‏ Psalms 106

1Кад кӕнут Дунедарӕгӕн,
стаут Ӕй, уымӕн ӕмӕ ныл ауды,
мыггагмӕ нӕ буц кӕны Йӕ хорзӕхтӕй!
2Афтӕ зӕгъӕнт,
Дунедарӕг кӕй ссӕрибар кодта,
се’фхӕрджыты къухӕй кӕй байста,
3алы бӕстӕтӕй — скӕсӕнӕй, ныгуылӕнӕй,
цӕгатӕй ӕмӕ хуссарӕй —
кӕй ӕрӕмбырд кодта, уыцы адӕм.
4Уыдонӕй иутӕ фӕдзӕгъӕл сты сыгъд быдыры,
ӕмӕ ма искуы исты сахар, исты хъӕу ссардзысты,
уый сӕ нал уырныдта.
5Фыр стонг ӕмӕ фыр дойныйӕ
арвмӕ асинтӕ амадтой,
сӕ уд удыл нал хӕцыди.
6Фыр адӕргӕй Дунедарӕгмӕ сдзынӕзтой,
ӕмӕ сӕ Уый фыд азарӕй бахызта:
7фӕндаг сын бацамыдта,
цы сахары ӕрцӕрӕн ис, уырдӕм.
8Уӕдӕ стауӕнт Дунедарӕджы
Йӕ хорзӕхы тыххӕй,
адӕмӕн цы диссаджы хъуыддӕгтӕ сарӕзта,
уыдоны тыххӕй!
9Уымӕн ӕмӕ Уый дойныгӕнӕг удтӕн
суагъта сӕ дойны,
хӕрзтӕй бафсӕста ӕххормӕгты зӕрдӕтӕ.
10Иннӕтӕ та саудалынджы, мӕрдон тары бадтысты
ӕмӕ се’фсӕн хъадаманты бын удхарӕй мардысты,
11уымӕн ӕмӕ сӕхи атигъ кодтой
Хуыцауы ныхӕстыл,
Иууылбӕрзонды уынаффӕтӕ
ницӕмӕ’рдардтой.
12Ӕмӕ сын Уый дӕр уӕззау куыстӕй
бадомдта сӕ зӕрдӕтӕ;
фӕцудыдтой — фӕхӕцӕг сыл нӕ уыди.
13Фӕлӕ сӕ тыхсты заман
Дунедарӕгмӕ сдзынӕзтой,
ӕмӕ сӕ Уый фыдбылызӕй фервӕзын кодта.
14Саудалынгӕй, мӕрдон тарӕй сӕ рухсмӕ ракодта,
сӕ хъадамантӕ сын ныссаста.
15Уӕдӕ стауӕнт Дунедарӕджы
Йӕ хорзӕхы тыххӕй,
адӕмӕн цы диссаджы хъуыддӕгтӕ сарӕзта,
уыдоны тыххӕй!
16Уымӕн ӕмӕ Дунедарӕг
ӕрхуы дуӕрттӕ ныппырх кодта,
ӕфсӕн ӕвдузӕнтӕ ныссаста.
17Ӕнӕзӕндтӕ сӕ азымты тыххӕй,
сӕ алы фыдракӕнды аххосӕй
хъизӕмарӕй мардысты.
18Къӕбӕр сын ад нал кодта,
мӕлӕты къахыл ныллӕууыдысты.
19Фӕлӕ сӕ тыхсты Дунедарӕгмӕ сдзынӕзтой,
ӕмӕ сӕ Уый фыдбылызӕй фервӕзын кодта.
20Йӕ ныхас рарвыста,
ӕмӕ сдзӕбӕх сты, фервӕзтысты мӕлӕтӕй.
21Уӕдӕ стауӕнт Дунедарӕджы
Йӕ хорзӕхы тыххӕй,
адӕмӕн цы диссаджы хъуыддӕгтӕ сарӕзта,
уыдоны тыххӕй!
