‏ Proverbs 23

1Бӕстӕйы хицауимӕ иу фынгыл хӕрынмӕ куы’рбадай,
уӕд, дӕ разы цы ис, уымӕ лӕмбынӕг кӕс:
2кӕд гуыбындзӕл дӕ, уӕд дӕ хъуырыл кард сӕвӕр,
3йӕ мондаггӕнӕнтӕм ын ма сцыбӕл у,
уымӕн ӕмӕ уыцы хойраг мӕнг у.
4Хъӕздыгдзинады фӕдыл ма згъор,
кӕд ӕрлӕууын хъӕуы, уый зон;
5хъӕздыгдзинад, куыддӕр ӕм бакӕсай, афтӕ ӕрбайсӕфы,
цӕргӕсау айтындзы йӕ базыртӕ ӕмӕ уӕлӕрвтӕм атӕхы.
6– 7Чъынды лӕгимӕ иу фынгыл ма бад,
йӕ дзаджджын хӕринӕгтӕм ын ма хӕлӕг кӕн,
уымӕн ӕмӕ йӕ зӕрдӕ у гуыдырӕй ӕхгӕд.
Зӕгъдзӕн дын: «Хӕр ӕмӕ нуаз»,
йӕ хъуыдытӕ та ӕндӕр уыдзысты.
8Дӕ комдзаг фӕстӕмӕ сомдзынӕ,
дӕ хорз ныхӕстӕ уӕлдӕфы ацӕудзысты.
9Зондцухӕн мацы дзур —
дӕ зондджын ныхӕстыл дын ӕрмӕст фӕхуддзӕнис.
10Рагон арӕны дур ма фезмӕлын кӕн,
сидзӕрты хуыммӕ ма бахъав,
11уымӕн ӕмӕ сӕ Фарсхӕцӕг тыхджын у,
ӕмӕ дӕ ныхмӕ рацӕудзӕн сӕ хъасты.
12Дӕ зӕрдӕ зондамындмӕ здах,
дӕ хъустӕ зонынадмӕ’рбадар.
13Дӕ лӕппуйы ӕнӕ’фхӕрдӕй ма ныууадз;
уисӕй над куы баййафа, уӕд нӕ амӕлдзӕн:
14уисӕй йӕ бафхӕрдзынӕ,
фӕлӕ йӕ мӕрдтыбӕстӕй фервӕзын кӕндзынӕ.
15Мӕ лӕппу, куырыхон куы уай,
уӕд мӕ цинӕн кӕрон нӕ уыдзӕн;
16раст ныхас дӕ куы хъуыса,
уӕд мӕ зӕрдӕ фыр цинӕй райдзӕн.
17Тӕригъӕдджынтӕм хӕлӕг ма кӕн,
Дунедарӕджы раз дӕм тас уӕд кӕддӕриддӕр —
18уымӕн ӕмӕ дӕуӕн ис фидӕн,
дӕ зӕрдӕдарӕн сӕфт нӕу.
19Мӕ лӕппу, хъусгӕ кӕн ӕмӕ куырыхон у,
дӕ зӕрдӕ раст фӕндагмӕ сараз.
20Сӕнӕй йӕ мондӕгтӕ чи исы
ӕмӕ дзидза фырхӕрд чи кӕны,
уыдоны’хсӕнмӕ ма цу,
21уымӕн ӕмӕ расыггӕнаг ӕмӕ гуыбындзӕл мӕгуырмӕ’рцӕудзысты,
дӕ зивӕджы тыххӕй бызгъуырты цӕудзынӕ.
22Хъус дӕ фыдмӕ, уымӕн ӕмӕ дын цард уый радта,
дӕ ныййарӕг мад куы базӕронд уа, уӕд дӕр ыл ӕлгъ ма кӕн.
23Ӕцӕгдзинад агур, уӕлзонд, зондамынд ӕмӕ
зонды хӕзнатӕ ма ауӕй кӕн.
24Рӕстуды фыд фыр цинӕй райы,
куырыхоны ныййарӕг йӕ цинӕн кӕрон нӕ ары.
25Дӕ фыд ӕмӕ дӕ мады зӕрдӕтӕ фыр цинӕй райӕнт,
сӕ цины хъӕртӕ райхъуысӕнт!
26Мӕ лӕппу, ме’рдӕм раздах дӕ зӕрдӕ,
дӕ цӕстӕнгас мӕ фӕндӕгтӕм сараз.
27Хъахбай сылгоймаг — арф сӕрсӕфӕн,
искӕй ус — уынгӕг цъай.
28Абырӕгау рӕсӕны бады ӕмӕ нӕлгоймӕгты’хсӕн,
сайдӕй чи цӕуы, ахӕмты нымӕц парахат кӕны.
29Кӕмӕн хъуысынц сӕ кӕуын ӕмӕ сӕ хъӕрзын?
Загъд ӕмӕ судзаг хъаст чи кӕны?
Кӕмӕн сцъӕхтӕ ис йӕ буар?
Йӕ цӕстытӕ кӕмӕн ныссырх сты?
30Сӕн нуазыныл чи бафтыд,
алы хъацӕнтӕ цы сӕныл конд ис,
ахӕм сӕны фӕдыл чи зилы, уыдонӕн.
31– 32Ма сцыбӕл у, нуазӕн кӕхцы сӕн куыд сырх кӕны,
куыд хъазы ӕмӕ куыд ӕнцон нуазӕн у, уымӕ.
Уый фӕстӕ дыл калмау фӕхӕцдзӕнис,
йӕ марг дӕ бауадздзӕн хуссайраг калмау.
33Искӕй устытӕм бакӕс-бакӕс кӕндзынӕ,
дӕ зӕрдӕйы чъизи хъуыдытӕ фӕзындзӕн.
34Денджызы астӕу кӕнӕ наухъилы цъуппыл
чи бафынӕй ис, уый хуызӕн суыдзынӕ.
35Зӕгъдзынӕ: «Надтой мӕ, фӕлӕ мын нӕ рысти,
хостой мӕ, фӕлӕ йӕ не’мбӕрстон,
куы фӕфынӕй кӕнон, уӕд та ногӕй нозтагур зилдзынӕн».