‏ Nehemiah 9

1Уыцы мӕйы цыппар ӕмӕ ссӕдзӕм бон израилӕгтӕ иумӕ ӕрӕмбырд сты. Ком дардтой, сӕ уӕлӕ сӕхъис скодтой, сӕ сӕртыл байзӕрстой рыг. 2Израилы байзӕддӕгтӕ сӕхи ӕппӕт ӕцӕгӕлӕттӕй фӕхицӕн кодтой. Лӕугӕйӕ ӕргом кодтой сӕ тӕригъӕдтӕ ӕмӕ сӕ фыдӕлты фыдракӕндтӕ. 3Уыцы иу ран лӕугӕйӕ, боны цыппӕрӕм хайы дӕргъы Дунедарӕджы, сӕ Хуыцауы, Ӕгъдауы чиныг кастысты, боны иннӕ цыппӕрӕм хайы та ӕргом кодтой сӕ тӕригъӕдтӕ ӕмӕ-иу бакуывтой Дунедарӕгӕн, сӕ Хуыцауӕн.

4Йешуа, Бани, Кадмиел, Шеваниа, Бунни, Шеревиа, Бани ӕмӕ Кенани левитты бӕрзонд лӕууӕнмӕ схызтысты ӕмӕ хъӕр кодтой Дунедарӕгмӕ, сӕ Хуыцаумӕ. 5Левиттӕ, Йешуа, Кадмиел, Бани, Хашавниа, Шеревиа, Ходиа, Шеваниа ӕмӕ Петахиа, дзырдтой: «Слӕуут! Стаут Дунедарӕджы, уӕ Хуыцауы, мыггагӕй-мыггагмӕ! Кад кӕнӕнт Дӕ цытджын номӕн, цыфӕнды кад ӕмӕ ӕппӕлдӕй стырдӕр чи у, уымӕн! 6Ды дӕ иунӕг Дунедарӕг! Ды сфӕлдыстай арв, уӕлӕрвтӕ ӕмӕ ӕппӕт стъалытӕ, зӕхх ӕмӕ йыл цыдӕриддӕр ис, уый, денджызтӕ ӕмӕ дзы цыдӕриддӕр ис, уыдон! Алцӕмӕн дӕр цард ды дӕттыс! Дӕуӕн кад кӕнынц ӕппӕт уӕларвон ӕфсӕдтӕ! 7Ды — Дунедарӕг Хуыцау, сӕвзӕрстай Аврамы. Халдейаг Урӕй йӕ ракодтай ӕмӕ йын радтай ном Авраам. 8Иузӕрдион Дыл кӕй у, уый федтай ӕмӕ йемӕ фидыд сарӕзтай: йӕ байзӕддагӕн ын ханаанӕгтӕ, хеттӕгтӕ, аморӕгтӕ, периззӕгтӕ, йевусӕгтӕ ӕмӕ гиргашӕгты зӕххытӕ кӕй ратдзынӕ, уымӕй йын зӕрдӕ бавӕрдтай. Ӕмӕ сӕххӕст кодтай Дӕ дзырд, уымӕн ӕмӕ Ды дӕ раст Хуыцау. 9Ды федтай нӕ фыдӕлты хъизӕмӕрттӕ Мысыры, Сырх денджызы был сын се’рдиаг фехъуыстай 10ӕмӕ Ды ӕмбисондӕн хӕссыны ӕвдисӕйнӕгтӕ ӕмӕ диссӕгтӕ равдыстай фараоны, йе’ппӕт цагъарты ӕмӕ йӕ бӕстӕйы ӕппӕт адӕмы раз, уымӕн ӕмӕ Ды зыдтай, сӕ къӕхты бын нӕ куыд кодтой, уый, ӕмӕ уымӕй Дӕхицӕн ном скодтай абоны онг. 11Нӕ фыдӕлты раз денджыз фӕцӕуын кодтай дыууӕрдӕм, ӕмӕ денджызы астӕу ацыдысты, сурзӕххау, чи сӕ сырдта, уыдоны та, дур хуыдыммӕ ныппарӕгау, денджызы арфмӕ нывзылдтай. 12Ды мигъы цӕджындзы хуызы сӕ сӕрмӕ цыдтӕ боныгон, ӕхсӕвыгон та сын судзгӕ арты цӕджындзы хуызы рухс кодтай сӕ развӕд. 13Ды ӕрхызтӕ Синайы хохмӕ ӕмӕ семӕ ныхас кодтай уӕларвӕй. Радтай сын раст фӕдзӕхстытӕ, рӕстдзинады ӕгъдӕуттӕ, фарны уагӕвӕрдтӕ ӕмӕ барфыстытӕ. 14Ды сын бафӕдзӕхстай Дӕ уаз сабаты уагӕвӕрдтӕ ӕххӕст кӕнын ӕмӕ сын Дӕ лӕггадгӕнӕг Моисейы уылты фехъусын кодтай Дӕ фӕдзӕхстытӕ, Дӕ уагӕвӕрдтӕ ӕмӕ Де’гъдӕуттӕ. 