‏ Psalms 135

1Стаут Дунедарӕджы,
уымӕн ӕмӕ ныл Уый ауды,
Йӕ хорзӕх мыггагмӕ у.
2Стаут хуыцӕутты Хуыцауы —
Йӕ хорзӕх мыггагмӕ у.
3Стаут барджынты Барджыны —
Йӕ хорзӕх мыггагмӕ у.
4Ӕвӕджиауы диссӕгтӕ
ӕрмӕстдӕр Уый аразы —
Йӕ хорзӕх мыггагмӕ у.
5Уый Йӕ уӕлзонды фӕрцы
сфӕлдыста уӕлӕрвтӕ —
Йӕ хорзӕх мыггагмӕ у;
6дӕтты сӕрмӕ айтыгъта зӕхх —
Йӕ хорзӕх мыггагмӕ у;
7стыр рухсгӕнӕнтӕ сфӕлдыста —
Йӕ хорзӕх мыггагмӕ у.
8Уый сфӕлдыста хур — бонӕн уаг ӕвӕрынӕн —
Йӕ хорзӕх мыггагмӕ у;
9мӕй ӕмӕ стъалытӕ — ӕхсӕвӕн уаг ӕвӕрынӕн —
Йӕ хорзӕх мыггагмӕ у.
10Уый Мысыры зӕххыл
бабын кодта фыццаггуырдты —
Йӕ хорзӕх мыггагмӕ у;
11ракодта уырдыгӕй Израилы адӕмы —
Йӕ хорзӕх мыггагмӕ у.
12Уый Йӕ къухӕй, Йӕ хъомысджын къухӕй
стыр хъуыддӕгтӕ сарӕзта —
Йӕ хорзӕх мыггагмӕ у;
13Сырх денджызы дон
фӕцӕуын кодта фӕйнӕрдӕм —
Йӕ хорзӕх мыггагмӕ у;
14ӕмдзӕхгӕр сис-уылӕнты’хсӕнты
Израилы адӕмы ракодта —
Йӕ хорзӕх мыггагмӕ у;
15фараоны ӕд ӕфсад
Сырх денджызы фӕдӕлдон кодта —
Йӕ хорзӕх мыггагмӕ у;
16Йӕ адӕмы ахизын кодта ӕдзӕрӕг быдырыл —
Йӕ хорзӕх мыггагмӕ у;
17стыр паддзӕхты бабын кодта —
Йӕ хорзӕх мыггагмӕ у.
18Уый амардта хъомысджын паддзӕхты —
Йӕ хорзӕх мыггагмӕ у;
19аморӕгты паддзах Сигоны —
Йӕ хорзӕх мыггагмӕ у;
20Башаны паддзах Огы —
Йӕ хорзӕх мыггагмӕ у;
21сӕ зӕххытӕ сын радта исбонӕн —
Йӕ хорзӕх мыггагмӕ у;
22Йӕ лӕггадгӕнӕгӕн, Израилӕн, сӕ исбонӕн радта —
Йӕ хорзӕх мыггагмӕ у.
23Не’фхӕрды заман нӕ Дунедарӕг ӕрымысыд —
Йӕ хорзӕх мыггагмӕ у;
24не знӕгтӕй нӕ фервӕзын кодта —
Йӕ хорзӕх мыггамӕ у.
25Уый алы цӕрӕг удӕн хойраг дӕтты —
Йӕ хорзӕх мыггамӕ у.
26Стаут уӕларвы Хуыцауы —
Йӕ хорзӕх мыггамӕ у.