Psa 52 | OssIBT2022 | STEP | Зарӕггӕнджыты къорды разамонӕгӕн. «Махалат»-ы зӕлтӕм гӕсгӕ. Давиды зондамонӕн псалом.

‏ Psalms 52

1 Зарӕггӕнджыты къорды разамонӕгӕн. «Махалат»-ы зӕлтӕм гӕсгӕ. Давиды зондамонӕн псалом.

2 Ӕнӕзонд дзуры йӕ мидзӕрдӕйы:
«Хуыцау нӕй».
Адӕм фехӕлдысты,
ӕбуалгъ митыл бафтыдысты;
хорз хъуыддаг аразӕг нал ис.
3 Хуыцау уӕларвӕй фӕлгӕсы адӕммӕ,
кӕсы: цымӕ се’хсӕн,
Хуыцауы чи агуры,
ахӕм иу ӕмбаргӕ адӕймаг ис?
4 Се’ппӕт дӕр адзӕгъӕл сты,
фехӕлдысты се’ппӕт дӕр;
хорздзинад ничиуал кӕны,
иунӕг адӕймаг дӕр.
5 «Ау, не’рӕмбардзысты фыдгӕнджытӕ,
мӕ адӕмы мын дзулы хӕрд чи кӕны
ӕмӕ Хуыцауы чи нӕ агуры, уыдон?»
6 Ӕппындӕр сын тас кӕм ницӕмӕй уыд,
уым сыл ӕвиппайды ӕвирхъау тас ӕртыхсдзӕн.
Хуыцау дын де знӕгты стджытӕ ныххӕлиу кӕндзӕн,
фӕхудинаг сӕ кӕндзынӕ,
уымӕн ӕмӕ сыл Хуыцау атигъ кӕндзӕн Йӕхи.
7 Тӕхуды ӕмӕ Израилӕн
Сионӕй ирвӕзындзинад лӕвӕрд куы’рцӕуид!
Хуыцау Йӕ адӕмы уацарӕй куы раздаха,
уӕд Йаков ныццин кӕндзӕни,
ӕмӕ Израил райдзӕни.