15Стонг заман сын Ды уӕларвӕй лӕвӕрдтай хойраг, дойныйӕ куы мардысты, уӕд сын къӕдзӕхӕй рауагътай дон. Ды сын загътай, цӕмӕй ацӕуой ӕмӕ сӕхи бакӕной, Дӕ къух хӕрдмӕ сисгӕйӕ, йӕ раттыныл ард кӕй тыххӕй бахордтай, уыцы зӕхх. 16Фӕлӕ уыдон хиваст ӕмӕ нӕсӕттон систы, Дӕ фӕдзӕхстытӕ ницӕмӕ дардтой. 17Дӕ коммӕ нӕ бакастысты, цы диссӕгтӕ сын сарӕзтай, уыдон сӕ ферох сты. Хивастӕй сӕхицӕн равзӕрстой фӕтӕджы, цӕмӕй фӕстӕмӕ аздӕхой Мысырмӕ ӕмӕ цагъартӕ суой. Фӕлӕ Ды дӕ барон, фӕлмӕнзӕрдӕ, уарзӕгой, бирӕбыхсаг ӕмӕ хӕрзаудӕнгӕнаг Хуыцау — Ды сыл дӕхи нӕ атигъ кодтай. 18Кӕд сӕхицӕн джиппы рауагътой уӕныджы ӕмӕ загътой, мӕнӕ нӕ Мысырӕй чи ракодта, уыцы хуыцау, зӕгъгӕ, ӕмӕ кӕд ӕвирхъау цъыфкалӕн кодтой, 19уӕддӕр сӕ Де стыр хорзӕхы фӕрцы ӕдзӕрӕг быдыры нӕ ныууагътай: мигъы цӕджындз сӕ сӕрмӕ цыди боныгон ӕмӕ сын амыдта фӕндаг, судзгӕ арты цӕджындз та — ӕхсӕвыгон ӕмӕ рухс кодта сӕ развӕд. 20Ды сын балӕвар кодтай Дӕ хорзӕхджын Уд, зонд сын куыд амона, афтӕ. Дӕ маннӕ дӕр сын нӕ байстай ӕмӕ-иу сын сӕ дойны басӕттынӕн дон раттай. 21Дыууиссӕдз азы сӕ фӕхастай ӕдзӕрӕг быдыры, хъуаг ницӕмӕй ӕййӕфтой. Сӕ дарӕс нӕ ихсыди, сӕ къӕхтӕ нӕ рӕсыдысты. 22Ды сын сӕ бар бакодтай паддзахӕдтӕ ӕмӕ адӕмты, байуӕрстай сын зӕхх, ӕмӕ бацахстой Сигоны, Хешбоны паддзахы, зӕххытӕ, стӕй Башаны паддзах Огы зӕххытӕ. 23Сӕ хъӕстӕ дӕр сын арвы стъалытау сбирӕ кодтай ӕмӕ, бацӕут ӕм ӕмӕ сымах бауыдзӕни, зӕгъгӕ, сӕ фыдӕлтӕн зӕрдӕ кӕмӕй бавӕрдтай, уыцы зӕхх сын радтай. 24Сӕ байзӕддӕгтӕ бацыдысты ӕмӕ зӕхх сӕхи бакодтой. Ды сын уыцы зӕххы цӕрджыты, ханаанӕгты, басӕттын кодтай; сӕ паддзӕхтимӕ ӕмӕ уыцы бӕстӕйы цӕрӕг адӕмтимӕ сын сӕ радтай сӕ къухтӕм, цы уӕ фӕнды, уый сын кӕнут, зӕгъгӕ. 25Ӕмӕ уыдон бацахстой фидаргонд сахартӕ ӕмӕ сойджын зӕххытӕ, сӕхи бакодтой алыхуызон мулкӕй йемыдзаг хӕдзӕрттӕ ӕмӕ айнӕджы риуы къахт донмарӕнтӕ, сӕхи бакодтой сӕндӕттӕ, оливӕ бӕлӕсты къохтӕ ӕмӕ ӕнӕнымӕц дыргъдӕттӕ. Хордтой, сӕхи ӕфсӕстой, хуыз сӕ бацыди, ӕмӕ цардӕй къӕртт ӕппӕрстой Де стыр хорзӕхы фӕрцы. 26Сызмӕстой ӕмӕ ралӕууыдысты Дӕ ныхмӕ, Де’Гъдауӕй Дын се’ргом аздӕхтой. Уӕ Хуыцаумӕ скӕсут, зӕгъгӕ, Дӕумӕ раздӕхыны тыххӕй сын чи лӕгъстӕ кодта, Дӕ уыцы пехуымпарты марыныл нӕ ауӕрстой, Дӕуыл цъыф калыныл нӕ ауӕрстой. 