Psalms 84
1Зарӕггӕнджыты къорды разамонӕгӕн. Корахы фыртты псалом. 2О Дунедарӕг!Дӕ бӕстӕйӕн саккаг кодтай Дӕ хорзӕх,
уацарӕй раздӕхтай Йаковы байзӕддаджы.
3Дӕ адӕмӕн сӕ азым ныббарстай,
сӕ тӕригъӕдтӕ сын ныххатыр кодтай.
4Нал мӕсты кодтай,
Дӕ маст ӕрсабыр ис.
5Нӕ ирвӕзынгӕнӕг Хуыцау,
сног нын кӕн нӕ тых,
мауал ныл кал Дӕ маст!
6Ау, ӕнусмӕ нӕм мӕсты кӕндзынӕ?
Иу фӕлтӕрӕй иннӕмӕ судздзӕни Дӕ маст?
7Ау, нал нӕ раздахдзынӕ цардмӕ,
цӕмӕй Дӕ адӕм цин кӕной,
Ды семӕ кӕй дӕ, ууыл?
8О Дунедарӕг, Дӕ хорзӕх нын ратт,
Дӕ ирвӕзындзинад нын балӕвар кӕн!
9Байхъусон, Дунедарӕг Хуыцау
цы зӕгъдзӕни, уымӕ.
Уый Йӕ иузӕрдион адӕмӕн
сабыр цардӕй зӕрдӕ ӕвӕры.
Ӕрмӕст ныууадзӕнт се’нӕсӕрфат митӕ.
10Чи Дзы тӕрсы,
уыдоны рӕхджы фервӕзын кӕндзӕн,
ӕмӕ нӕ бӕстӕйы Хуыцауы кад ӕрцӕрдзӕн.
11Хорзӕх ӕмӕ иузӕрдиондзинад баиу уыдзысты,
рӕстдзинад ӕмӕ фарн кӕрӕдзийӕн батӕ кӕндзысты.
12Иузӕрдиондзинад тау суадздзӕни зӕххӕй,
ӕмӕ рӕстад ӕркӕсдзӕни уӕларвӕй.
13Хуыцау зӕххыл ӕруадздзӕни Йӕ фарн,
ӕмӕ нын нӕ зӕхх ратдзӕни йӕ тыллӕг.
14Дунедарӕгӕн Йӕ разӕй цӕудзӕни Йӕ рӕстад
ӕмӕ Йын ӕрцӕттӕ кӕндзӕни фӕндаг.
Copyright information for
OssIBT2022