‏ Luke 18

Nongu mukwili ne yivovi

1Sesu atwile yawu nongu mulonze re bwedi musambilenge makyesi motsu guga nzugu. 2Ayambile yawu re: «Gu divule dimoosi gubile yivovi aseyulungu Nzambi wome ne asegobisenge pasi mutu. 3Gu bile gandi gu divule dyene mukwili wu mugyetu wu yendenge makyesi motsu gulabe yivovi mu yambile yandi re: “Lunze me ve wusu mukolitsi wami.” 4Makyesi ma mbili yivovi asesingenge wuvage dyambu ditombenge mukwili wene. Kere wisi wumoosi yivovi ayambile mu yabene re: “Nungyenze masakalabi Nzambi wome ne wugobisi pasi mutu. 5Te mukwili wuwu agonegomisile me muru makyesi motsu, kagu malunzi yandi.”» 6Ve mane Fumu wuyambile nane, akonde re: «Sa yulwanu nagoneyambile yivovi gigibi gigi! 7Rembuse yivovi gigibi ayambile nane, keke ne Nzambya! Agulunze batu bandi babanatsitse yandi ne nyangu ne dibati. Asaketsinge muyamune yawu. 8Mayambile yenu re agulenze lunze yawu. Te vekeberuge Mwane mutu, agudagise gitu mu tsi yya?»

Nongu yi mufwarisi ne muyakitsi lepu

9Sesu abetu nongu yiyi gu batu babatasenge re bayi basungeme ve wusu Nzambi ne wuvongulenge bambatsi: 10«Babagele babeyi bayende gu ndagu Nzambi gusambile; wumoosi bile mufwarisi, wune muyakitsi lepu. 11Mufwarisi ateleme ne asambilenge gu murime wandi re: “O Nzambi, magabuse dinyi gu yu mumbare masandi ne mabi ga batu bamosi bange yibe. Masakavagi butswari, masandi wubive. Magabuse dinyi gu yu mumbare masandi nisi ga muyakitsi wu lepu wuwu. 12Makamini kugi tsufu beyi mu tsonu. Makavegi yu gimoosi mu digumi mu byotsu bikadili me.” 13Muyakitsi lepu ateleme ve tungu. Aserungule nisi wusimbule misu gu yulu, te adimbe tulu nuvonde kokolu re: “O Nzambi labe me dingyebe, me mutu wumubi.”» 14Sesu abeyambile yawu re: «Nungyenze mutu wuwu agabugu gu ndagwandi wusungeme, te sa mufwarisi. Nongwene yigwendigile re: wotsu wukemakise manyuru mandi agugulumusu ne wotsu wukegulumugu agumakusu.»

Bufumu bu Nzambi nde bu batu baba ga bilengi

15Wisi wumosi, batu babagile Sesu ne baane bafuge mure akesunzile yawu makake nuvege yawu myule. Ve labe bayikitsi nane, basembe bakinde ba baane. 16Te Sesu arume bakinde mugogule ne baane nuyambile re: «Sisanu baane bayitsi gu me, diyakare yawu mumbare Bufumu bu Nzambi nde bu batu baba ga yawu. 17Mayambile yenu nungyenze: wotsu wusakesinge Bufumu bu Nzambi ne murime wandi wotsu ga mwane wu mukyeki, asakerungule wunyingene gu bwo.»

Dibagele di yikiti

18Ne vane, yivunde gimoosi gi musifu atombe Sesu re: «Mulonzi wu munyi, mavagi nde gi mudile monyu wu mubu ne mubu?» 19Sesu ayambile yandi re: «Mugi yigonetsitse me re, wu munyi? Gusandi mutu wu munyi vengu ke Nzambi ya pinze. 20Yiyatsi birumu bi Nzambi bikalonzi re: “Yiyavage butswari, yiyaboke mutu, yiyayibe, yiyafurigile mutu dyambu, gobise tayagu ne ngwagu.”» 21Dibagele ayagule re: «Makagobisi birumu byene byotsu bande ve bungyebe bwami.» 22Ve mane yandi wuyulu mikalu myene, Sesu ayambile yandi re: «Yimebesale ne dyambu dimoosi di wuvage: Sumbise byotsu bi nagu, ne gabile badole bakedile yu gu masaandi, ne vane yigudile busine gu yulu. Kere vane ruge, lande me.» 23Te ve mutu wene ayulu mabigu mene, abile ne rungile mumbare abile ne mbili bukiti. 24Sesu nulabe re amenyyongeme, ayambile re: «Ke page gu pagese mu nyingene gu mune wu tsongi. 25Te page yivyogilile gu yikiti munyingene gu Bufumu bu Nzambi!» 26Babayulungu mayambilenge Sesu bakalule re: «Gabile re nane, ake wukeyobulu nde nyi?» 27Sesu ayagule re: «Mambu makaragulu batu wugage, Nzambi asakaragulu mo.» 28Ne vane Pyere ayambile re: «Nga yimelabe namesise yetu manyi metu motsu mu lande yu.» 29Sesu ayagule yawu re: «Mayambile yenu nungyenze, ga mutu asise ndagwandi ne mugatsyandi, agasise baane bangwandi ne bakinde bandi vo baane bandi mu dyambu di Bufumu bu Nzambi, 30mutu wene agudile bivyogilile mbili gu tsi yiyi ne mu dikyesi dikayitsi, agudile monyu wu mubu ne mubu gu mbuge Nzambi.»

Sesu agoneyambile mu dyambu di difu ne bufwangugulu bwandi

31Ve yulu vane, Sesu abonge digumi ne bayikitsi babeyi ne ayambile yawu re: «Yabanu re dikemake gu Serusaleme, motsu matende babigitsi mu dyambu di Mwane mutu makelabene. 32Aguyakusu mu myogu mi batu bababi. Yawu baguseve yandi, bagusenge yandi ne bagutulile yandi makyengi. 33Bagudimbe yandi banganzi ne bagumuboke. Kere mu wisi wu mureru agufwangugu.» 34Te bayikitsi basenyigugulu mambu mayambilenge Sesu, divindugulu di mambu mene dibile di swegu. Baseyabe ma yambilenge yandi.

Sesu abeluse nge pafu gu Seriko

35Ve pulenge Sesu ve tsombu Seriko, vane vebile nge pafu matsagele ve tungu nzile nurimenge bivave gu bavyosi. 36Nge pafu ayulu divuve di piti yivyogenge ne atombe batu re: «Digonevyoge di nde gi?» 37Batu bayagule yandi re: «Nde Sesu mwisi Nasarete agonevyoge.» 38Ne vane ayame mundunge: «Sesu, Mwane David, labe me dingyebe!» 39Babayendenge mawusu basembe yandi mure akerumbe te akondenge ke wuyame pepe re: «Mwane David, labe me dingyebe!» 40Sesu asikeme ne arume batu mubage yandi ve mbarandi. Ve bile nge pafu ve mbarandi, Sesu atombe yandi re: 41«Yironde nde gi? Mavagili yu nde gi?» Nge pafu ayagule yandi re: «Fumu maronde wulabe ga ve kale!» 42Sesu ayagule yandi re: «Misu magu mabalugi! Gitu gyagu gimayobule yu!» 43Vane ne vane nge pafu abande wulabe ga ve kale. Alandenge Sesu nugitsenge Nzambi re: «Myule gu Nzambi!» Piti yotsu yilabe dyo ne yo gandi yigitse Nzambi.