Rev 15 | OssIBT2022 | STEP | Ӕз арвыл федтон ноджы ма иу стыр ӕмӕ ӕмбисонды ӕвдисӕйнаг — авд зӕды фӕстаг авд бӕллӕхимӕ, уымӕн ӕмӕ уыдоныл Хуыцауы фыдӕх фӕуыдзӕн.

‏ Revelation of John 15

Авд зӕды ӕмӕ авд рыны

1 Ӕз арвыл федтон ноджы ма иу стыр ӕмӕ ӕмбисонды ӕвдисӕйнаг — авд зӕды фӕстаг авд бӕллӕхимӕ, уымӕн ӕмӕ уыдоныл Хуыцауы фыдӕх фӕуыдзӕн.

2 Ӕмӕ ӕз федтон артимӕ хӕццӕ авджын денджызау цыдӕр. Сырдыл, йӕ сурӕтыл, йӕ номы нымӕцыл чи фӕтых, уыцы адӕм Хуыцауы фӕндыртимӕ лӕууынц авджын денджызыл ^a 3 ӕмӕ зарынц Хуыцауы цагъар Моисейы зарӕг ӕмӕ Уӕрыччы зарӕг: «Стыр ӕмӕ диссаг сты Дӕ хъуыддӕгтӕ,
Ӕппӕтылхӕцӕг Дунедарӕг Хуыцау!
Раст ӕмӕ ӕцӕг сты Дӕ фӕндӕгтӕ,
адӕмты Паддзах!
4 Чи нӕ фӕтӕрсдзӕн Дӕуӕй, Дунедарӕг,
чи не скӕндзӕн кад Дӕ номӕн?
Уымӕн ӕмӕ сыгъдӕг ӕрмӕстдӕр Ды дӕ.
Ӕрцӕудзысты ӕппӕт адӕмтӕ
ӕмӕ Дӕм кувдзысты,
уымӕн ӕмӕ раргом сты Дӕ раст тӕрхӕттӕ».

5 Уый фӕстӕ ӕз федтон: уӕларвы байгом ис Кувӕндон — Сыгъдӕг Цатыр. 6 Гӕн хъуымацӕй сыгъдӕг ӕмӕ ӕрттивгӕ дарӕсы, сӕ риутыл сыгъзӕрин рӕттӕ, афтӕмӕй Кувӕндонӕй рацыдысты авд зӕды — авд рынимӕ. 7 Цыппар уӕларвон удгоймагӕй иу ацы авд зӕдмӕ радта авд сыгъзӕрин кӕхцы, уыдон та йемыдзаг уыдысты, мыггагӕй-мыггагмӕ цардӕгас Чи у, уыцы Хуыцауы фыдӕхӕй. 8 Кувӕндон байдзаг ис Хуыцауы кад ӕмӕ тыхы фӕздӕгӕй, ӕмӕ Кувӕндонмӕ бацӕуын никӕй бон уыдис, цалынмӕ авд зӕдӕн сӕ авд рыны фӕуой, уӕдмӕ.