Psa 18 | OssIBT2022 | STEP | Зарӕггӕнджыты къорды разамонӕгӕн. Давиды псалом.

‏ Psalms 18

1 Зарӕггӕнджыты къорды разамонӕгӕн. Давиды псалом.

2 Уӕлӕрвтӕ Хуыцауы кадыл дзурынц,
арвы къӕй ӕвдисӕн у Йӕ хъуыддӕгтӕн!
3 Бон бонӕн ныхас ӕрвиты,
ӕхсӕв ӕхсӕвӕн раргом кӕны зонындзинад.
4 Иу дзырд, иу ныхас,
иунӕг мыр нӕ хъуысы,
5 афтӕмӕй ӕппӕт зӕххыл
азӕлы сӕ хъӕлӕс,
дунейы иу кӕронӕй иннӕмӕ
айхъуысти сӕ ныхас.
Уый хурӕн цатыр сӕвӕрдта уӕлӕрвты,
6 ӕмӕ рахизы уырдыгӕй, райгӕйӕ,
раст цыма ногусджын — йӕ уатӕй;
дугъы ауайы ӕхсызгонӕй.
7 Арвы иу кӕронӕй райдайы йӕ фӕндаг,
абалц кӕны иу кӕронӕй иннӕмӕ,
ӕмӕ нӕй бамбӕхсӕн йӕ тӕвдӕй.

8 Дунедарӕджы Ӕгъдау
алцӕмӕй дӕр ӕххӕст
ӕмӕ царддӕттӕг у.
Йӕ уагӕвӕрдтӕ раст сты,
ӕнӕхинӕн уӕлзонд дӕттынц.
9 Дунедарӕджы амындтытӕ рӕстаг сты,
зӕрдӕ сӕ райы.
Йӕ фӕдзӕхстытӕ рухс сты —
байгом кӕнынц цӕстытӕ.
10 Хуыцауы тас — сыгъдӕг,
нӕ фесӕфдзӕни мыггагмӕ.
Дунедарӕгӕн йӕ тӕрхӕттӕ — ӕцӕг,
иууылдӕр рӕстаг сты.
11 Зӕрдӕйӕн ӕхцондӕр сты сыгъзӕринӕй,
суанг ӕнӕнымӕц сыгъдӕг сыгъзӕринӕй,
адджындӕр сты мыдӕй
ӕмӕ мыды фӕзгъӕртӕй.
12 Мӕн, Дӕ цагъары, хъахъхъӕнынц уыдон,
се’ххӕст кӕнын — ме стырдӕр хӕрзиуӕг.

13 Чи уыны йӕ рӕдыдтытӕ?
Ӕнӕзонгӕйӕ цы тӕригъӕдтӕ ракодтон,
уыдонӕй мӕ ссыгъдӕг кӕн!
14 Барвӕндӕй кӕй ракӕнӕн ис,
уыдонӕй дӕр бахиз Дӕ цагъары,
цӕмӕй мыл ма фӕуӕлахиз уой.
Уӕд ӕз баззайдзынӕн сыгъдӕгӕй,
стыр тӕригъӕд мӕхимӕ нӕ райсдзынӕн.
15 Мӕ дзыхӕй рацӕугӕ ныхӕстӕ,
мӕ зӕрдӕйы сагъӕстӕ,
ӕхсызгон уӕнт Дӕуӕн, Дунедарӕг!
Ды — мӕ къӕдзӕх, мӕ ирвӕзынгӕнӕг.