Luke 15
Tabe moosi yitsyemugu yimelabane
1Bayakitsi ba lepu ne batu bange mabi bagogule ve mbare Sesu muyulu mambu malonzenge yandi. 2Bafwarisi ne batenditsi ba migage bagyelenge yandi re: «Awuwu mutu ande tsenyi agonenonge ne batu bange mabi ne wuyi nawu!» 3Te Sesu atwile yawu nongu re: 4«Mutu wumoosi ve ganegarenu arebile ne kame bindombe, gimoosi gagitsyemugu, nungyenze agusise magumi yiwe ne bindombe yiwe gu nungi muyende bene yindombe gitsetsyemugu kwange ne vekedagise yandi gyo. 5Veke dagise yandi gyo akalabi mbili yinyunge ne wupape gyo gu yulu yitsutsu nugabugu gu dimbu. 6Ne agutsitse bambatsi bandi ne batu baba mu batungu re: “Ruganu dilabi yinyunge mumbare yindombe gyami gibetsi gitsyemugu gimelabene!” 7Re munongu wumosi ga mutu nge mabi wumesinge Sesu nukalule bitsagilitsi, bakime ba Nzambi ba yulu bakalabi yinyunge gimbili wuvyogilile magumi yiwe ne batu yiwe babamane singe Sesu, babasage ne nzale wukalule buyedi.Fure moosi yitsyemugu yimelabane
8Beyulwanu: mugyetu wumoosi arebile ne digumi di bafure, moosi yiretsyemugu, asakebangise page nugombule ndagu nukunze bene furene kwange ne vakedagise yandi yo? 9Agamelabe yo, akatsitsi bambatsi bandi ne babadukelene nandi nuyambile yawu re: “Ruganu dilabi yinyunge mumbare mamedagise furami yibetsi yitsyemugu!” 10Renane, mayambile yenu re bakime ba yulu ba Nzambi bakabili ne yinyunge ga mutu wumoosi nge mabi amakalule buyedi.»Mwane wutsyemugu wumelabene
11Sesu abekonde yambile re: «Dibagele dimoosi abile ne bane babeyi ba babagele. 12Ngyebe ayambile yandi re: “Tate, vege me myami mikwanyi. Tayi agabile yawu manyi mandi.” 13Ma batsufu tsivyoge, ngyebe asumbise byotsu bivegu yandi ne ayende gu tsengi yi vale. Guna, avagenge mambu magyayugu ne badole tsyotsu tsibile nandi tsivu. 14Ve mane yandi badole tsyotsu nugabe, nzale yiyinene yidugulu gu tsengyene. Abande wukambulu mu mambu motsu. 15Ayende mu dyanzile mutu wumoosi gu tsengyene. Mutu wene asindige yandi mukyele bangulu ve yitsige gi yiswa yawu. ▼▼Gu mbuge basifu, ngulu yibodu gibive, nisi wuyi, nisi wugange, nde mugyele. Musifu ga mwane wene, agakyele bangulu nde tsonyi yiyinene.
16Mwane wene abilenge ne nzale wuyi nisi kure yiyangenge bangulu, te asevegu ne mutu nisi wumoosi. 17Kere vane atase re: “Gu mbuge tate badyanzitsi botsu bane kure yivyogilile, te me gugu manafu ne banzale. 18Makegabugu gu mbuge tate muyambile yandi re: Tate, matsevage dibi ve wusu Nzambi ne ve wuswagu. 19Masandi du wuyelimine mutsitsungu re mwanagu. Bonge me ga mudyanzitsi wagu.” 20Ne vane, ateleme mugabugu gu mbuge tayandi. Ve bile yandi kike vale ne ndagu, tayandi alabilile yandi, amulabe dingyebe dimbili. Ayende bambangu mubengusunu yandi. Asambene nandi. 21Kere mwane ayambile re: “Tate, matsevage dibi ve wusu Nzambi ne ve wuswagu. Masandi du wuyelimine mutsitsungu re mwanagu.” 22Te tayi ayambile badyanzitsi bandi re: “Babisanu wubage kape yimone yivyogilile nyyeve ne dwisanu yandi yo. Dwisanu yandi mulunge mu mulembu ne matambi mu byoru. 23Baganu yibodu gi muvangu, bokanu gyo, lambanu, diyangyanu ne yinyunge, 24mumbare mwanami wuwu wubetsi ga mutu wufu amerambugu, abetsi wutsyemugu, amelabene. Re dibandu dilabyanu yinyunge.” Ne vane babande diyaye. 25Mu dikyesi dyene mwane wu yivunde abile ke gu banungi, ve tutuge yandi, bebele ne ndagu ayulu divuve di bangofi ne miginu. 26Atsitse mudyanzitsi wumoosi mutombe yandi dyambu digonevyoge. 27Wune agabusile yandi re: “Nde mwane ngwagu ameruge re tayagu atsebokise yibodu gi muvangu mumbare yandi atsegabugu ne polu.” 28Ne vane, mwane yivunde ayulu kabu, abuse wunyingene gu ndagu. Tayandi avate mulembe yandi munyingene. 29Te mwane agabusile tayandi re: “Labe bilime bibimbili matsedyanzile yu guga gigule ▼▼Gigule: Digyere, mukalu, wubuse.
birumu byagu, ne yisamevege me nisi mwane tabe mu wuyi ne yinyunge mane bambatsi bami. 30Te ve mitse mwanagu wuwu, wumane manyi magu motsu nubunge ne bange yilambe ne butswari, yimebokisile yandi yibodu gi muvangu!” 31Tayi amugabusile re: “Mwanami, yiyi nami makyesi motsu ne byotsu bi nami ke byagu. 32Te bwedi muvage diyayi mulabe wunyi mumbare mwane ngwagu wuwu wubetsi ga mutu wufu amerambugu, abetsi wutsyemugu amelabene!”»
Copyright information for
SnqSC