Luke 10
Isalu gi magumi tsambu ma bayikitsi ne bayikitsi babeyi
1Ve yulu vane Fumu asoole magumi tsambu mamosi ma bayikitsi ne bayikitsi babeyi. Asindige yawu babeyi babeyi ve wuswandi gugare mavule motsu ne mu bitsige byotsu bikeyendenge yabene. 2Ayambile yawu re: «Kure yinde mbili gu nungi te basalitsi basandi mbili. Kagu sambilanu mure nge nungyene akondi wusindige basalitsi gu nungyandi. 3Yendanu, makesindige yenu ga baane ba mandombe bagane ngudi ve ganegare batu baba ga bimbungu. 4Diyabonge nisi badole, nisi pengi, nisi matambi, diyasikeme mu manene muyubule mutu. 5Vekenyingene yenu gugare ndagu, regilanu wuyambile kire: “Polu yibili gu ndagu yiyi.” 6Ga gubile mutu wu polu gu ndagwene, polwenu yisali nandi, ga sanana polwenu yigabugi nenu. 7Ga bange ndagu basingise yenu munyingene, bilanu gu ndagwene. Yanganu, nwanganu byotsu bikevegu yenu mumbare musalitsi ane dinyyange mudile futwandi. Diya nyingene mu pasi bandagu. 8Veketsombugungu yenu gu divule dimoosi, ne ga bisi divule dyene basangile yenu, yanganu bikevegwa yenu. 9Belusanu babetsi ba divule dyene ne yambilanu yawu re: “Bufumu bu Nzambi bumegogule gu yenu.” 10Te vekenyingena yenu gu divule disakesangulwa yenu, yendanu mu bitsige bi mbili batu ne yambilanu gu botsu re: 11“Yetu dikekurumuse difufundu di divule dyenu ditsetareme mu byoru byetu ▼▼Range 9.5.
. Te yabanu re: Bufumu bu Nzambi bumegogule gu yenu.” 12Mayambile yenu: Mu wisi wu mutsundu bisi divule dyene bagukilusu wuvyogilile bisi Sodome!» Mavule makebuse wusinge
13«Mulogu gu yenu bisi divule di Korasi, mulogu gu yenu bisi divule di Betesayida! Mbe bisi Tire ne bisi Sidon balabe bimwile na labe yenu, mbe bakalule buyedi kale mudware basaku ne muyole dibufu mu manyuru mawu, muritsige re batsekalule bitsagilitsi. 14Re dibandu mu wisi wu mutsundu, wukilusu wenu wuguvyogilile wu Tire ne Sidon. 15Ne yenu bisi Kapernaum, digonetase nde re Nzambi agulunze yenu gu yulwa? Gusandi, agugulumuse yenu gu buloongu bu babafu.» 16Sesu abekonde yambile bayikitsi bandi re: «Wotsu wukeyulu ne wusinge mabigu menu, ameyululu me; wotsu wukebuse mabigu menu amebuse me; wotsu wukebuse me amebuse ne wusindige me.»Bugabugulu bu magumi tsambu ne bayikitsi babeyi
17Ve gabugu magumi tsambu ma bayikitsi ne bayikitsi babeyi babile ne yinyunge ne bayambile Sesu re: «Fumu, mu dine dyagu nisi manyunyi mamabi magonegobise yetu.» 18Sesu ayagule yawu re: «Nungyenze, malabe Sate alage gu tsi ga mukakedi. 19Yulwanu: matsevege yenu dinyange di wutsare banyoge ne banginge ne wunyige ngudi yotsu yi mukolitsi, ne gusandi yivave gikevagile yenu dyambu dibive. 20Te nisi nane, yenu diyalabe yinyunge mumbare manyunyi mamabi magonegobise yenu, te labanu yinyunge nde mumbare Nzambi ametende banduge benu mu mugande wwandi gu yulu.»Sesu alabe wunyi
