‏ Ephesians 4

Dǝmi nǝm gip dli kǝ Almasihu

1Ra untuwo, ami kan ra gip bom kǝ moni domici kǝ Almasihu, a lir kǝne, kǝn kan Yam zǝzar kǝn kǝ dǝm mbarǝm gǝs gwa, dǝ kǝ pini dǝmi tu kan ba gholi Yam mbatl gwa. 2Ko gigasi palini gam gin atli, na dǝmi na ghalǝm mbatli, dǝmni na te mbatl kaar ka, na mani dǝmi na ya’ǝn gip ndutǝne. 3Pini kup argon tu ki mani pi kǝ gaa ni me gam tu kan Ruhu bi in gwa. Pini untu gip dǝmi zhǝlili tu kan ngashi in gam gwa. 4Kup gino dli nǝm ni, Ruhu nǝm ni es ba kop nan kǝne. Kǝn ra na la’i mbatl nǝm kan lakǝn bi dene gwa. 5Babom gino nǝm ni, ngǝshtǝn den Yam gin nǝm ni, batisma nǝm ni pi ine. 6Yamo nǝm ni, ti ni’e Ba kǝ mbarǝm kup. Ti ni’e muntu kan den gam kǝ bar kup, tǝ pi mbap tǝp kar ko unu, kan tǝ den dǝmi gip ko unu.

7Almasihu bi ko gonge gǝmi zo bari. Tǝ bi ni na ɓuli ame. 8Kandatu ar ra na rǝshi gip shirǝm kǝ Yam gwa’e,
«Nan tǝ to gǝs yamo,
tǝ ndara na mbarǝm ju tǝ nǝm wur gwa,
kan tǝ bi mbarǝm bi bar kǝ Ruhu.» ▼

▼Zab. 68.18

9Ununuba pi nupi im ba’e faro tǝ surni gǝsi na atl da gwawu? 10Ti muntu sur atl tu ni’e nǝm muntu to yami gami dǝ ko gonge yami, kǝ dǝ iko gǝs nǝra gip atl kundǝrǝndlip. 11Almasihu yi ni bi jen mbap kǝ dǝmi mir mǝn kartǝne, jeno mbap kǝ yari shirǝm kǝ Yami, jeno mbap kǝ yari zo shirǝm kǝ Almasihu, kan jen ngapo mbap kǝ ne ger den mbarǝm kǝ Yami, na mǝn kulci mbarǝme. 12Mbap gǝzǝn ni’e wu kǝrkǝm mbarǝm kǝ Yam kǝ pi mbapi, kǝ dǝ wu tu dli kǝ Almasihu ra. 13Mbapi baa ci cina se kup gǝmi ni mo gam gip ngǝshtǝn na momi Nya Yami. Na untu ni mi ndǝr gip ngǝshtǝn den Yami, ar ri mi gip dǝmi kandatu Almasihu ragwa.

14Ra untuwo mi’i dǝm na holi damtǝn den bar wule mimir da’a. Ba’i bali mi ɗe na barta na ko gonge itǝr kǝ pel kulci bar da’a. Mi’i kop kǝ mbarǝm munju ba ndu jili gǝmi ka na lar munju ba ni wule ge shirǝm ni gwa da’a. 15Ama mi yari ge shirǝmi gip ndutǝne, mǝn den nartǝn gip ko unu wule Almasihu, muntu tini’e gam kǝ dliyi gwa. 16Tǝp kar tini dliyi kup mo gam dlakǝt. Kandatu ko gonge jwal ba pi zo mbap gǝs gwa, ar ba ne am jwali jen wu naari, kǝ dǝ dliyi kup nǝra gingǝlǝn den nartǝn na ndǝrtǝn gip ndutǝne.

Pel dǝmi gip Almasihu

17Kǝkǝno a ndu a yari in argon gip Babom den ba kǝ dǝm ni kandatu munju kan mom Yam da’a ba pi gwa, na jiltǝnka gip damtǝn kǝ mbatl gǝzǝni. 18Mbatl gǝzǝn nǝra laa’i na dǝmǝni, kan wi nǝra am luluri na rai tu kan Yam ba bi gwa domici kǝ dǝmǝn gam gǝzǝni, na lati mbatl gǝzǝni. 19Nan mbatl gǝzǝn konkawo wu’i na sham da’a, arni wu bi gam gǝzǝn gip holi dǝmi dlǝran na ci cina gip pi ko unu bar kǝ dǝɗanye.

20Ama kǝno, untuni kǝ kulci den pitǝn kǝ Almasihu da’a. 21Kǝ kum den tiwi, kǝn mǝn kopi gǝso pa kulci in den kandatu ge shirǝmi ra gip Yesu gwa. 22Kulci in ni den kandatu dǝmi gin ra far gwa, den kǝ byal ni kor pitǝn ginka, muntu kan likawi na lam setǝn gǝsi. 23Pa kulci in den kǝ kǝrkǝm ni damtǝn kǝ mbatl gin ar mbuni. 24Yam pali mini den kandatu tǝra gwa. Pel pitǝn tu ngapo ba mani ni shini tǝp kǝ ba pitǝn dlat na dǝmi dlǝran.

25Ra untuwo zani ceni lare, dǝ ko gonge mbarǝm yari berǝm dǝmi gǝs ge shirǝmi, domici kup gǝmi jwal kǝ dli nǝm ni. 26«Gip pi lo gino ba kǝ pini warwat pitǝn da’a.» Ba kǝ zani dǝ pǝt nda bin kǝ’i den lo da’a, 27domici lo ba bi ni gun dun itǝr tǝpe. 28Naa dǝ muntu kan murno tǝ za pi mure. Naa tǝ pi mbapi, tǝ pi mbap hoyi na am gǝsi, kǝ dǝ tǝ zami, tǝ pa bi munju am ri wur kaar da gwa.

29Ba kǝ zani dǝ mǝgǝn shirǝm gon ɗǝl ter bi da’in da’a. Naa dǝ bar ju kup ki yariwo ar dǝm kǝ ne am ya’ǝn ra den bi argon tu wu ndu gwa. Tǝp untuni shirǝm gin baa ɓa’i bigul munju kum shirǝmi gwa. 30Ba kǝ li ni Ruhu kǝ Yam mbatl da’a. Tune ni’e tiwo wule ɓe am ni kan ba sede’e kǝn kǝ Yam ni gwa gas patǝn kǝ bari. 31Zani ko gonge ɗasi mbatli, guzǝl pitǝn kǝ mbatli, lo’e, dlanye, ne shirǝm mbarǝm gam, na ko gonge mǝgǝn pitǝne. 32Dǝm ni na ho pitǝn na kumi guna den ya’ǝni, gafarteni ya’ǝni, kandatu Yam gafarte in ka tǝp kar Almasihu gwa.