Моисейӕн уылты цы’Гъдау радта, уым фыстӕй ссардтой, ӕвдӕм мӕй израилӕгтӕн бӕрӕгбон кӕй у ӕмӕ уыцы рӕстӕг халагъудты кӕй хъуамӕ цӕрой, уый. 15 Уымӕ гӕсгӕ се’ппӕт сахартӕн дӕр ӕмӕ Йерусалимы цӕрджытӕн дӕр фехъусын кодтой: фӕцӕут хохмӕ ӕмӕ дзы ӕрхӕссут оливӕ бӕласы къалиутӕ дӕр, хъӕддаг оливӕ бӕласы къалиутӕ дӕр, мирты къалиутӕ дӕр, пальмӕйы къалиутӕ дӕр, иннӕ фӕтӕнсыф бӕлӕсты къалиутӕ дӕр ӕмӕ сӕ, фыст куыд у, афтӕ халагъудтӕ саразут.

16 Адӕм ацыдысты, къалиутӕ ӕрхастой ӕмӕ халагъудтӕ скодтой: чи — йӕ уӕлхӕдзары, йӕ кӕрты, чи — Хуыцауы хӕдзары кӕртыты, чи — Донхӕссӕн кулдуары цур фӕзы, чи — Ефремы кулдуары цур фӕзы. 17 Уацарӕй ӕрбаздӕхӕг адӕмы дзырддзӕугӕтӕ халагъудтӕ сарӕзтой ӕмӕ халагъудты цардысты. Сӕ цинӕн кӕрон нал уыди, уымӕн ӕмӕ Нуны фырт Йешуайы бонтӕй уыцы боны онг израилӕгтӕ афтӕ никуыуал бакодтой. 18 Алы бон дӕр, фыццаг бонӕй фӕстаг бонмӕ, Хуыцауы дины чиныг кастысты. Сӕ бӕрӕгбон ахаста авд боны. Ӕстӕм бон та сын, ӕгъдаумӕ гӕсгӕ, нысангонд уыди кадджын ӕмбырд.