22Ӕрхӕссӕнт Ын арфӕйы нывӕндтӕ,
цинӕй райгӕйӕ Йын ӕппӕлӕнт Йӕ хъуыддӕгтӕй!
23Денджызы наутыл балцы чи ацыд,
ӕгӕрон фурды уылӕнтыл йӕ куыст чи кодта,
24уыдон уыдтой Дунедарӕджы хъуыддӕгтӕ,
Йӕ диссӕгтӕ доны арфы.
25Йӕ ныхасӕй-иу уад сыстади,
хӕрдмӕ-иу фӕцыдысты денджызы уылӕнтӕ.
26Наутӕ-иу арвы хъӕбысмӕ фехстой сӕхи,
стӕй та-иу фурды ӕнӕбын арфы фестадысты;
наудзогтӕн-иу сӕ уд атади фыр тӕссӕй.
27Зилдух кодтой, расгуытау цудыдтой,
фыр тӕссӕй сӕ зонд дзӕгъӕлтӕ кӕнын байдыдта.
28Фӕлӕ сӕ тыхсты Дунедарӕгмӕ сдзынӕзтой,
ӕмӕ сӕ Уый фыдбылызӕй фервӕзын кодта.
29Уый ӕрсабыр кодта уад,
ӕмӕ уылӕнтӕ банцадысты.
30Адӕм фыр цинӕй радысты,
уылӕнтӕ кӕй ӕрсабыр сты, ууыл.
Дунедарӕг та адӕмы бахӕццӕ кодта
сӕ бӕллиццаг наулӕууӕнмӕ.
31Уӕдӕ стауӕнт Дунедарӕджы
Йӕ хорзӕхы тыххӕй,
адӕмӕн цы диссаджы хъуыддӕгтӕ сарӕзта,
уыдоны тыххӕй!
32Адӕмон ӕмбырды Йӕ стауӕнт,
кад ын кӕнӕнт хистӕрты астӕу.
33Уый цӕугӕдӕттӕ фестын кӕны
ӕдзӕрӕг быдыртӕ,
суадӕттӕ — хуыскъ зӕхх,
34йӕ цӕрджыты ӕнӕраст миты тыххӕй
цӕхбын фесты бӕзнаг мӕр.
35Уый ӕдзӕрӕг быдыр фестын кӕны цад,
хуыскъ зӕххыл сабузын кӕны суадӕттӕ.
36Ӕмӕ уыцы ран Хуыцау ӕрцӕрын кӕны,
уымӕй размӕ сыдӕй чи марди, уыцы адӕмы.
Ӕмӕ дзы уыдон сӕхицӕн саразынц сахартӕ,
37байтауынц сӕ хуымтӕ, скӕнынц сӕндӕттӕ
ӕмӕ хъӕздыг тыллӕг сисынц.
38Хуыцау сын арфӕ ракӕны,
ӕмӕ фылдӕрӕй-фылдӕр кӕнынц,
сӕ фосӕн дӕр бакӕнӕнтӕ нал вӕййы.
39Фӕлӕ чысыл куы вӕййы сӕ нымӕц,
ӕфхӕрд, фыдбӕллӕх ӕмӕ тухиты бын
хъизӕмар куы февзарынц,
40уӕд сын Хуыцау сӕгад кӕны сӕ фӕтӕгты,
ӕдзӕрӕг ранмӕ сӕ акӕны,
ӕмӕ уым фӕдзӕгъӕл вӕййынц.
41Мӕгуырты та скадджын кӕны,
сӕ мӕгуыр царды ахӕстӕй сӕ ракӕны,
сӕ мыггаг сын сбирӕ кӕны фосы дзугау.
42Рӕстгӕнджытӕ цинӕй райынц, уыдӕттӕ уынгӕйӕ,
ӕнаккӕгтӕн та сӕ бон зӕгъын дӕр ницыуал вӕййы.
43Уӕлзонд кӕмӕ ис, уый лӕмбынӕг ӕркӕсӕд
ӕмӕ Хуыцауы хорзӕх бамбарӕд.