‏ 1 Corinthians 12

Bar ju Ruhu kǝ Yam ba bi gwa

1Mir ɓyari, kǝkǝno den shirǝm kǝ bar ju Ruhu ba biwo, a ndu’e kǝ hol momi da’a. 2Kǝ mom’e nan kǝ dǝm mǝn kopiwi dawo, jili inka den kopi bar ju ba bote wur kan na bi dagwa. 3Ra untuwo, a ndu kǝ mom’e murgon ra kan ba shirǝm tǝp kar Ruhu kǝ Yam kan ba wule, «Yesu na bi gip ti!» Untuni es murgon ba mani wultǝn’e, «Yesu Babom ni,» se gip tǝp gip ndǝrtǝn kǝ Ruhu kǝ Yami. 4Bi bar ra na womti, ama Ruhuwo nǝm ni. 5Mbap kǝ pi ra na womti, ama Babom nǝm ni ba pi ti. 6Mbap ra na womti, ama kup gǝzǝno Yam nǝm ni ba bi ko gonge mbarǝm tǝ pi. 7Yam bi ko gonge mbarǝm bi bar kǝ Ruhu den dǝ ne am mbarǝm kup ra. 8Gono bi tini bi bar kǝ Ruhu kǝ shirǝm na bobya. Gon ngapo bi tini bi bar kǝ shirǝm kǝ momi bari, tǝp kar nǝm Ruhu tu. 9Gono bi ti ni mani bar kǝ ngǝshtǝn den Yam tǝp kar Ruhu tu. Gon ngapo kǝ mani pǝni mbarǝm kumi dlika tǝp kar Ruhu tu. 10Gono pi bar kǝ dlǝkǝntǝne. Gono bi bar kǝ yari shirǝm kǝ Yami. Gon ngap momi Ruhu na dun itǝri. Gono mani pi shirǝm gip bi na womti, gon eso pasare bi na womti. 11Kup bar juwo, Ruhu nǝm ni ba kem wur kǝ pitǝne. Tǝ bi ni ko gonge gǝzǝn kandatu tǝ ndu gwa.

Kup gǝmi kǝtǝ kǝ dli nǝm ni.

12Kandatu kan dli ra nǝm, tǝ ra es na kǝtǝ na womti. Wi kǝtǝyi ngap, kup na wi ra na womtiyo, dli nǝm ni. To, untun Almasihu ra. 13Kup gǝmiwo pi mi ni batisma gip Ruhu nǝm mǝ dǝm dli nǝmwi, mǝn Yahuda ko munju mǝn Yahuda ni da’a, ko zhere ko mimiri, kup gǝmiwo mǝ tla ni gip Ruhu nǝm. 14Dliwo kǝtǝ nǝm ni da’a, kǝtǝ ni na womti. 15Asǝm ni wule, «Tunkan ami am ni dawo, ami kǝti kǝ dli ni da’a.»Yari untun ba kem dǝ ɗǝli tika gip kǝtǝ kǝ dli da’a. 16O kǝm pa ni wule, «Tun kan ami ger ni dawo, ami kǝtǝ kǝ dli ni da’a» Yari untun ba ɗǝli ti ka gip kǝtǝ kǝ dli da’a. 17Dǝ wule dli kup gerno, na unun ba kumi? Dǝ wule dli kup kǝmno, na unun ba usun bari? 18An tu Yam kǝrkǝm kǝtǝ kǝ dli kup kandatu tǝ ndu gwa. 19Dǝ wule kup dli kǝti nǝmno ako ni nami dli ba nǝra? 20Ama antu kǝti ra na womti, dli ngap nǝm. 21Ger ba mani wule am e, «Argon mom nan ki da’i da’a,» ko dǝ gam wul asǝm e, «Argon mom nan kǝn da’a,» 22Untuni anra da’a, kǝti kǝ dli ju ba shin wule ndǝri da ma, wi ni’e mǝn pi mbap hoyi. 23Kǝti kǝ dli ju kan ba shin wu ri jen nartǝn dawo, wi ni mǝ mani bi wur nartǝni. Den untuni kǝti kǝ dli gǝmi kan tǝm shini da’a, ba pi bar kǝ mbǝli ra den mbuntǝn gǝzǝni. 24Kǝti kǝ dli gǝmi ju kan tǝm shini ngap, ba se pi wur argon ra da’a. Ama Yam ni mo dli, tǝ pali kǝti tu kan nar da’a, ar dǝm mǝn pi mbap hoyi. 25Ba dǝ tatli gam zam gip dli da’a, se dǝ kǝti kǝ dli ne am ezǝn ra biyi nǝm. 26Den untuni kup kǝti tu ba kum dliwo, se wu kum dli biyi nǝm. In ɗǝɗa gono, se kup gǝzǝn wu pi ghol mbatli.

27Kǝkǝno kǝn dli kǝ Almasihu ni, ko gonge gin kǝti kǝ dli gǝs ni. 28Gip domtǝn kǝ mǝn kopiwo, Yam kem dǝ jen dǝm kǝ nǝm mir mǝn kartǝne, kǝ rop mǝn yari shirǝm kǝ Yami, kǝ myakan mǝn kulci mbarǝme, se mǝn pi bar kǝ dlǝkǝntǝne. Se mǝn mani pǝni kumi dli kǝ mbarǝm ka, na mǝn ne wur am ra, na mǝn kopi na domtǝn kǝ mǝn kopi, na mǝn shirǝm na bi kǝ jen na womti. 29Kupo, mǝn kartǝn na? Ko kup kani’e mǝn yari shirǝm kǝ Yami? Ko kup mǝn kulci ni? Kup kan mǝn pi bar kǝ dlǝkǝntǝna? 30Kup kan na mani pǝni kumi dli mbarǝm ka ya? Kup kani na mani shirǝm na bi kǝ jena? Ko kup ka ni ba pasare ya? 31Se kǝ kǝrceni kǝ ngeni bi bar tu kan man kup gwa. Har aa gode in tǝpi gon kan mani kup gwa.