Psa 55 | OssIBT2022 | STEP | Зарӕггӕнджыты къорды разамонӕгӕн. «Дард ран бадӕг ӕдзӕм бӕлон»-ы зӕлтӕм гӕсгӕ. Давиды кадӕг. Филистимӕгтӕ йӕ Гаты сахары куы’рцахстой, уӕд.

‏ Psalms 55

1 Зарӕггӕнджыты къорды разамонӕгӕн. «Дард ран бадӕг ӕдзӕм бӕлон»-ы зӕлтӕм гӕсгӕ. Давиды кадӕг. Филистимӕгтӕ йӕ Гаты сахары куы’рцахстой, уӕд.

2 О Хуыцау, батӕригъӕд мын кӕн!
Адӕм мӕ фӕдыл зилынц,
лӕбурынц мӕм, ссӕндынц мӕ ӕрвылбон.
3 Ме знӕгтӕ ӕнӕхъӕн бон мӕ фӕдыл зилынц,
бирӕ сты мӕ ныхмӕ тохгӕнджытӕ.
4 Тасы куы бацӕуын,
уӕд мӕ зӕрдӕ Дӕуыл фӕдарын.
5 Кӕй дзырдӕй ӕппӕлын,
уыцы Хуыцау мӕ ныфс у, ӕмӕ нӕ тӕрсын:
цы мын ракӕндзӕн адӕймаг?
6 Ӕрвылбон мын уыдон фауынц
мӕ хъуыддӕгтӕ ӕмӕ мӕ ныхӕстӕ,
цы фыд мын ракӕной,
ууыл сты сӕ хъуыдытӕ.
7 Фыдвӕндтӕ кӕнынц, бабадынц мӕ размӕ,
мӕ алы къахдзӕф дӕр мын хъахъхъӕнынц,
цӕмӕй мӕ уд бахауа сӕ ахӕсты.
8 Ау, сӕ азым ӕнӕ’фхӕрдӕй баззайдзӕн?
О Хуыцау, Дӕ азары хай бакӕн адӕмты!
9 Дӕумӕ фыст сты ме’ппӕт тухӕнтӕ,
мӕ цӕссыгтӕ мын Дӕ мигӕнӕны нывӕр,
уадз ӕмӕ Дӕ чиныджы уой.
10 Куыддӕр Дӕм скувын,
афтӕ ме знӕгтӕ лидзӕг фӕвӕййынц —
уымӕй базонын, Хуыцау ме’вварс кӕй у, уый.
11 Кӕй ныхас стауын, уыцы Хуыцауыл,
Кӕй дзырд стауын, уыцы Дунедарӕгыл
12 мӕ зӕрдӕ дарын ӕмӕ нӕ тӕрсын:
цы мын ракӕндзӕн адӕймаг?
13 О Хуыцау, ӕз Дӕ разы
сӕххӕст кӕндзынӕн мӕ сомытӕ,
ӕрхӕсдзынӕн Дын арфӕйы нывӕндтӕ!
14 Уымӕн ӕмӕ мын Ды
мӕ уд бахызтай мӕлӕтӕй,
мӕ къӕхтӕ — фӕкӕлынӕй,
цӕмӕй Хуыцауы раз царды рухсы цӕуон.