Psa 59 | OssIBT2022 | STEP | Зарӕггӕнджыты къорды разамонӕгӕн. «Шушан едут»-ы зӕлтӕм гӕсгӕ. Давиды зарӕг

‏ Psalms 59

1 Зарӕггӕнджыты къорды разамонӕгӕн. «Шушан едут»-ы зӕлтӕм гӕсгӕ. Давиды зарӕг — ахуыр кӕнынӕн. Фыст ӕрцыдис, 2 Арам-Нахараим ӕмӕ Арам-Цовайы бӕстӕтӕ куы басаста, Йоав та, фӕстӕмӕ здӕхгӕйӕ, Цӕхджын дӕлвӕзы едомӕгтӕй дыууадӕс мины куы ныццагъта, уӕд.

3 О Хуыцау! Хъоды ныл бакодтай,
ныццагътай нӕ, смӕсты нӕм дӕ,
фӕлӕ та нӕ Дӕ хорзӕхы аккаг скӕн.
4 Ды ризӕг бахӕцын кодтай зӕххыл,
ныскъуыдтӕ йӕ кодтай;
сдзӕбӕх ын кӕн йӕ хъӕдгӕмттӕ —
фезмӕлыдис йӕ бынатӕй.
5 Дӕ адӕмӕн бавзарын кодтай фыдбылызтӕ,
сӕрзилӕн сӕн нын бадардтай.
6 Сис Дӕ тырыса,
Чи Дӕ тӕрсы, уыдоны сӕрмӕ,
цӕмӕй йӕ иумӕ фатты ныхмӕ айтындзой,
7 цӕмӕй Дӕ уарзон адӕм фервӕзой.
Дӕ рахиз къухӕй нӕ фервӕзын кӕн,
нӕ куывд нын фехъус.

8 Дунедарӕг Йӕ Кувӕндоны загъта:
«Ӕз фӕуӕлахиз уыдзынӕн,
байуардзынӕн Шехемы зӕхх,
Суккоты дӕлвӕз ныддихтӕ кӕндзынӕн.
9 Мӕн у Галаад,
Менассиа дӕр — Мӕн;
Ефрем у Ме згъӕрхуд,
Иудӕ — Мӕ паддзахлӕдзӕг,
10 Моав — Мӕ хихсӕн тас.
Мӕ дзабыр аппардзынӕн Едомыл,
филистимӕгты зӕххыл
айзӕлдзӕни Мӕ цины хъӕр!»
11 Бырухгӕд сахармӕ мӕ чи бакӕндзӕн?
Чи мӕ акӕндзӕн Едомы онг?
12 Уый Ды нӕ уыдзынӕ, нӕ Хуыцау?
Де’ргом нӕ куы аздӕхтай,
не’фсадимӕ хӕстмӕ куынӕуал цӕуыс!
13 Тыхст заманы нын баххуыс кӕн, —
адӕймагыл зӕрдӕ дарӕн нӕй.
14 Хуыцауимӕ уӕлахиз кӕндзыстӕм,
Уый нын басӕтдзӕнис не знӕгты.