‏ Matthew 19

Yesu kulci mbarǝm den kari gǝrka

1Nan Yesu pa’i yari bar juwo, ar ni tǝ za atl kǝ Galili kan tǝ te gip kǝti atl kǝ Yahuda muntu kan ra te bi ɓula Urdun ka gwa. 2Mbarǝm na womti kop ti kaari, kan tǝ pǝni wur kumi dli gǝzǝnka lasi.

3Ar ni mǝn Parise jen ri kar ti kǝdǝ wu kum kǝ bi gǝsi. Ar ni wu wule, «Tǝlankur kulci kǝ Musa kulci ni’e mbarǝm ba mani kari gǝr gǝs ka den bi argona?»

4Yesu nǝmi wur, tǝ wule, «Kǝ zhit ni gip tǝlankur diya? Untun ar ra terka. Yam kan pi wuro tǝ pi wur ni moni na gǝr mǝtli.» 5Kan Yam ba wule, 6Kǝkǝno wu rop ni da’a, ama wu dǝm ka nǝm wi. Ra untu wo, argon tu Yam gudlumiwo, ba dǝ gon pǝtlka da’a.»

7Ar ni wu ngen momi wu wule,«Kano unun kem Musa yari’e, mbarǝm baa mani rǝshi tǝlankur kǝ kari gǝr gǝs kawu?»

8Ar ni Yesu wul wur’e, «Musa za kǝn ni kǝ kar gǝr gin ka den bi lati gam gi ni. Ama terkawo untun ar ra da’a. 9A yari inka, muntu kup kar gǝr gǝska, ba’e den warwat pitǝn kǝ muri na moni kaari ni da’a, kan tǝ gudlumi na gono, muri na mǝtli kaari ni tǝ den pi.»

10Ar ni mir mǝn kulci kar ti wul ti’e, «O untun fa dlom kǝ gǝr na kos rawo, ar ba mani ba dǝ mbarǝm gudlumi da’a!»

11Yesu wul wur’e, «Ba’e Ko gonge mbarǝm ni baa mani pǝni shirǝm tu da’a, ama se mbarǝm ju kan Yam bi wur mani pi untuyi gwa. 12Domici moni jen ra kan gǝr wur moniyi dagwa, jen ngapo, mbarǝm ni pali wur unju. Jen ngapo gip ndu’i gǝzǝn ni den’e wii gudlumi da’a den bi kǝ mulki kǝ to yam kas. Kup mǝn mani pǝni shirǝm tuwo, tǝ pǝni.»

Yesu la’i mimir albarka

13Ar ni ɗiri mimir jen kar Yesu kǝdǝ tǝ ne am den wuri, tǝ shirǝm na Yam den wuri. Ama mir mǝn kulci kar Yesuyi matl wuri. 14Ama Yesu wul wur’e, «Zani dǝ heli mimir ju ɗir karǝmi, ba kǝ hane wur nika da’a! Domici mulki kǝ Yamo gwazin ni.» 15Ar ni tǝ ne wur am gam tǝ la’i wur albarka, kan tǝ ndara.

Ɗal moni mǝn bar kǝ ame

16Ar ni mbarǝm gon ɗir kar Yesu tǝ ngen momi kar ti, tǝ wule, «Ba mǝn kulci, unu ho bar ni aa pi kǝdǝ a zam rai kan baa pa dagwawu?»

17Ar ni Yesu nǝmi ti tǝ wule,«Unun kem kǝ ngen momi den ar gontu kan ra hoyi gwawe? Yam nan gǝs ni’e hoyi. kin kǝ ndu rai kan baa pa dawo, kop dokayi.»

18Kan mbarǝmi wule, «Dokayi gonge?» Ar ni Yesu nǝmi ti, tǝ wule, Ba kǝ ri gon eka da’a. Ba kǝ mur na mǝtli kaari da’a. Ba kǝ pi mur da’a. Ba kǝ bi seda kǝ lar da’a. 19Bi nartǝn ga bǝba gi na nǝna gi, ndu berǝm dǝmi gi wule gam gi.

20Ɗal moniyi bali ti tǝ wule. «A kop doka ju wi kup, Unun es sem wi?»

21Ar ni Yesu wul ti’e, «Kin kǝ ndu kǝ nǝra dlato, ri wur bar kǝ am gika kǝ bi wurpiyi munju kan am ri wur kar dagwa, kii zam bar kǝ am to yamka. Kan kǝ ɗir kopǝni.» 22Ama nan ɗal moniyi kum untuwo, ar ni tǝ ndara bom na dun mbatli domici tǝ mǝn bar kǝ am ni hoyi. 23Ar ni Yesu wul mir mǝn kulci kar ti yi’e, «Ge shirǝm ni a yari ine, ar ba ban naar dǝ mǝn bar kǝ am te gip mulki kǝ to yam ka.

24A yari in es’e, ar ba mani dǝ rakumi te tǝp gip ger alura na dǝ mǝn bar kǝ am te gip mulki kǝ Yami.»

25Nan mir mǝn kulci karti kum untuwo ar ni wu nǝm bi na ame, wu wule, «O untu ni fawo, woni baa zam ɗǝltǝn ituwi?»

26Ar ni Yesu zhit wur hoyi kan tǝ wule, «Gip shini kǝ mbarǝm kamo, ar baa pi da’a. Ama kar Yamo, ko unuwo mǝn pitǝn ni.»

27Ar ni Bitǝrus wul ti’e, «Ar tu mǝ za bar gǝmi ka kup mǝ kop ki wi. Unun mii zam gip kopi giwe?»

28Ar ni Yesu wul wur’e, ge shirǝmi ni a yari ine, Gip zhan mǝn ɗirtǝno, Nya Mbarǝm ni dǝm den dandi mǝn cirtǝn gip mulki gǝso, kǝn mǝn kopi gǝn baa dǝm den dandi kutl-cet rop, kǝ tloyi gǝs gal kutl-cet rop kǝ Isra’ila shirǝmi. 29Kano muntu kup za bom gǝsi, ko mǝn gǝpi gǝs moni, ko mǝtli, ko base, ko nase, ko mimir gǝsi, ko kǝn gǝsi, den bi sun gǝno, tii zam argon tu kan man munju gwa gucǝpi hauya nantam (100), kan tǝ pa zam rai tu baa pa dagwa. 30Ama mbarǝm na womti kan ra cina kǝkǝno, wii dǝm kǝ kaari,kǝ kaar ngapo wii dǝm kǝ cina.