Psa 114 | SahYktBBL | STEP | Айыы Тойону таптыыбын – Кини мин саҥабын, мин ааттабылбын истэрин иһин.

‏ Psalms 114

1 Айыы Тойону таптыыбын –
Кини мин саҥабын, мин ааттабылбын истэрин иһин.
2 Мин этэрбин Кини болҕойон иһиттэ,
онон мин олоҕум устата Кинини ыҥырар буолуом.
3 Өлөр өлүү ситимигэр иҥнэммин,
үтүгэн түгэҕин үлүгэригэр түбэһэммин,
мин муҥу-сору көрбүтүм, муҥур уһукка түспүтүм.
4 Онно Айыы Тойон аатын ыҥырбытым,
«Оо, Айыы Тойон, олохпун өрүһүй!» – диэбитим.

5 Айыы Тойон аһыныгас сүрэхтээх, кырдьыктаах,
биһиги Таҥарабыт амарах санаалаах.
6 Айыы Тойон кэнэннэри харыстыыр:
Кини миигин, күүһүм эстибитигэр, быыһаан ылла.
7 Дууһам миэнэ, уоскулаҥҥар төнүн,
Айыы Тойон эйиэхэ үтүөнү оҥордо.

8 Эн өрүһүйдүҥ мин дууһабын өлүүттэн,
харахпын – харах уутуттан,
атахпын – бүдүрүйэртэн.
9 Онон мин бу тыыннаахтар сирдэригэр
Айыы Тойон иннигэр сылдьыаҕым.