‏ 1 John 2

1Mimir gǝn gip Almasihu, a rǝshi inni muntu den ba kǝ pini warwat pitǝn da’a. Ama muntu kup pi warwat pitǝno, mǝn ra na muntu ba shirǝm na Ba gǝmi Yam den am gǝmi gwa, ti ni’e Yesu Almasihu mǝn pitǝn dlat. 2Tǝp kǝba mǝshtǝn gǝs ni lo kǝ Yam den mi paka, kan ti’i nǝm mi den warwat pitǝn gǝmi da’a, ba’e gwagǝmi ni katl da’a ama na kǝ mbarǝm den kaar atl kundǝrǝndlip.

3Mǝnni mǝ kop argon tu tǝ wule mǝ piwo, ar gode’e mǝ mom ti ituwi. 4Kup muntu kan wule, «A mom Yami» ama tǝ kop argon tu tǝ wule dǝ pi dawo, mǝn ceni lar ni kan ge shirǝmi ngap ra gip ti da’a. 5Ama kup muntu ba kop ge shirǝm gǝso, na ho bi tǝ ndu Yam nari. Na untun mǝ mom’e mǝn gwas ni. 6Muntu kup pǝn’e tǝ gwasno, ar nǝm ti te yarka tǝ pi kandatu Yesu pi gwa.

7Mir ɓyar kǝ ndu’i, shirǝm tu a rǝshi in gwani’e argon tu Yam wule kǝ pi gwa. Argon ni kan kǝ hol kumi terka gwa da’a. Nǝm shirǝm ta kan kǝ mom na la’i gǝs kǝ kopi Yesu gwani. 8Kup na untu, pel shirǝm ni a rǝshi ine. Ge shirǝm tu ba shin gip ti nan kǝn gwa, rawo dǝmǝn den ndoltǝnka kan ho cirtǝn den cirtǝnwi. 9Kup muntu wule «Ami ra gip cirtǝni» ama tǝ den nge esi mǝn kopiwo, tǝ ini gip dǝmǝni. 10Muntu kup ba ndu esi mǝn kopiwo ti ni den dǝmi gip cirtǝni. Argon ra den tǝp gǝs ka n baa kem ti kǝ pi wani bar gwa da’a. 11Ama kup muntu ba nge esi mǝn kopiwo gip dǝmǝn ni tǝra, tǝ den dǝmi gipi. Tǝ mom las tu tǝ ri gwa da’a, domici dǝmǝn le ti ger kawi.
12Mimir gǝn gip Almasihu, a rǝshi in ni
den’e tǝp kar Yesuwo Yam nǝm kǝn den warwat pitǝn gin da’a.
13Ga bǝba, a rǝshi in ni
den’e kǝ mom tǝ wi muntu kan ra na pare pi bar gwa.
Mir moni, a rǝshi in ni
den’e kǝ tla gam kǝ gun dun itǝrwi.
Kǝn mimiri, a rǝshi in ni
den’e kǝ mom Ba gǝmi Yam wi.
14Ga bǝba, a rǝshi in ni
den’e kǝ tare kǝ mom tiwi muntu kan ti nǝra tun ter ka gwa.
Mir moni, a rǝshi in nǝra,
den’e kǝ ndǝr wi, shirǝm kǝ Yam ngap ra gip kǝne, eso kǝ tla gam kǝ gun dun itǝr wi.

15Ba kǝ ndu ni pi argon tu mbarǝm ju kan mom Yam da’a ba ndu pi gwa. bar juwo kǝ atl ni. Muntu kup ba ndu tǝ pi bar ju kan ba gholi Bǝbayi mbatl dawo, tǝ ndu Bǝbayi da’a 16Ne su mbatl den’e mbarǝm ju kan mom Yam ba ndu ni’e wu pi bar ju wu ndu gwa katl. Wu ndu wu zam kup argon tu wu shin ko wu kum gwa. Wu ɓo ngetl na bar kǝ am ju kan wi ra nari gwa. Dǝmi gip warwat pitǝn juwo kar Bǝba ni ba zam wur da’a! Ama pitǝn kǝ mbarǝm kan ba dǝm kandatu wi gholi Yam mbatl gwa da’a ni. 17Mbarǝm ju kan mom Yam da’a na kup bar ju wu pi lamiwo ba paka, ama kup muntu ba pi argon tu Yam ba ndu’o, ti pi dǝmi tu kan ba pa da gwa.

Mǝn nge Almasihu

18Mir ɓyari, patǝn kǝ bar mbira kosak wi. Mǝ yari in tunka’e mǝn nge Almasihu ba cwati. Kǝkǝn ma mǝn nge Almasihu na womti mbirawi. Tǝp untu ni mǝ mom’e patǝn kǝ bar rawi kosak. 19Wu ɗǝlni gǝzǝn gip mi, ama na ho bi gwagǝmi ni da’a. O wi gwagǝmi ni fawo na wu sa gip miwi, ama ɗǝltǝn gǝzǝn gode’e ko nǝm gip wur ra kan gwagǝmi ni gwa da’a. 20Ama kǝno Almasihu bi in Ruhu gǝs wi. Kup gin ngap kǝ mom ge shirǝmi. 21A rǝshi in tǝlankur kǝno ba’e den kǝ hol ni momi ge shirǝm kǝ Yam da’a. Ama den kǝ momi, kǝ mom ngap’e lar shirǝm gon ra ba ɗǝl kar Yam da’a muntu kan’e gǝs kǝ ge shirǝm kup gwa. 22Woni’e mǝn ceni lare? Muntu kan nge nǝmi’e Yesu ni’e Almasihu gwani. Mǝn nge Almasihu ni’e muntu nge Bǝbayi na Nyayi gwa. 23Murgon baa nge Nyayi kan tǝ nǝra na Bǝbayi da’a. Muntu kan nǝm Nyayi ngapo tǝ ra na Bǝbayi. 24Zani bar ju kǝ pare kumi gwa ar dǝm gip kǝne. Kǝn ni kǝ ne shirǝmi kǝmo, kǝn den dǝmi gip Nyayi na Bǝbayi ituwi. 25Mǝnni mǝ dǝm gip me gam na Yam untuwo, mi zam ge mbatl kan baa pa da gwa muntu Almasihu wule ti bi mi gwa. 26A rǝshi in ni bar ju den munju ba ndu’e wu jili in ka gwa. 27Kǝn ngapo Almasihu bi in Ruhu gǝs wi, ki’i ndu dǝ murgon i kulci in da’a. Ra untuwo dǝmni na me gam na Almasihu gip mbatl gin kandatu Ruhu gǝs kulci in gwa.

Mimir kǝ Yami

28Mimir gǝn gip Almasihu, kǝkǝno dǝmni gip me gam nan ti, kǝdǝ tin tǝ cwato, mi zam ɓa’i bigul kǝ dlǝri cina da ti bat na tle shame. 29Kǝn ni kǝ mom’e ti mǝn pitǝn dlat no, ki pǝn tor mbatl’e kup muntu pi dlato ti gǝri kǝ Yam ni.