21Mu dikyesi dyene Dinyunyi di Sungeme dibase Sesu ne yinyunge ne ayambile re: «Tate, Fumu yulu ne tsi, magitse yu mumbare yiswege mambu mene gu babagonetase re bavyogilile buyedi, yiyabise mo gu bilengi. Nungyenze Tate yironde re dibili nane.» 22Kere vane Sesu ayambile gu bababile vane re: «Tayami avege me byotsu. Gusandi mutu nisi wumoosi wuyatsi Mwane, vengu ne Tayi, gusandi mutu nisi wumoosi wuyatsi Tayi vengu ne Mwane. Te Mwane aronde wuyabise Tayi gu botsu mure ne yawu bakeyabe yandi.» 23Ve yulu vane Sesu agyelugu gu bayikitsi bandi, ayambile ke ne yawu pinze re: «Yenu dine yinyunge mulabe magonelabe yenu! 24Nungyenze mayambile yenu re: mbili babigitsi ne bafumu baronde wulabe magonelabe yenu, te baselabe mo. Baronde wuyulu magoneyulu yenu te baseyulu mo!»Nongu yi mwisi Samari wu munyi
25Ne vane musupulitsi wumoosi wu migage mi Muyise aruge ne ditase mumange Sesu, ne ayubule yandi re: «Mulonzi, mavagi nde tsenyi mudile monyu wu mubu ne mubu?» 26Sesu atombe yandi re: «Batende nde tsenyi mu mugage wu Nzambi? Yikarangi nde gi mu wo?» 27Dibagele ayagule re: «“Bwedi muronde Fumwagu Nzambi ne murime wagu wotsu, ne dinyunyi dyagu dyotsu, ne ngudi agu yotsu, ne buyedi bwagu bwotsu. Bwedi gandi muronde pasi mutu nakarondi yu yibene.”» 28Sesu akalulile yandi re: «Yitseyagule ke bwedi. Vagenge nane makyesi motsu yikedile monyu wu mubu ne mubu.» 29Te musupulitsi wu migage aronde wuyabise batu re nzidwandi yibetsi yisungeme. Abekonde wutombe Sesu re: «Ake pasi mutu wukeronde me nde nyi?» 30Sesu ayagule yandi re: «Gubile dibagele dimoosi aburugu gu Serusaleme musunde gu Seriko. Mibongi migange yandi. Badumbe byotsu bibile nandi, barambe yandi kube, basise yandi gugare nyambu ne bayende. 31Musambilitsi malagu avyoge nzilene; abengunu yikume ne dyambu dyene. Ve laba yandi dibagele dyene, agonge nzile. 32Kinde Levi apule vane ne yandi agonge nzile. 33Te mwisi Samari wumoosi ayende munyalu. Yanupule ve mbare dibagele dyene, murime wandi wubase ne dingyebe. ▼▼Bisi Samari ne basifu basenongenge, balenzenenge yawu ne yawu.
34Kere agogule neve yandi, ayitile matsi ne malamu mu wubuge bapure bandi ne akate tsyo ne birende bibatsande kere vane anakige yandi ve yulu yibodu gyandi, ayende nandi gu ndagu yi rungulu benyi, ne ayamune yandi. 35Ne ngwali yine, apuse badole, avege tsyo gu nge ndagu ne ayambile yandi re: “Yamune mutu wuwu. Tsitsi badole gatsisabile mbu, vekitse me, magugabusile yu tsyotsu tsikegabe yu mu yandi.”» 36Sesu abekonde wutombe musupulitsi wu migage re: «Ve pwase batu bene bareru, nde nyi wubile mbatsi mutu wurambu kube ne mibongi?» 37Musupulitsi wu migage agabusile yandi re: «Nde wuyamune mutu wene.» Sesu ayambile nandi re: «Yende, yevagi ne yu munongu wumoosi!» Sesu gu mbuge Marte ne Mari
38Ve yendenge Sesu mu nzile ne bayikitsi bandi, bapule ve dimbu dimoosi. Vane vebile mugyetu ndugandi Marte ayake Sesu gu ndagwandi. 39Abile ne mwane ngwandi, ndugandi Mari. Mari abile matsagele ve tsi ve wusu Fumu ne ayulungu mambu malonzenge Sesu. 40Marte abile ne mbili bisalu ne akayegenenge. Aruge ve mbare Sesu, ayambile yandi re: «Fumu, mwane mame agonesise me mu dyanze bisalu byotsu mapinze, yisegonelabe page mu dyambu dyena? Kagu yambile yandi arugi gu yamune me.» 41Fumu ayagule yandi re: «Marte, Marte, yigonekayigene ne yine matase mu mbili mambu, 42te guke dyambu dimoosi dingyenze. Mari atsesoole dikabu didinyi ne gusandi mutu wukerungule wudumbe ya dyo.»
Copyright information for
SnqSC