27Ды сӕ фыдгулты къухмӕ радтай, ӕмӕ сӕ уыдон уынгӕг кодтой. Фӕлӕ-иу удаистӕй Дӕумӕ куы сдзынӕзтой, уӕд та-иу сӕм Ды уӕларвӕй ӕрыхъуыстай, Де стыр хорзӕхмӕ гӕсгӕ-иу сын ирвӕзынгӕнджытӕ ӕрӕрвыстай ӕмӕ та-иу сӕ уыдон се знӕгты къухӕй ирвӕзын кодтой. 28Сӕ уд-иу сӕ мидӕг куы ӕрцыди, уӕд та-иу, Дӕуӕн хъыг чи у, ахӕм митӕм бавнӕлдтой. Ды та-иу сӕ фыдгулты къухмӕ радтай, ӕмӕ сын уыдон ӕлдариуӕг кодтой. Фӕлӕ та-иу ногӕй Дӕумӕ куы фӕсидтысты, уӕд та-иу сӕм Ды уӕларвӕй ӕрыхъуыстай ӕмӕ сӕ Де стыр хорзӕхмӕ гӕсгӕ бирӕ хӕттыты фервӕзын кодтай. 29Фӕдзӕхстай сӕ, цӕмӕй сӕ Де’Гъдаумӕ раздахай, фӕлӕ-иу уыдон хиваст уыдысты ӕмӕ нӕ хъуыстой Дӕ фӕдзӕхстытӕм, афтӕмӕй та Дӕ уагӕвӕрдтӕ, чи сӕ ӕххӕст кӕны, уыдонӕн царддӕттӕг сты. Хиваст ӕмӕ нӕсӕттон уыдысты, хъусын сӕ нӕ фӕндыди. 30Се’ргом Дӕм раздахдзысты, уымӕ ӕнхъӕлмӕ кӕсгӕйӕ, Ды уыдонӕн бирӕ азты фӕбарстай. Фӕдзӕхстай сӕ Дӕ Уды фӕрцы — Дӕ пехуымпарты уылты, фӕлӕ уыдон нӕ хъуыстой, ӕмӕ сӕ Ды ӕцӕгӕлон адӕмты къухтӕм радтай. 31Фӕлӕ сӕ уӕддӕр, рӕстаудӕг ӕмӕ барон Хуыцау, Де стыр хорзӕх уыди, ӕмӕ сӕ бахызтай бындзагъдӕй, нӕ сӕ ныууагътай. 32О нӕ Хуыцау! Стыр, хъомысджын ӕмӕ тасӕфтауӕг, Йӕ Фидыд Чи нӕ рох кӕны, уыцы рӕстаудӕг Хуыцау! Ныр нын фагыл банымай, нӕхӕдӕг, нӕ паддзӕхтӕ, нӕ фӕтӕгтӕ, нӕ сауджынтӕ, нӕ пехуымпартӕ, нӕ фыдӕлтӕ ӕмӕ Дӕ адӕм иууылдӕр ассириаг паддзӕхты заманӕй абоны онг цы хъизӕмӕрттӕ февзӕрстой, уыдон. 33Цыдӕриддӕр ныл ӕрцыд, уыдӕттӕй ды раст уыдтӕ, уымӕн ӕмӕ Ды уыдтӕ иузӕрдион, мах та фыдракӕндтӕ фӕкодтам. 34Нӕ паддзӕхтӕ, нӕ фӕтӕгтӕ, нӕ сауджынтӕ ӕмӕ нӕ фыдӕлтӕ не’ххӕст кодтой Де’Гъдау, нӕ хъуыстой, Ды сын кӕй бафӕдзӕхстай, уыцы фӕдзӕхстытӕм ӕмӕ уагӕвӕрдтӕм. 35Де стыр хорзӕхӕй хайджын уӕвгӕйӕ, суанг сӕ паддзахады дӕр, Ды сын кӕй рахицӕн кодтай, уыцы парахат ӕмӕ сойджын зӕххыл нӕ лӕггад кодтой Дӕуӕн ӕмӕ сӕ фыдракӕндтӕ нӕ ныууагътой. 36Ӕмӕ цагъартӕ систӕм ныр. Ды нӕ фыдӕлтӕн кӕй радтай, — цӕмӕй йӕ тыллӕг ӕмӕ йӕ бӕркадӕй ӕфсӕдой, — уыцы зӕххыл цагъартӕ систӕм. 37Йӕ бирӕ бӕркад, нӕ тӕригъӕдты аххосӕй нӕ Ды кӕй дӕлбар бакодтай, уыцы паддзӕхтӕм ӕрхауы. Нӕхиуыл дӕр ӕмӕ нӕ фосыл дӕр сӕ бар цӕуы. Цы сӕ фӕнды, уый кӕнынц, уынгӕджы бон ныл акодта.

38Ӕппӕт уыдӕтты тыххӕй мах аразӕм бардзырд, йӕ быны сӕ къухтӕ ӕвӕрынц ӕмӕ фыст афтӕмӕй фидар кӕнынц нӕ фӕтӕгтӕ, левиттӕ ӕмӕ сауджынтӕ».